Новости за 25.02.2026

Мәскәү өлкәсе Сәламәтлек саклау министрлыгының штаттан тыш баш эпидемиологы Зинаида Труш «Радио 1» белән әңгәмәдә грипп һәм ОРВИдан саклану чаралары турында сөйләде.

Әгерҗе районы прокуратурасы пенсионер хатын-кызга мошенниклар урланган 300 мең сум акчасын кире кайтарачак.

Татарстанда «Кадрлар» илкүләм проекты кысаларында бушлай яңадан уку өчен гаризалар кабул ителә башлады. Быел барлыгы 7,6 мең татарстанлыны яңадан укыту планлаштырыла, дип хәбәр итә ТР Хезмәт министрлыгы матбугат хезмәте.

Бүген Казанның «Эмиз» банкетлар залында чечен һәм ингуш халыклары вайнах ифтарын уздырды.

Казанда 26нчы «Татарстанның спорттагы өметләре» тантанасы узачак. Анда 600гә якын яшь спортчы һәм республиканың балалар-яшүсмерләр спорт мәктәпләрендә тәрбияләнүчеләр бүләкләнәчәк. Лауреатлар арасында – Россия, Европа һәм дөнья беренчелекләрендә җиңүчеләр һәм призерлар.

А.Н.Туполев исемендәге Казан милли тикшеренү техник университеты «Кадрлар» яңа илкүләм проекты кысаларында «Нейрочелтәрләр өлкәсендә белгеч» белем бирү программасын гамәлгә ашыра башлый. 100дән артык белгечне әзерләү планлаштырыла.

«Авыл укытучысы» федераль программасын гамәлгә ашыру чорында Татарстанга Россиянең төрле төбәкләреннән 72 педагог эшкә килгән. Бу хакта ТР Мәгариф һәм фән министрлыгының кадрлар сәясәте бүлеге башлыгы Гүзәл Гатауллина ТР Иҗтимагый палатасында ведомствоның ачык максатлары һәм бурычлары турында фикер алышканда хәбәр итте.

Казанда Совет урамындагы торак йортның түбәсе ишелгән.

Совет районы администрациясендә хәбәр итүләренчә, зыян күрүчеләр юк. Белгечләр ремонт эшләре башкара.

Хәзерге вакытта бу хәлнең барлык шартлары ачыклана.

Махсус хәрби операция зонасында хәрби хезмәткәрләр өчен ифтарлар үткәрелә. ТР мөселманнары Диния нәзарәте матбугат хезмәте хәбәр иткәнчә, Рамазан аеның алтынчы кичендә хәрби бүлекчәләрнең берсенең блиндажында авыз ачу мәҗлесе узган.

Казанда һава торышы шартлары начараю көтелә. Синоптиклар мәгълүматларына караганда, шәһәрдә кар явачак, юлларда бозлавык барлыкка киләчәк. Дәүләт автоинспекциясе машина йөртүчеләрне юлларда сак булырга чакыра.

Татарстанда өч атналык баласы тәрәзәдән егылып төшкән хатын-кызны баласын караусыз калдырган өчен хөкем итәчәкләр.

Изге Рамазан аеның беренче җомга көнендә, 27 февральдә, Казанда 30нчы маршрут буйлап бушлай автобус йөриячәк. Инициативаны Татарстан Республикасы мөселманнары Диния нәзарәте ярдәме белән «Зәкят» хәйрия фонды гамәлгә ашыра.

Татарстанның урман тармагында 2,5 меңгә якын кеше эшли. Хезмәткәрләрнең уртача яше – 43 яшь. Бу хакта «Татар-информ»га биргән интервьюда ТР урман хуҗалыгы министры Равил Кузюров хәбәр итте.

Татарстан Рәисе Рөстәм Миңнеханов видео-конференц-элемтә аша «Бердәм Россия» партиясе югары советы бюросы утырышында катнашты. Бу хакта республика җитәкчесенең матбугат хезмәте хәбәр итә.

