Новости за 11.12.2023

Балтачның Иске Салавыч авылы кызы Айгөл Шакирҗанова Ирландия биюләре буенча Россия ачык чемпионатында катнашты. Ул алты төрле номинациядә беренче урын яулап кайтты. Бу хакта «Хезмәт» сайтында хәбәр ителә.

Татарстан республикадан чыккан авторларның барлык мәдәни проектларына мәйданчык бирергә әзер. Бигрәк тә эшчәнлеге татар мәдәнияте белән бәйле булган осталар өчен. Бу хакта ТР Мәдәният министрлыгы җитәкчесе Ирада Әюпова Татарстанның Россиядәге Тулы вәкаләтле вәкиллеге каршындагы мәдәният һәм сәнгать эшлеклеләре клубы әгъзаларының еллык очрашуында белдерде.

11 декабрьдә Мәскәүдә «Фәезханов укулары» ХХ Бөтенроссия фәнни-гамәли конференциясе башланды. Аны Россия мөселманнары Диния нәзарәте, Мәскәү ислам институты, Санкт-Петербург дәүләт университетының Ислам тикшеренүләре үзәге, Россия Фәннәр академиясенең Көнчыгышны өйрәнү институты оештыра. Бу хакта Россия Мөфтиләр шурасы хәбәр итә.

Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев эш сәфәре белән Башкортстан Республикасында, дип хәбәр итә конгресс матбугат хезмәте.

«Идел-йорт» бәйгесе финалына чыккан 55 театр коллективының икесе гран-при иясе булды. Шамил Закиров исемендәге театр коллективларының XXIII төбәкара «Идел-йорт» бәйгесе җиңүчеләрен Камал театры сәхнәсеннән бүләкләделәр.

Татарстанда көннәр әкренләп җылыначак. Атна ахырына хәтта төнге сәгатьләрдә дә термометр баганалары -16 градустан түбән төшмәячәк, дип хәбәр итә республиканың Гидрометүзәге.

Яшьләрне Россиянең яңа территорияләрендә гуманитар миссияләргә актив җәлеп итүгә китергән патриотик программаларны һәм волонтерлык өлкәсендәге проектларны гамәлгә ашыру быел яшьләр сәясәтенең төп эшенең нәтиҗәсе дип әйтергә мөмкин. «Татар-информ» белән Татарстан яшьләр эшләре министры Ринат Садыйков шундый фикер белән уртаклашты.

Татарстан Рәисе Рөстәм Миңнеханов Абай (Казахстан) өлкәсе акиме Нурлан Уранхаев белән очрашты. Алар алга таба хезмәттәшлек турында фикер алышты. Бу хакта Татарстан җитәкчесенең матбугат хезмәте хәбәр итә.

«Идел» журналы каршында оешкан «Яңа исем» иҗат мәктәбендә катнашучыларның әсәрләре «Китап» радиосында яңгыраячак. Бу хакта журнал үткәргән кичәдә «Татмедиа» акционерлык җәмгыяте генераль директоры Шамил Садыйков әйтте.

Казанда Милли китапханәнең «Моң» театр мәйданында «Алло, Илһам?» дип аталган әдәби-музыкаль кичә узды. «Яңа исем» әдәби мәктәбендә актив иҗат иткән яшь язучылар бүләкләнде.

Татарстан Үзәк сайлау комиссиясе рәисе Андрей Кондратьев ТР Дәүләт Советы депутатларын сайлауны уздыру өчен бер мандатлы сайлау округлары схемасын тәкъдим итте. Барлыгы бер мандатлы 50 сайлау округы эшләячәк, шуларның 17сендә яңа чикләр барлыкка килде.

Казанның «Ярдәм» гомуммилләт хәйрия фондында «Калям Шариф. Перевод смыслов» басмасы сукырлар өчен Луи Брайль системасы буенча дөнья күрде. Китаплар үз ияләренә шушы көннәрдә барып җитәчәк – уникаль басма 10 томлык 100 комплект булып басылды һәм ул мөселманнар күпләп яшәгән төбәкләргә махсуслаштырылган китапханәләргә җибәреләчәк.

