Новости за 23.12.2023

Әгерҗенең Пеләмеш авылында яшәүче Ирина һәм Владимир Осиповлар ел саен Яңа ел алдыннан йорт тирәсен кар сыннары белән бизи. Бу юлы алар Яңа ел символы – аҗдаһа сыны ясарга җыена. Бу хакта «Әгерҗе хәбәрләре» сайтында хәбәр ителә.

Алабуганың тарихи өлешен үстерүгә республика бюджетыннан 50 миллион сум акча бүлеп биреләчәк. Бу суммага 20 миллион сумны муниципалитет та өстәячәк. «Алабуга нуры» шул хакта яза.

Апас районы Каратун мәктәбе коллективы махсус хәрби операциядәге хәрбиләргә оештырыла торган ярдәмнән читтә калмаска тырыша. Хәрби дә үзенә хат язган укучыга Яңа ел бүләге җибәргән. Бу хакта «Апастово-информ» хәбәр итә.

Бүген район мәдәният йортында физик мөмкинлеге чикле балалар өчен Яңа ел бәйрәме үткәрелде. Район башлыгы Сергей Димитриев балаларны һәм аларның әти-әниләрен якынлашып килүче Яңа ел бәйрәме белән котлады, изге теләкләрен җиткерде. Бу хакта «Хезмәт даны» газетасы сайтында хәбәр ителә.

Татарстан Рәисе Рөстәм Миңнеханов гвардия капитаны Айнур Сафиуллинны Россия Федерациясе Герое исеме белән котлады.

Россиядә хезмәт эшчәнлеген үзмәшгуль булып дәвам итүче пенсионерлар кайбер ташламалардан мәхрүм калырга мөмкин. Бу хакта «Труд» газетасы «Югары икътисад мәктәбе» илкүләм тикшеренү университетының хокук факультеты деканы Вадим Виноградовка сылтама белән хәбәр итә.

Россиядә ташламалы ипотекага кагылышлы үзгәрешләрнең күпчелеге яңа төзелгән йортларга кагыла. Программа буенча беренче минималь кертем 20 проценттан 30 процентка арттырылды. Хәзер барлык төбәкләр өчен кредитның максималь күләме 6 млн сум (башкала төбәкләре өчен 12 млн сум иде) тәшкил итә. Шул ук вакытта максималь ставка 8 процент кала. Бу хакта «Российская газета» хәбәр итә.

Россия Президенты вазифасына Владимир Путин кандидатурасын хуплап Татарстанда имза җыя башладылар. Дәүләтнең хәзерге башлыгын киләсе срокка тәкъдим итүне Казан, Чаллы, Түбән Кама, Әлмәт һәм Яшел Үзән шәһәрләрендәге зур сәүдә үзәкләрендә хупларга мөмкин.

Бүген һәм иртәгә Татарстан территориясендә һава шартлары начарлануы турында фаразлана. Бу хакта Татарстан Гидрометеорология һәм әйләнә-тирә мохитне күзәтү үзәге хәбәр итә.

Татарстанның Зәй районында өч автомобиль катнашында юл-транспорт һәлакәте булган. Бу хакта «Татар-информ»га шаһитлар хәбәр итте.

Россия мөселманнары Диния нәзарәтеннән илнең яңа территорияләрендә хезмәт итүчеләргә чираттагы хәйрия ярдәме барып җитте. Бу хакта Россия Мөфтиләр шурасы хәбәр итә.

Россиядә 140 мең тоннага кадәр күләмдә туңдырылган йорт тавыгы итен кертүгә таможня пошлиналары 1 елга гамәлдән чыгарылды. РФ Хөкүмәте карарын Россия Премьер-министры Михаил Мишустин имзалады.

Татарстан «Һөнәре буенча иң яхшы» конкурсы федераль этабын уздыру өчен мәйданчыкларның берсе итеп сайланды. «Иң яхшы химик анализ лаборанты» номинациясе буенча ярышлар «Алабуга Политех» көллияте мәйданчыгында оештырылачак. Бу хакта Татарстан хезмәт, халыкны эш белән тәэмин итү һәм социаль яклау министрлыгының матбугат хезмәте хәбәр итә.