Баулы үзәк район хастаханәсендә капиталь ремонт башланды. Эшләрне 2026 елның өченче кварталында тәмамларга планлаштыралар. Бу хакта ТР Сәламәтлек саклау министрлыгы матбугат хезмәте хәбәр итә.

Россиядә яшәүче дүрт миллионнан артык ике һәм аннан да күбрәк балалы гаилә июньдә еллык өстәмә түләү алу өчен гариза бирә алачак. Бу хакта РФ Премьер-министры Михаил Мишустин Дәүләт Думасында хөкүмәт эше турындагы хисап барышында хәбәр итте, дип тапшыра «ТАСС».

Әтнә муниципаль районы советы сессиясендә район башлыгы Рөстәм Хисамиев Татарстан Дәүләт Советы Рәисе урынбасары Марат Әхмәтовка мөрәҗәгать итте. Район җитәкчесе тарихи Гатаулла бай Даутов йортында барган ремонт эшләрен төгәлләүдә ярдәм сорады. Ул әлеге бинаның төбәк өчен стратегик әһәмияткә ия булуын һәм аның туризм потенциалын үстерүдә төп нокта икәнен искәртте.

28 февральдә Татар китабы йортында «Без үстергән нәсел агачы» балалар һәм әти-әниләр өчен шәҗәрә төзү турында беренче татарча ярдәмлек белән танышу узачак, дип хәбәр ителә Татар китабы йорты телеграм-каналында.

Әтнә муниципаль районы башлыгы Рөстәм Хисамиев район советы сессиясендә чыгыш ясаганда авыл хуҗалыгы өлкәсендәге кадрлар кытлыгы мәсьәләсе һәм бу проблеманы хәл итү юллары турында сөйләде.

Республика Рәисе Рөстәм Миңнеханов ТР Хөкүмәте йортында киңәшмә үткәрде. Утырышта катнашучылар кече нефть компанияләренең узган елдагы эшчәнлеге нәтиҗәләре турында фикер алышты һәм 2026 елга бурычлар билгеләде. Бу хакта ТР Рәисе матбугат хезмәте хәбәр итә.

Чаллыда Минзәлә трактындагы складта чыккан янгынны сүндергәннәр.

«Янгын чыккан урынга су китерү өчен магистраль линиясе сузылды», - дип хәбәр иттеләр «Татар-информ»га Россия Гадәттән тыш хәлләр министрлыгының ТР буенча баш идарәсендә.

Зыян күрүчеләр юк, янгынның сәбәбен Дәүләт янгын күзәтчелеге белгечләре ачыклаячак.

Әтнә районы сөт җитештерү өлкәсендә Татарстанда тотрыклы рәвештә беренче урында бара, әмма тармактагы бәяләр сәясәте җитештерүчеләрне мөстәкыйль рәвештә эшкәртү белән шөгыльләнә башлау турында уйланырга мәҗбүр итә. Бу хакта Әтнә муниципаль районы советы сессиясендә хисап чыгышы барышында район башлыгы Рөстәм Хисамиев белдерде.

2025 ел нәтиҗәләре нигезендә Әтнә районында авыл хуҗалыгы тармагы тотрыклы үсеш күрсәткән. Бу хакта Әтнә муниципаль районы советы сессиясендә район башлыгы Рөстәм Хисамиев белдерде.

Россия Фәннәр академиясе академигы Олег Синяшин «Дуслык» ордены белән бүләкләнде. Бүләк академикның 70 еллыгына багышланган «Элементоорганик кушылмалар химиясендә динамик процесслар» фәнни конференциясе кысаларында тапшырылды. Синяшинны Татарстан Рәисе Рөстәм Миңнеханов бүләкләде.

Чувашия баш казые Хәмидулла хәзрәт Минаҗетдинов Чувашия Республикасы мөфтие Ильяс хәзрәт Сафиянов чакыруы буенча Урмай авылы Җәмигъ мәчетендә булган. Чувашия мөфтие күмәк ифтар мәҗлесендә һәм тәравих намазында катнашкан. Бу хакта Чувашия мөфтияте телеграм-каналы хәбәр итә.