Новости за 30.12.2023

Сабаның аграр көллият территориясен гигант кар сыннары бизи. Монда нәрсә генә юк, арыслан, балалары белән кош, чәйнек белән чәшкеләр, ата белән ул, ана белән бала, Кар бабай гаиләсе һ.б. сыннар урын алган. Бу хакта http://saby-rt.ru хәбәр итә.

Зәй район башкарма комитеты җитәкчесе Эмиль Галиев «Теләкләр чыршысы» акциясендә катнашты. Ул чыршыдан Тимур Сәламовның Яңа ел теләге язылган хатын алды. Һәм Тимур теләгән бүләкне малайның фатирына илтеп үзе тапшырды. Бу хакта «Зәй яңалыклары» хәбәр итә.

Яңа ел алдыннан Чаллы мэры Наил Мәһдиев Мөхәммәтовлар гаиләсендә булды. Ул бала тудырганда гомере өзелгән Алена Мөхәммәтованың балаларына даими рәвештә рухи һәм матди ярдәм итә. Бу хакта «Шәһри Чаллы» хәбәр итә.

2023 елның соңгы көне, 31 декабрьдә, Татарстанда кабат һава шартлары начарлануы көтелә. Бу хакта Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Татарстан Рәисе Рөстәм Миңнеханов Teлеграм-каналында шаян видеоролик куйды һәм Яңа ел алдыннан язылучыларының кәефе белән кызыксынды.

Түбән Новгород өлкәсенең «Туган як» газетасының «ВКонтакте» челтәрендә сәхифәсендә «Яңа ел чаралары» дигән программа чыкты.

Россия Хөкүмәте «Росавтодор» федераль юл агентлыгы ил субъектлары территорияләрендә автомобиль юлларын капиталь ремонтлау буенча чараларны алдан гамәлгә ашыруны тәэмин итүгә 10 миллиард сум бүлеп бирүне хуплады. Бу хакта РИА Новости Россия Министрлар Кабинеты сайтына сылтама белән хәбәр итә.

Бүген иртән Татарстан буенча Эчке эшләр министрлыгы подразделениеләре җитәкчеләренең Яңа ел алды җыелышында ведомство җитәкчесе Артем Хохорин отставкага китүе турында рапорт бирүен игълан итте.

«Безгә яңа бирелгән бинаның бер өлешендә балалар бакчасы белән мәдрәсә булачак. Анда көрәшләр, ярышлар үткәрү өчен спорт залы да бар. Актлар залында татар җырларын яңгыратырбыз», - диде Рафаэль Нәҗметдинов.

Махсус хәрби операциядә катнашучыларның туганнарын Апаста Яңа ел белән котладылар һәм бәйрәм бүләкләре тапшырдылар. Апасның Табар-Черкене авылында яшәүче Нина һәм Сергей Баранов-Орловларның улы Сергей махсус операциядә һәлак булган. Нина ханым кайгы килгәндә үзен генә калдырмаулары өчен рәхмәт белдерде, дип яза «Татар-информ».

Россия Президенты Владимир Путин Сербия коллегасы Александр Вучичка һәм Венгрия Премьер-министры Виктор Орбанга якынлашып килүче Яңа ел белән котлау җибәрде. Кремль сайтында хәбәр ителгәнчә, Европаның хәзерге лидерларыннан бу ике ил вәкиленә генә телеграмма юлланган, дип яза «Татар-информ».

Түбән Новгородта Халыклар бердәмлеге йортында милли-мәдәни оешмаларның 2023 елгы эшенә йомгак ясауга багышланган тантаналы чара булды. Бу хакта Түбән Новгород өлкәсе татарлары милли-мәдәни мохтариятенең «ВКонтакте» социаль челтәрендәге сәхифәсендә хәбәр ителә.

Татарстан Рәисе Рөстәм Миңнеханов шефлыкка алынган Лисичанск һәм Рубежное шәһәрләрендә яшәүче балалар өчен «Теләкләр чыршысы» бөтенроссия акциясе кысаларында Яңа ел күчтәнәчләре җибәргән татарстанлыларга рәхмәт белдерде.

Казанның Бауман урамындагы Матбугат йорты бинасында яңадан төзелеш эшләре була. Анда урнаштырылган өч йолдызлы кунакханә комплексына 4нче йолдызны өстәргә планлаштыралар. Мәдәни мирас объектының заманча проектына экспертиза уңай нәтиҗә бирде.

Россиядә 2024 елда РФ Президентын сайлауда Владимир Путинның үзен-үзе тәкъдим итүен хуплап 500 меңнән артык имза җыйдылар. Бу хакта ТАСС хәбәр итә.

30 декабрь көнне 22.35 сәгатьттә Үзбәкстанда 103.1 дулкыннарында «O»zbekiston» телерадиоканалында «Бәллүр чишмә» тапшыруы була. «Яңа елны каршылап» бәйрәм программасында М.Улугбек исемендәге университет каршында КФУның Каюм Насыйри институтының мәдәни-белем бирү үзәгендә татар теле курслары укучылары катнаша. Бу турыда Ташкент шәһәре иҗтимагый мәдәни-мәгърифәти үзәге телеграм-каналында хәбәр ителә.

Татарстан Республикасы Рәисе Рөстәм Миңнеханов Яңа 2024 ел белән котлады.

Кичә «Скат» авиакомпаниясенең Казан-Тараз маршрутындагы 454нче рейсы тоткарланган. Бу хакта Идел буе транспорт прокуратурасында хәбәр иттеләр.

Яңа ел бәйрәмнәре вакытында тормыш иминлеген тәэмин итә торган барлык хезмәтләр югары әзерлек режимында булырга тиеш. Бу хакта Татарстан Премьер-министры Алексей Песошин Хөкүмәт Йортында узган киңәшмәдә әйтте. Татарстан Рәисе матбугат хезмәте шул турыда хәбәр итә.

Пенза өлкәсе Татар милли-мәдәни мохтарияте каршындагы «Ак калфак» татар хатын-кызлары төбәк оешмасы утырышы булды. Бу хакта мохтариятнең «Вконтакте» социаль челтәрендәге сәхифәсендә хәбәр ителә.

Татарстан Рәисе Рөстәм Миңнеханов республиканың Экспорт советы составын үзгәртте. Бу хактагы карар хокукый мәгълүматның рәсми порталында чыкты.

Самараның «Бердәмлек» газетасында «Яктылык» мәктәбе директоры Радик Газизовның «Сәләй Вәгыйзов шәкерте ул» дигән язмасы чыкты.

Шимбә, 30 декабрьдә, Татарстан территориясендә җепшек кар көтелә, урыны белән күп итеп явачак. Бу хакта Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Яңа ел алды көннәре Кайбычның Кыр Буасы авылында яшәүчеләр хәтерендә иң шатлыклы вакыйга булып калачак. Чөнки биредә, капиталь ремонттан соң, авыл клубы файдалануга тапшырылды. Клуб район бюджетыннан төзекләндерелде. Заманча төзелеш материаллары белән ремонтланган мәдәният учагы бик матур килеп чыккан. Бу хакта «Кайбыч таңнары» хәбәр итә.

Әтиләре махсус хәрби операциядә булган мәктәпкәчә яшьтәге балалар өчен Саба урта мәктәбендә Яңа ел бәйрәме үткәрелде. Бу хакта http://saba-rt.ru/ хәбрә итә.