Новости за 03.12.2023

Әлмәт районында яшәүче Мөзәянә Мәхмүт кызы Хәмәтдинова 100 яшьлек юбилеен билгеләп үтте. Район башлыгы Тимур Нагуманов юбилярны белән котлады. Ул юбилярга сугыш һәм сугыштан соңгы елларда күпьеллык намуслы хезмәте өчен рәхмәт белдерде. Тимур Нагуманов Россия Президенты, Татарстан Рәисенең котлау хатын, шулай ук үзеннән котлаулар һәм бүләкләр тапшырды. Бу хакта «Әлмәт таңнары» хәбәр итә.

Алабуга йөзүчеләре XXX Россия Кубогында призлы урыннар яулады. «Мастерс» категориясендә йөзү буенча XXX Россия Кубогында шәһәр исеменнән чыгыш ясаган җыелма команда 8 спортчыдан торды. Мондый дәрәҗәле ярышларда бөтен илнең 82 клубыннан 1200дән артык йөзүче катнашты. Бу хакта «Алабуга нуры» хәбәр итә.

Бүген Казанның «Ак Барс» һәм Түбән Каманың «Нефтехимик» хоккейчылары арасындагы уен «Ак Барс» җиңүе белән тәмамланды. Уен исәбе – 4:0. Матч Казанда «Татнефть Арена» боз сараенда узды.

Чүпрәле район мәдәният йортында РСФСРның һәм Татарстан Республикасының халык артисты Әзһәр Шәфыйк улы Шакировның тормыш юлы һәм иҗатына багышланган «Җылак» фильмы күрсәтелде. Бу хакта «Туган як» сайтында хәбәр ителә.

25 декабрьдән 8 гыйнварга кадәр Чирмешән районында яшәүчеләр һәм кунаклар Кыш бабай белән аның резиденциясендә аралаша алачак. Дөрес. бүләк алу өчен шигырь сөйләргә туры киләчәк. Бу хакта «Безнең Чирмешән» хәбәр итә.

Бүген иртән ашыгыч хезмәтләргә Татарстанның Югары Ослан районы Ташкабак авылында шәхси йортта янгын чыгуы турында хәбәр килгән. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр иттеләр.

РФ мөселманнары Диния нәзарәтенең «Зәкят» хәйрия фонды ярдәмендә Газа секторының көньягында яралылар өчен кыр госпитале ачылды, дип хәбәр итте фондның генераль директоры Сөләйман Аджиев ТАСС агентлыгына. Бу хакта РФ мөселманнары Диния нәзарәте сайты яза.

«Саф» балалар интернет-радиосы PR белгече Алсу Хәбибуллина КФУның Филология һәм мәдәниятара багланышлар институты белән берлектә радиожурналистика буенча медиамәктәп эшләтеп җибәрүләре турында сөйләде.

16-21 декабрьдә Ташкент шәһәренең Алишер Навои исемендәге Кино сараенда Татарстан Республикасы Кино көннәре узачак. Татар телендәге нәфис һәм документаль фильмнар Үзбәкстан тамашачысына рус теленә тәрҗемәдә тәкъдим ителәчәк. Бу хакта Ташкент шәһәре Татар иҗтимагый мәдәни-агарту үзәге телеграм-каналы хәбәр итә.

Быел Татарстан һәм Россиянең тагын алты төбәге тыгызландырылган табигый газ заправкалары инфраструктурасын үстерү өчен өстәмә финанслар алачак. РФ Премьер-министры Михаил Мишустин шул хактагы боерыкны имзалаган.

Бүген, 3 декабрьдә, Татар китабы йортында «Иделем акчарлагы» яшь язучылар бәйгесенең җиңүчеләрен бүләкләделәр. Быел бәйгедә барлыгы 68 кеше катнашкан, аларның 25е жюри тарафыннан югары дип бәяләнгән, Балтач районыннан Гөлзилә Фәхретдинова шигырьләре Гран-прига лаеклы дип табылган.