Татарстан Премьер-министры урынбасары, Бөтендөнья татар конгрессының Милли шурасы рәисе Васил Шәйхразиев Башкортстан Республикасына эш сәфәренә барды. Биредә ул Россиянең югары мөфтие, Россия мөселманнарының Үзәк Диния нәзарәте рәисе Тәлгать хәзрәт Таҗетдин белән очрашты. Бу хакта Бөтендөнья татар конгрессының матбугат хезмәте хәбәр итә.

2024 елда Казанда Казахстан җәмәгать эшлеклесе, язучы, шагыйрь Абай Кунанбаев сынын куярга җыеналар. Бу хакта Казахстанның Казандагы Генераль консулы Ерлан Искаков сөйләде.

Казанда Карл Маркс урамындагы 65нче йортта авыл хуҗалыгы фәннәре докторы, профессор, Россиянең һәм ТАССРның атказанган урманчысы Әхмәдулла Газизуллинга мемориаль такта куелачак. Шул хактагы карарны республика Премьер-министры Алексей Песошин имзалады.

Татарстан Рәисе Рөстәм Миңнеханов төбәктә яшәүче гражданнарга патриотик тәрбия бирү турындагы законны имзалады. Документ республика җитәкчесенең рәсми сайтында чыкты.

17 декабрьдә Барнаулда Алтай крае халыклары йортында Сара Садыйкова исемендәге III татар-башкорт мәдәнияте фестивале узачак. Тамашачыларга татар һәм башкорт коллективлары җыр-биюләрен тәкъдим итү планлаштырыла. Бу хакта Бөтендөнья татар конгрессының матбугат хезмәте хәбәр итә.

Мәскәү шәһәренең «Мирас» татар җыр ансамбле 10 еллык юбилеен билгеләп узды. Бу хакта Татарстанның Россиядәге Тулы вәкаләтле вәкиллеге матбугат хезмәте телеграм-каналында хәбәр итә.

Бүген Татарстан Республикасы Рәисе Рөстәм Миңнеханов «Промышленные технологии» холдингы генераль директоры Валерий Шадрин белән очрашты. Очрашу Казан Кремлендә Рөстәм Миңнехановның эш кабинетында узды.

2024 елның 1 гыйнварыннан Татарстанда күп фатирлы йортларда гомуми милек капиталь ремонтына минималь кертем күләме артачак. Ул 1 кв. метр өчен аена 7,7 сум тәшкил итәчәк. Республика Хөкүмәте карарында шул хакта язылган.

Ульяновск өлкәсенең «Өмет» газетасында И.Хасибовның «Татар баласы ана телен белсен» дигән язмасы чыкты.

Банк клиент хисабындагы акчаны суд карары яки килешү буенча алу хокукына ия. PG Partners юридик компаниясенең өлкән идарәче партнеры Петр Гусятников «Прайм» агентлыгына биргән интервьюсында шулай дип белдерде. Бу хакта РИА Новости агентлыгы хәбәр итә.

Якшәмбе, 10 декабрьдә, Татарстанда муниципаль берәмлекләрнең вәкиллекле органнары депутатларын өстәмә сайлау узды. Татарстан Үзәк сайлау комиссиясе рәисе Андрей Кондратьев сайлау нәтиҗәләрен шәрехләде. Бу турыда «Татар-информ» яза.

«Татар балалар нәшрияты» проекты Милләтләр эшләре буенча федераль агентлыкның VII Бөтенроссия иҗтимагый премиясе конкурсында җиңде. Рус, татар, мари, чуваш, удмурт, эрзя һәм мукшы халык әкиятләре мотивлары буенча «Идел буе батырлары» нәфис-анимацион басмалар сериясе елның иң яхшы наширлек проекты дип танылды, бу хакта «Татар балалар нәшрияты»ннан Ләйсән Гарфиева хәбәр итә.

Татарстанда һава шартларының бозылуы көтелә, шулай ук аномаль салкыннар да саклана. Бу хакта ТР Гидрометеорология һәм әйләнә-тирә мохитне күзәтү идарәсендә хәбәр иттеләр.