Новости за 29.12.2023

Бүген Зәй шәһәре хакимияте бинасында район башлыгы Разиф Кәримов ятим балаларга Яңа ел алды бүләге ясады. Аларга 11 яңа фатирдан ачкычлар тапшырылды. Бу хакта «Зәй яңалылкары» хәбәр итә.

31 декабрь төнендә Казанда транспорт хәрәкәте өчен Миллениум күпере ябылачак. Бу ремонт эшләре белән бәйле, дип хәбәр иттеләр шәһәр Башкарма комитетының Тышкы төзекләндерү комитетында.

Екатеринбургта Урал татарларын берләштергән «Яшен» татар оешмасы «Кияу пилмәне» дип аталган күңелле чара үткәргән. Бу хакта «Яшен» татар яшьләре оешмасы «ВКонтакте» социаль челтәре сәхифәсендә яза.

Россия Хөкүмәте тавык йомыркаларын кертүгә пошлинаны бетерү турында карарны раслады. Чара 2024 елның 1 гыйнварыннан 30 июньгә кадәр гамәлдә булачак. Карар хокукый мәгълүматлар рәсми порталында чыкты.

2024 елның гыйнвар ае Татарстанда гадәттәгечә салкын, әмма карлырак булачак. Бу Татарстан Гидрометеорология үзәгенең айлык фаразында күренә.

Гамәлдәге дәүләт башлыгы Владимир Путинның бүген Россия Президенты вазифасына кандидат буларак бүген эшли башлаган сайты шунда ук чит илләрдән күп санлы DDoS-һөҗүмнәргә (киберһөҗүм төре) дучар булды. Ул эшне штат режимында дәвам итә. Бу хакта журналистларга штабның матбугат сәркатибе Александра Суворова белдерде.

2024 елда Россиянең социаль тармагында бердәм үзәкләштерелгән цифрлы платформа барлыкка киләчәк. Аны булдыру турында карарны Премьер-министр Михаил Мишустин имзалады.

Сабир Өметбаев исемендәге Минзәлә дәүләт татар драма театрының узган ел берьюлы өч актеры армиягә китте. Бер ел хезмәт иткәннән соң, Нурлан Шәехов, Рөстәм Афзалов һәм Азат Җиһаншин исән-имин өйләренә кайтты.

Татарстан шефлыкка алган Лисичанск һәм Рубежное шәһәрләрендә «Бердәм Россия» җирле оешмалары булдырыла. Әлеге эштә партиянең Татарстан бүлекчәсе вәкилләре дә актив ярдәм күрсәтә. Бу хакта төбәк башкарма комитеты җитәкчесе Марат Сәмигуллин сөйләде.

Казан метрополитены Яңа ел төнендә 2.00 сәгатькә кадәр эшләячәк. Бу чара Татарстан башкаласында яшәүчеләр һәм кунакларга Яңа елны каршылаганнан соң төп чыршы белән сокланырга һәм өйләренә кайтырга мөмкинлек бирәчәк. Бу хакта «Метроэлектротранс» матбугат хезмәте яза.

Россия Президенты Владимир Путинны төрле яшьтәге гражданнар, шул исәптән балалар һәм яшьләр дә хуплый. Бу хакта дәүләт башлыгының матбугат сәркатибе Дмитрий Песков белдерде. Россия лидерын дәүләт башлыгы сыйфатында яңа срокка тәкъдим итү өчен балаларның үз имзаларын кую инициативасына Кремль вәкиленнән комментарий бирүен элегрәк журналистлар сораган иде.

Татарстан Республикасы Рәисе Рөстәм Миңнеханов Яңа елга бизәлгән Казан видеосы белән уртаклашты. Гирлянда һәм күпсанлы конструкция утлары белән бизәлгән шәһәр урамнарын ТР җитәкчесе телеграм-каналында күрергә мөмкин.

Данис Шакиров бүгенге көн шәхесләре рәтенә, беренче чиратта, Бөтендөнья татар конгрессының беренче рәисе Индус Таһировны, күренекле астрофизик Рәшит Сөнәевне, очучы, Россия Герое Дамир Йосыповны, Россиянең иң танылган нейрохирургларының берсе Альберт Суфиановны кертте.

Бүген һәм иртәгә, 30 декабрьдә, Татарстан территориясендә томан, җепшек кар һәм юлларда кар көртләре көтелә.

Яңа ел каникулларында Казан телеманарасын бәйрәм уты бизәячәк.

