Новости за 09.12.2023

Лениногорскиның ЗАГС бүлегендә махсус хәрби операциядә катнашучы ир-ат сөйгәне белән никахын рәсми рәвештә теркәгән. Хәрби хәзерге вакытта ялга кайткан һәм сөйгәне белән мөнсәбәтләрен законлаштырды. Бу хакта «Заман сулышы» хәбәр итә.

Волонтерлар барлык чараларда актив катнашалар, ихластан хәйриячелек итә, ялгыз картларга, мохтаҗларга, ятимнәргә ярдәм итәргә ашыга. Әлеге дата уңаенан Чүпрәле районы башлыгы Марат Гафаров шундый игелекле кешеләрне Рәхмәт хатлары белән бүләкләде. Бу хакта «Туган як» сайтында хәбәр ителә.

Чаллы табиблары инфаркт кичергән 73 яшьлек ир-атның гомерен саклап калган. Аның йөрәге минутына 200 тапкыр типкән. Пенсионерның бу өченче инфаркты. Янында тормыш иптәше булган, ашыгыч ярдәм күрсәтү машинасын чакырткан. Бу хакта «Шәһри Чаллы» хәбәр итә.

Махсус хәрби операция зонасында хәрби бурычны үтәгәндә һәлак булган Владимир Воркуновның исемен мәңгеләштереп, Аксубайның Сөнчәле мәктәбендә истәлек тактасы ачу митингы узды. Бу хакта «Авыл таңнары» сайтында хәбәр ителә.

«Бердәм Россия» партиясенең иңнәрендә зур җаваплылык ята, чөнки илдә масштаблы дәүләт проектларын нәтиҗәле башкарырга сәләтле башка сәяси көч юк. Бу хакта Татарстан Республикасы Рәисе Рөстәм Миңнеханов партиянең Татарстан бүлекчәсенең XXXV конференциясендә белдерде.

Татарстан Дәүләт Киңәшчесе Минтимер Шәймиевкә «Бердәм Россия» партиясе рәисе, Россия Федерациясе Иминлек советы рәисе урынбасары Дмитрий Медведевтан Рәхмәт хаты тапшырылды. Бүләкләү бүген, идарә итүче партиянең Татарстан бүлекчәсенең Казанда узган XXXV конференциясендә булды.

Алдагы елның март аенда Россиядә ил Президентын сайлау белән зур сайлау циклы узачак. Кичә Владимир Путин киләсе срокка тәкъдим ителү турында игълан итте. Татарстан гамәлдәге дәүләт башлыгын тулысынча хуплый, һәм республика халкы дөрес сайлау ясаячак. Бу хакта «Бердәм Россия» партиясенең Татарстан бүлекчәсе XXXV конференциясендә Татарстан Республикасы Рәисе Рөстәм Миңнеханов әйтте.

19-21 гыйнварда Екатеринбургта «Щелкунчик» балалар балет театры сәхнәсендә Буа театрының иң яхшы спектакльләре тәкъдим ителә. Бу хакта Татарстанның Свердловск өлкәсендәге Даими вәкиллеге матбугат хезмәте хәбәр итә.

Татарстан Рәисе Рөстәм Миңнеханов күренекле татарстанлыларга Россия һәм Татарстан Дәүләт бүләкләрен, республика җитәкчесенең Рәхмәт хатларын тапшырды. Ватан Геройлары көненә багышланган кабул итү Казан Кремленең Туп сарае ишегалдында узды.

Россия алдында торган каршылыкларны көчле җитәкче белән генә җиңеп була. Бу хакта Татарстан Республикасы Рәисе Рөстәм Миңнеханов Казан Кремлендә узган Ватан Геройлары көненә багышланган тантанада белдерде.

