Новости за 03.02.2026

Арча районы Пөшәңгәр күп функцияле үзәгендә Россиядә Халыклар бердәмлеге елын ачу уңаеннан төрле милләт вәкилләрен берләштергән зур мәдәни чара – концерт программасы оештырылды. Бу хакта «Арча хәбәрләре» газетасы яза.

Гыйнвар аенда Татарстанның төрле районнарында айлык номаның 150-180 проценты күләмендә явым-төшем күзәтелгән. Мондый нәтиҗәгә соңгы бураннар да зур өлеш кертте. «Метео» фаразлау үзәге җитәкчесе Александр Шувалов «Татар-информ» агентлыгына шул хакта хәбәр итте.

«Тормыш өчен инфраструктура» илкүләм проекты буенча Казан агломерациясендә быел 6,8 чакрымнан артык озынлыкта төбәк юлларына һәм озынлыгы 7,6 чакрымнан артык тәшкил иткән җирле юлларга ремонт ясалачак. Барлыгы 14 чакрым озынлыктагы 19 юл объекты төзекләндереләчәк, дип хәбәр итә ТР Транспорт һәм юл хуҗалыгы министрлыгы матбугат хезмәте.

Тукай үзәк район хастаханәсендә махсус хәрби операциядә катнашучылар өчен диспансеризация узуның гадиләштерелгән тәртибе – «яшел коридор» гамәлдә, ул тикшеренүне чиратсыз һәм алдан язылмыйча үтү мөмкинлеген тудыра.

Поездга билет сатып алган пассажир, состав соңга калган очракта, транспорт предприятиесеннән зыянны компенсацияләүне таләп итәргә хокуклы. Юрист Алла Георгиева «Татар-информ» агентлыгы журналисты белән әңгәмәсендә шул хакта сөйләде.

Иртәгә, 4 февральдә, беренчел күчемсез милеккә ихтыяҗ арту сәбәпле, Татарстан буенча Росреестр идарәсе яңа төзелгән йортларда фатир сатып алучылар – өлешле төзелештә катнашучылар өчен кайнар телефон линиясе үткәрә. Бу хакта ведомствоның матбугат хезмәте хәбәр итә.

Гыйнвар ахырында «Син уенда» Бөтенроссия спорт проектлары конкурсының VI сезоны башланды.

Россиядә икътисад үсеше темпларын торгызуга ирешергә кирәк. РФ Президенты Владимир Путин 2026 елда икътисади мәсьәләләр буенча беренче киңәшмәдә шулай дип белдерде. Бу хакта Кремльнең матбугат хезмәте хәбәр итә.

Бүген Идел буе судында Казаннан танылган турагенты Анжела Мусинага карата эш материалларын укыдылар. Тикшерү версиясе буенча, ул клиентлардан юллама өчен акча алган, әмма аларга ял итү насыйп булмаган. Моның урынына Мусина акчаны үз кесәсенә салган.

2025 елда Россия икътисады 1 процентка үсте. РФ Президенты Владимир Путин 2026 елда икътисади мәсьәләләр буенча беренче киңәшмәдә шулай дип белдерде.

Балык Бистәсе районында яшәүче ир-атны бер елга якын алимент түләмәгәне өчен 7 айга колония-поселениегә хөкем иттеләр.

Яңа федераль закон буенча, IX сыйныфтан соң Төп дәүләт имтиханын тапшыра алмаган укучыларга да махсус урта һөнәри уку йортларында белем алу мөмкинлеге тудырылачак. Республикада аттестатсыз кабул итәчәк 23 көллият-техникум билгеләнгән.

Совет һәм Россия дикторы Светлана Жильцова 89 яшендә вафат булган, дип хәбәр итә Беренче канал.

