Новости за 17.02.2026

Татарстанда көчле кар явулардан соң барлыкка килгән кар көртләренең биеклеге 95 сантиметрга җиткән. Бу хакта «Фобос» һава торышы үзәгенең әйдәп баручы белгече Евгений Тишковец хәбәр итте. Мондый күрсәткечләр Яшел Үзән районының Карамалы Тау шәһәр тибындагы бистәсендә теркәлгән. Бу – илдәге иң зур күрсәткечләрнең берсе. Синоптикның сүзләрен РИА Новости китерә.

Татарстан Сәнәгать һәм сәүдә министрлыгы коллегиясендә ел саен үткәрелә торган «Ел инновациясе – 2025» республика конкурсында «Технологик компания» номинациясендә җиңүчеләрне бүләкләделәр. Бүләкләрне РФ сәнәгать һәм сәүдә министры урынбасары Альберт Кәримов тапшырды.

Дәүләт Думасының вице-спикер Владислав Даванков җитәкчелегендәге депутатлары югары уку йортларында ял һәм эшләми торган бәйрәм көннәрендә имтиханнар уздыруны тыярга тәкъдим итте. Мөрәҗәгать фән һәм югары белем министры Валерий Фальков исеменә юлланган, дип хәбәр итә РИА Новости.

Казанның Ислам мәдәнияте музеенда дини темага шигырьләр язучы заманча авторлар белән очрашу узачак. Шагыйрьләр – Муса Җәлил исемендәге республика премиясе лауреаты Рифат Сәлах, Шәйхи Маннур һәм Гамил Афзал исемендәге премияләр лауреаты Фәнил Гыйләҗев, шулай ук «Болгар» радиосында «Хак дин» тапшыруын алып баручы Фаил Гыймадов үзләренең иҗаты һәм дингә багышланган шигырьләре белән уртаклашачак. Бу хакта Милли китапханәнең матбугат хезмәте хәбәр итте.

Халыкара туган тел көнен 1999 елда ЮНЕСКО гамәлгә куйган. Шуннан бирле бу бәйрәм ел саен 21 февральдә билгеләп үтелә. Татарстан Республикасы Милли китапханәсе бәйрәм уңаеннан махсус программа әзерләгән. Бу хакта китапханәнең матбугат хезмәте хәбәр итә.

Февраль башыннан бүгенге көнгә кадәр Казанда 70 миллиметрдан артык кар яуган. Бу – ике айлык норма. Бу хакта «Татар-информ»га ТР Гидрометеорология үзәге башлыгы Феликс Гоголь хәбәр итте.

Герой-шагыйрь Муса Җәлилнең 120 еллыгына багышланган «Җәлил укулары» бөтенроссия фәнни конференциясе Казанда 25-27 февральдә узачак. Чараны Татарстан Республикасы Мәдәният министрлыгы һәм КФУның Филология һәм мәдәниятара багланышлар институты ярдәмендә Татарстан Республикасы Милли музее оештыра. Бу хакта ТР Мәдәният министрлыгы матбугат хезмәте хәбәр итә.

Казанда узган тәүлектә юлларны кардан чистартуга 1 мең 197 берәмлек махсус техника һәм 648 юл эшчесе чыккан. Бу хакта Казан шәһәре мэриясе матбугат хезмәте хәбәр итте.

Татарстанда йорт хайваннары тотучылар 62,8 меңнән артык этне рәсми рәвештә теркәгән. Бу хакта Татарстан Республикасы Министрлар Кабинетының Баш ветеринария идарәсе матбугат хезмәте хәбәр итә.

Алабуга үзәк район хастаханәсе стационарында капиталь ремонттан соң православие һәм ислам динен тотучылар өчен гыйбадәт кылу бүлмәләре эшли башлады. Бу хакта район башлыгы Рөстәм Нуриев хәбәр итте.

Режиссер Радик Кудояровның «Кара урман» тулы метражлы нәфис фильмы прокатка чыкты. Рәсми премьерага бер көн кала аны Казанның «Мир» кинотеатрында күрсәттеләр, анда шулай ук режиссер һәм төп рольне башкаручы катнашында картина турында фикер алышу узды.

Көчле кар явудан соң Татарстанга салкыннар килә. Бу хакта «Татар-информ»га бүген ТР Гидрометеорология үзәге башлыгы Феликс Гоголь хәбәр итте.

Казанның барлык уку йортлары 18 февральдән янәдән гадәти эш форматына кайта. Бу хакта шәһәр мэриясенең матбугат хезмәте хәбәр итә.