Россия Президенты Владимир Путинның мәгариф системасына игътибары бу өлкәдә уңай үзгәрешләргә, шул исәптән, яңа мәктәпләр төзелеше һәм эшче һөнәрләренең абруе күтәрелүгә китерде. Татарстан һөнәри компетенцияләрне үстерү үзәге генераль директоры Эмиль Гобәйдуллин «Татар-информ» белән сөйләшкәндә шундый фикер белдерде.

Татарстан Рәисе Рөстәм Миңнеханов республика Премьер-министры Алексей Песошинны юбилее белән котлады. Бүген, 9 декабрьдә, республика Хөкүмәте башлыгына 60 яшь тулды.

Татарстан Рәисе Рөстәм Миңнеханов Хөкүмәт йортында узган киңәшмәдә татарстанлыларны бөтен Россиядә билгеләп үтелә торган Ватан Геройлары көне белән котлады. Бу хакта республика җитәкчесе матбугат хезмәте хәбәр итә.

Кискен хәлләр Россия халкын берләштерә, шуңа күрә безне җиңеп булмый. Бу хакта Ватан Геройлары көненә багышланган тантанада Татарстан Республикасы Дәүләт Киңәшчесе Минтимер Шәймиев әйтте.

2023 елның 8 декабрендә Мәскәүнең Дәүләт Кремль сараенда “Бие һәм җырла, Россиям минем” фестиваленең гала концерты булып узды. Бу хакта ТР Мәдәният министрлыгының телеграм-каналында хәбәр ителә.

Татарстан Рәисе Рөстәм Миңнеханов кышкы салкыннарда инфраструктура объектлары эшчәнлеген контрольдә тотуны арттырырга кушты. Бу хакта ул Хөкүмәт Йортындагы киңәшмәдә әйтте.

Әгерҗе районында термометр баганалары -51 градус салкынны теркәгән. Бу хакта Тирсә авылында яшәүче Гөлназ Ягъфәрова хәбәр итте.

Казан Кремлендә Ватан Геройлары көненә багышланган тантаналы кабул итү узды, анда Татарстан Республикасы Рәисе Рөстәм Миңнеханов катнашты. Ул махсус операция зонасында хәрби бурычын үтәгәндә һәлак булган хәрбиләр истәлегенә бер минут тынлык игълан итте.

2023 елның гыйнвар-октябрь айларында Татарстанда 31,7 меңнән артык үлем очрагы теркәлгән. Күрсәткеч узган ел белән чагыштырганда 2187 гә түбәнрәк. Бу хакта Федераль дәүләт статистикасы хезмәтенең Татарстан Республикасы территориаль органы әзерләнгән «Татарстанда социаль-икътисадый хәл» докладында хәбәр ителә.

Россиядә пациентларга онкоскрининг үткәрүгә табибларны стимуллаштыру чаралары нәтиҗәлелеген арттырачаклар. Россия Президенты Владимир Путин ярдәм вариантларын, шул исәптән белгечләрне финанс яктан кызыксындыруны арттыру вариантын карарга кушты.

Казанда Россия халыкларының яңа мәдәни мирас объекты ачылды. Реестрга Маяковский урамында урнашкан Сомов йортын кертергә карар ителә. Тарихи-мәдәни экспертиза нәтиҗәләрен Татарстан Мәдәни мирас объектларын саклау комитеты чыгарды.

Татарстан Рәисе Рөстәм Миңнеханов Халыкара ришвәтчелеккә каршы көрәш көне уңаеннан республика халкына мөрәҗәгать итте.

Татарстанда урнашкан аномаль салкын һава торышы киләсе атнада да дәвам итәчәк. Республиканың Гидрометеорология үзәге биргән беренчел фараз шул хакта сөйли.

Татарстан Премьер-министры Алексей Песошин республика халкын Ватан Геройлары көне белән котлады.

«Сабантуй» һәм «Салават күпере» журналлары тарафыннан оештырылган «Ихлас» мультимедиа мәктәбенең беренче чыгарылышына нәтиҗә ясалды. Остазларны һәм җиңүче шәкертләрне бүләкләү тантанасы «Адымнар» мәктәбендә узды.