Аны шәһәрлеләр һәм ТР башкаласы кунаклары 30 декабрьдән 8 гыйнварга кадәр – 15:00 дән 23:00 гә кадәр, ә Яңа ел төнендә 1:00 гә кадәр күрә алачак, дип хәбәр итә республика Цифрлар министрлыгының матбугат хезмәте.

Быел Казанда бәйрәм чаралары сериясе 180 вакыйганы үз эченә ала. Традиция буенча, шәһәр халкы һәм кунаклары Яңа елны «Казан» гаилә үзәге янындагы үзәк чыршы янында һәм «Черек күл» паркындагы шугалакта каршы ала алачак. Читать дальше...

Нәзарәтнең «Хозур» нәшрият йорты «Шура» альманахының 43нче санын нәшер итте. Әлеге яңа сан Рамазан ае буена гына түгел, тормышыбызның башка өлкәләрендә дә ярдәмче булачак. Җыентыкта күп кенә сорауларыбызга җавап, аңыбызга зиһен, күңелебезгә нур, калебебезгә сафлык өсти торган нәсыйхәтләр урын алган, дип хәбәр итә ТР Диния нәзарәте.

Татарстанда «Алтын каләм» яшүсмерләр һәм яшьләр матбугаты фестиваленең яңа сезонына гариза тапшыру кампаниясе ачылды. Анда 14 яшьтән алып 24 яшькә кадәрге егет-кызлар — медиа өлкәсе вәкилләре катнаша ала.

2023 елда, Идел буе Болгарында Ислам динен кабул итүгә 1100 ел тулу уңаеннан, Татарстан Республикасында игълан ителгән Милли мәдәниятләр һәм гореф-гадәтләр елы кысаларында ТР мөселманнары Диния нәзарәте һәм «Хозур» нәшрият йорты яңа проект – рус телендә онлайн-мәдрәсәне эшләтеп җибәрде. Шул рәвешле, хәзер җир шарының төрле почмакларында яшәүче рус телле мөселманнар Ислам нигезләре буенча бушлай белем ала. Бер ел эчендә әлеге ресурста, белем алу максаты белән, 16230 «шәкерт» теркәлгән, дип хәбәр итә ТР Диния нәзарәте. Читать дальше...

Татарстан Рәисе Рөстәм Миңнеханов «Татарстан Республикасында җирле үзидарәне үстерүдә казанышлары өчен» медале белән бүләкләү турында указны имзалады. Документ аның рәсми порталында чыккан.

Гамәлдәге дәүләт башлыгы Владимир Путинның бүген Россия Президенты вазифасына кандидат буларак сайты эшли башлады. Аның белән putin2024.ru адресы аша танышырга мөмкин.

Җомга көнне, 29 декабрьдә, Вологда Җәмигъ мәчете бинасында тантаналы төстә күренекле татар теологы, көнчыгышны өйрәнү белгече Хөсәен Фәезханов исемендәге Белем бирү-агарту үзәге ачылды. Әлеге вакыйга быел РФ мөселманнары Диния нәзарәте инициативасы белән илнең төрле төбәкләрендә Бөтенроссия дәрәҗәсендә билгеләп үтелгән Хөсәен Фәезхановның 200 еллыгына багышланган чаралар кысасында узды. Бу хакта РФ мөселманнары Диния нәзарәтенең матбугат хезмәте хәбәр итә.

Бүген Мәскәү биржасында доллар бәясе 30 ноябрьдән соң беренче тапкыр 88,99 сумга төште. Сату-алу мәгълүматлары шуны раслый.

Кышкы каникул көннәрендә Татарстан мәчетләрендә мәктәп балалары өчен рухи-сәламәтләндерү чаралары узачак. Оештыручылар 29 декабрьдән алып 7 гыйнварга кадәр малайлар һәм кызлар өчен белем алу, күңел ачу программасы әзерләде.

Менделеевскидагы аппарат киңәшмәсендә район башлыгы Радмир Беляев хезмәттәшләренә «Таткоммунэнерго» республика җитештерү берләшмәсенең яңа директорын – Ленар Зариповны тәкъдим итте. Ул быелның октябренә кадәр Түбән Кама Башкарма комитетында эшләгән иде.

«Миллиард.Татар» басмасы татар телен һәм мәдәниятен үстерү, татар тарихын өйрәнү һәм популярлаштыруга зур өлеш кертүче төрле эшчәнлек өлкәләрендәге 100 вәкилне үз эченә алган исемлек төзегән.