Татарстанда ОРВИ һәм грипп сезоны дәвам итә. Февральнең икенче атнасында 12 635 кеше авырган, дип хәбәр итә Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсе матбугат хезмәте.

Татарстан Рәисе Рөстәм Миңнеханов ТР Сәнәгать һәм сәүдә министрлыгы коллегиясендә «Түбән Кама Нефтехим» ремонт заводына сәфәренең нәтиҗәләре турында сөйләде. Аның сүзләренә караганда, предприятие масштабы һәм мөмкинлекләре буенча тулы көчкә эшли торган завод булып тора, ул теләсә нинди эшләнмәләр җитештерә ала.

Кичә һәм узган төн дәвамында Казанда 17 миллиметр кар яуган. Яшел Үзән районының Вязовые бистәсендә рекордлы 19 миллиметр кар теркәлгән. Бу хакта «Татар-информ»га бүген ТР Гидрометеорология үзәге башлыгы Феликс Гоголь хәбәр итте.

Бүген Түбән Каманың Химиклар проспектында күп фатирлы йортларның берсендә янгын чыккан. Янгын сүндерүчеләр утны сүндергәндә ике зур кешенең мәетен тапкан. Аларның шәхесләре ачыклана. Бу хакта ТР прокуратурасы матбугат хезмәтендә хәбәр иттеләр.

Татарстан Республикасының Россиядәге тулы вәкаләтле вәкиллегендә Россия Федерациясендә Тунис эшләре буенча вакытлыча ышанычлы вәкил Мөхәммәд Мехрез Отман белән очрашу узды. Аны Татарстан Премьер-министры урынбасары – Татарстанның Россиядәге тулы вәкаләтле вәкиле Равил Әхмәтшин кабул итте. Бу хакта тулы вәкаләтле вәкиллек матбугат хезмәтендә хәбәр иттеләр.

ТР Рәисе Рөстәм Миңнехановның матбугат хезмәтендә ике тапкыр Стэнли Кубогы иясе булган Фил Эспозитоның Казанга кабат килергә теләве турындагы белдерүенә җавап бирделәр.

Татарстанда яшь ана югалганнан соң җинаять эше ачылды. Тикшерү барышы турында Россия Тикшерү комитеты башлыгы Александр Бастрыкинга хәбәр итәчәкләр. Бу хакта ведомствоның матбугат хезмәте хәбәр итә.

“Первый отдел” оешмасы юристы Евгений Смирнов сүзләренчә, төзәтмәләр кабул ителгәннән соң, элемтәне томалау сәбәпләре чикләнмәячәк.

Бөтендөнья татар яшьләре форумы Татарстан Республикасы мөселманнары диния нәзарәте белән берлектә Рамазан ае уңаеннан «Онлайн Рамазан» проектын башлап җибәрә. Проект кысаларында ай дәвамында көн саен «ВКонтакте» һәм «Telegram» платформаларында подкаст форматында туры эфирлар узачак. Һәр чыгарылышта танылган дин әһелләре, җәмәгать эшлеклеләре, эшмәкәрләр, яшьләр лидерлары һәм экспертлар катнашуы көтелә. Бу хакта бүген «Татар-информ»да узган матбугат очрашуында хәбәр иттеләр.

19 февральдә 11:00 сәгатьтә Татарстан Республикасы Милли музеенда татар шагыйре Фатих Кәримнең иҗатына һәм тормышына багышланган «Шагыйрь дә, солдат та» дип исемләнгән күргәзмә ачыла. Чара шагыйрьне искә алу көненә багышланачак. Фатих Кәрим 1945 елның 19 февралендә һәлак булган. Бу хакта Татарстан Милли музее телеграм-каналында хәбәр итте.

Татарстанның халык шагыйре Зиннур Мансуров язучы, шагыйрь, драматург, әдәбият галиме Галимҗан Гыйльмановның «Тукайның мең сере» китабын тәкъдим итү кичәсендә катнашты. Ул китапны бәяләде һәм Габдулла Тукай турында фикерләрен әйтте.

Дәүләт Думасы депутаты Виталий Милонов мәктәп программасына яңа фәннәр кертүгә каршы булуын әйтте. Бигрәк тә югары сыйныфларда яңа фәннәр кертергә кирәкми, чөнки балаларга йөкләнеш болай да бик зур, дип белдерде ул. Депутат үз фикерен «Татар-информ» белән әңгәмә барышында аңлатты.