Татарстан – X сыйныфтан соң ике имтихан (математика, рус теле) тапшырып, көллият-техникумнарга укырга керү буенча экспериментта катнашучы төбәкләрнең берсе. Әлеге тәҗрибә өчен махсус урта һөнәри уку йортлары билгеләнгән. Исемлектә барлыгы – 51 көллият. Тик ике имтихан тапшырып кына X сыйныфта калып булмаячак. Татарстан мәгариф һәм фән министрының беренче урынбасары Рәмис Мөҗипов экспериментның нечкәлекләрен аңлатты.

Татарстан аша узучы М-5 трассасының дүрт участогында, һава торышы начар булу сәбәпле, автобуслар, йөк машиналары һәм таксилар хәрәкәтен чикләделәр.

Алдагы ункөнлектә Татарстанда температураның тискәре аномалиясе көтелә, ул -5-6 градус тәшкил итәчәк. «Метео» фаразлау үзәге җитәкчесе Александр Шувалов «Татар-информ» агентлыгына шул хакта хәбәр итте.

«Физика-химия алгарышы» проекты кысаларында мәктәпләрдә физика һәм химия буенча күчмә лабораторияләр эше оештырылачак. Бу хакта бүген ТР Министрлар Кабинетында Россия Фәне көненә багышланган брифингта республиканың мәгариф һәм фән министры Илсур Һадиуллин сөйләде.

2026 елда Россия икътисады 1-1,2 процентка үсәчәк, ә илдә инфляция 4-4,5 процент дәрәҗәсендә булачак. РФ вице-премьеры Александр Новак Федерация Советының Икътисади сәясәт комитеты утырышында шундый фаразлары белән уртаклашты. Бу хакта ТАСС агентлыгы хәбәр итә.

Юл хезмәтләре Татарстан торак пунктлары ишегалларын һәм урамнарын кардан чистартырга да өлгермәде, төбәккә чираттагы бураннар якынлаша. «Метео» фаразлау үзәге җитәкчесе Александр Шувалов «Татар-информ» агентлыгына шул хакта хәбәр итте.

«Татар-информ» мәгълүмат агентлыгы «Ядкярләрдә Тукай рухы» әдәби конкурсында җиңү яулаган катнашучыларның эшләрен тәкъдим итә. Әдәби бәйге Татарстан Республикасы Милли музее һәм Габдулла Тукай әдәби музее тарафыннан оештырыла. Әлеге эшләр беренче тапкыр матбугатта тәкъдим ителә.

Һиндстанда Нипах вирусы ачыкланган. Татарстан территориясендә әлеге вирус таралырга мөмкинме-юкмы икәнлеге турында «Татар-информ» агентлыгында узган матбугат очрашуында сөйләделәр.

Гыйнвар аенда Татарстанның көнбатыш районнарында иң күп кар яуган. Казанда айлык норманың – 150 проценты, Арчада 200 проценты күләмендә, ә Түбән Карамалыда тагын да күбрәк кар яуган. ТР Гидрометеорология һәм әйләнә-тирә мохитне күзәтү идарәсе башлыгы Феликс Гоголь «Татар-информ» агентлыгына шул хакта хәбәр итте.

Казанда Бәшир Рәмиев исемендәге IT-паркта «Фәнни алгарыш» премиясен тапшыру тантанасы 11 февральдә узачак. Татарстан Фәннәр академиясе президенты Рифкать Миңнеханов бүген ТР Министрлар Кабинетында узган брифингта шул хакта хәбәр итте.

Яшел Үзән суды машина йөртүче Евгений Яшинга карата хөкем карары чыгарды. Суд аны автомобиль белән исерек килеш идарә итүдә гаепле дип тапты, элек ул административ җәзага тартылган булган инде.

Альбина Шаһиморатова – бүгенге көндә дөнья опера сәнгатенең иң якты йолдызларының берсе, уникаль һәм сирәк очрый торган тавыш иясе. Ул – Зальцбург фестивалендә маэстро Риккардо Мути тарафыннан Төн патшабикәсе роленә сайлап алынып, бер төндә дөньякүләм танылу алган җырчы.