«Туган авылым» комплексында үтүче «Каз өмәсе» ярминкәсендә каз бәлеше ясау һәм каз тутыру буенча остаханә күрсәттеләр.

Татарстанда 2023 елга торак төзелеше планы 8,6 процентка арттырып үтәлде. Бу хакта төбәк Хөкүмәте Йортында узган традицион киңәшмәдә Татарстан төзелеш, архитектура һәм торак-коммуналь хуҗалык министры Марат Айзатуллин сөйләде. Бу хакта республика җитәкчесенең матбугат хезмәте хәбәр итә.

Үзбәкстанда Татарстан киносы көннәре кысаларында Ташкент тамашачыларына режиссер Юлия Захарованың 2021 елда төшерелгән «Тарлан» фильмы тәкъдим ителде. Бу хакта Бөтендөнья татар конгрессы матбугат хезмәте хәбәр итә.

Казанның «Туган авылым» комплексында «Каз өмәсе» ярминкәсе үтә. Ярминкәдә фермер продукцияләре тәкъдим ителде.

Татарстан Рәисе Рөстәм Миңнеханов республика Хөкүмәте Йортында узган традицион киңәшмәдә халык арасында газ җиһазлары белән саксыз куллануга карата аңлату эшләрен көчәйтергә кушты. Бу хакта республика җитәкчесенең матбугат хезмәте хәбәр итә.

Яңа ел бәйрәмнәре килү белән кибермошенниклар активлаша, ә алдауның төп ысулларының берсе булып китереп бирү хезмәтләреннән ялган хатлар җибәрү тора. Бу хакта РИА Новостига «EdgeЦентр» кибериминлек директоры Артем Избаенков сөйләгән.

Һава температурасының кискен үзгәрүе сәбәпле, күп фатирлы йортларның һәм башка биек биналарның түбәсеннән кар төшү куркынычы арта. Бу хакта бүген Татарстан Хөкүмәте Йортында узган традицион киңәшмәдә республика Рәисе Рөстәм Миңнеханов искәртте. Татарстан җитәкчесенең матбугат хезмәте шул хакта хәбәр итә.

Дөньяда СОVID-19 авыручылар саны алдагы ай белән чагыштырганда 52 процентка арткан. Бу хакта «Российская газета» Бөтендөнья сәламәтлек саклау оешмасына сылтама белән хәбәр итте.

«Без тыю мөмкин түгеллеген аңлыйбыз! Әгәр шәхси клиниканың лицензиясе бар икән, бу операцияне ясауның барлык этаплары да тиешенчә үтәлсә, ул була, ә сайлау һәрвакыт хатын-кыз ягында». Абортларны тыю темасын Татарстан хезмәт, халыкны эш белән тәэмин итү һәм социаль яклау министры Эльмира Зарипова шулай шәрехләде.

Бүгенге көннән башлап Россия Федерациясенең хәзерге Президенты Владимир Путин сайлау штабы волонтерлары Гомумроссия халык фронты һәм «Бердәм Россия» партиясе бүлекләре белән дәүләт башлыгын сайлауда сәясәтченең үз кандидатурасын тәкъдим итүен хуплап имза җыя башлый. Бу хакта ТАСС хәбәр итә.

Менделеевскида Татарстан Фәннәр академиясе ярдәме белән мәктәп укучыларының Кече академиясе ачылды. Ул «Менделеев варислары» 3нче химия-технология лицее базасында оештырылган.

«Ахмат» махсус отряды командиры Апти Алаудинов Телеграм-каналында Татарстанның башкаласы – Казанга багышланган видео күрсәтте. Роликка #Россия_великая_участвует_страна хештегы куелган, анда Россиянең башка шәһәрләре дә, шул исәптә Нальчик, Самара, Мурманск, Уфа тәкъдим ителгән.