2024 елның 1 гыйнварыннан россиялеләрнең пособие, ана капиталы һ.б. түләүләрен индексацияләячәкләр. Бу пенсияләргә дә кагылачак. Дәүләт Думасы депутаты («Бердәм Россия» фракциясе), Бюджет һәм салымнар комитеты әгъзасы Никита Чаплин «Российская газета»га Яңа елдан пенсионерларның тормышы финанс җәһәтеннән ничек үзгәрәчәге һәм өстәмәләрнең кемнәргә кагылачагы хакында сөйләде.

2 декабрьдә Диния нәзарәтнең халык арасында зур популярлык казанган проекты – «Ислам. Беренче адымнар» мәктәбе үз эшен төгәлләде. Бу юлы намаз укырга 150 кеше өйрәнде. Аларның 20сен ир-ат, калганын хатын-кызлар тәшкил итте. Бу хакта ТР Диния нәзарәте матбугат хезмәте хәбәр итә.

«Саф» балалар интернет-радиосы PR белгече Алсу Хәбибуллина радио сайты киләчәктә портал буларак эшләячәген әйтте.

РФ Президенты Владимир Путин Россиянең юридик бергәлеге вәкилләрен һөнәри бәйрәмнәре – Юристлар көне белән тәбрик итте. Котлау телеграммасы Кремль сайтында урнаштырылган.

Татарстанның Актаныш районы Иске Богады авылында «Без бергә» хәйрия концерты булды. Быелның соңгы концертына махсус хәрби операциядә катнашучы солдатларның әти-әниләре, хатыннары, шулай ук якын туганнары һәм дуслары чакырылган иде.

Бүген кич, иртәгә төнлә һәм көндез Татарстанда янә һава шартларының начараюы фаразлана. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Казанның Туризмны үстерү комитеты төбәктә автомобиль туризмын популярлаштыру проектын әзерли. Ведомство җитәкчесе Дарья Санникова «Россия» күргәзмәсендә оештырылган Республика көнендә «Российская газета»га шулай дип белдерде.

Көньяк Кореяда моделинг буенча Азия чемпионаты төгәлләнде һәм «Miss Asia Awards-2023» премиясе җиңүчеләрне игълан итте. Бу хакта «Башинформ» агентлыгы яза.

2 декабрьдә Томск өлкәсе Татар мәдәнияте үзәгенең 30 еллыгына багышланган тантаналы чара узды. Бу хакта Бөтендөнья татар конгрессы матбугат хезмәте хәбәр итә.

Махсус операция зонасындагы «Үзәк» гаскәри берләшмәсе белгечләре хәрбиләр өчен Татарстандагы гаиләләре белән телекүпер оештырды. Россия Саклану министрлыгы шуның видеоязмасын урнаштырган.

Татарстанда федераль әһәмияткә ия мәдәни мирас объекты – Биләр шәһәрлеге территориясен файдалану режимы һәм аның чикләре расланды. ТР Мәдәни мирас объектларын саклау комитеты рәисе Иван Гущин шул хактагы боерыкны имзалады.

2 декабрьдә Газа секторыннан Россия гражданнарын һәм аларның палестиналы туганнарын эвакуацияләү яңадан башланды. Бу хакта Россиянең Палестина милли администрациясе каршындагы вәкиллеге хәбәр итә.

2024 елда Россиядә электрон медицина карталарына мәҗбүр күчеш башлана. Бу пациентларның мәгълүматлары бердәм ресурсын формалаштырырга һәм тулаем сәламәтлек саклау системасын үзгәртергә ярдәм итәчәк, ди РФ сәламәтлек саклау министры Михаил Мурашко. Бу хакта ТАСС агентлыгы хәбәр итә.

Чаллыда, «Гараж 500» автобазарында чыккан янгынны тулысынча сүндерделәр. Бу хакта Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр иттеләр.