Новости за 07.12.2023

РФ Дәүләт Думасы Рәисе Вячеслав Володин профиль комитетларга «эзәрлекләү» төшенчәсенең закондагы билгеләмәсен әзерләргә кушты. Парламентның түбән палатасы сайтында шул хакта мәгълүмат чыкты.

Бүген Казанның «Ак Барс» хоккейчылары Ярославльнең «Локомотив» командасына 3:1 исәбенә оттырды. Матч Ярославльдә узды.

6 декабрьдә Мәскәүнең Татар мәдәни үзәгендә Бөек Ватан сугышы ветераны, армия генералы Мәхмүт Гәрәевкә багышланган искә алу кичәсе булды. Очрашуда хәрби җитәкченең кызы Галия Крайнова да катнашты. Аның сүзләренчә, Мәхмүт Гәрәев үрнәк гаилә башлыгы булган, туганнарын һәрвакытта да төп таяныч һәм ышанычлы тыл дип санаган. Бу хакта Мәскәү татарлары автономиясенең матбугат хезмәтендә хәбәр иттеләр.

Быел халыкның реаль хезмәт хакы – 7, реаль керемнәре 4,4 процентка арткан. РФ Президенты Владимир Путин бүген Мәскәүдә ачылган ВТБның «Россия чакыра!» XIV инвестиция форумының пленар утырышында шулай дип белдерде.

Бүген Казанда Укытучы һәм остаз елына нәтиҗәләр ясауга багышланган чара булды. Тантанада ТР мәгариф һәм фән министры Илсур Һадиуллин, мэр Илсур Метшин һәм меңнән артык педагог катнашты.

6 декабрь көнне Башкортстан Республикасының Чишмә районының Келәш авылы мәдәният йортында җәмәгать һәм дин эшлеклесе, мәгърифәтче, галим-теолог һәм филолог, язучы Зыя Камалиның 150 еллыгына багышланган тантана узды. Бу хакта Бөтендөнья татар конгрессының матбугат хезмәте хәбәр итә.

РФ Президенты Владимир Путин ВТБның «Россия чакыра!» форумында Россиянең үз базарын актив рәвештә үзләштерүе һәм көчләп тагылган хезмәтләр, брендлар, арадашчылардан баш тартуы турында белдерде.

ТР Дәүләт Киңәшчесе, Республиканың «Яңарыш» фонды попечительләр советы рәисе Минтимер Шәймиев Россия спорт министры Олег Матыцин белән очрашты. Ул фонд эшчәнлегенә багышланган экспозицияне карады, дип хәбәр итә ТР Рәисенең матбугат хезмәте.

Иминиятләштерү механизмын озак сроклы шәхси инвестиция счетларына да җәелдерергә кирәк дип саныйм. РФ Президенты Владимир Путин «ВТБ: Россия чакыра» форумында шундый тәкъдим белән чыгыш ясады. Бу хакта ТАСС агентлыгы хәбәр итә.

Бүген, 7 декабрьдә, Мәскәүдә Россия Динара советы Президиумының юбилей утырышы узды. Җыелыш Россия Динара советы оешуның 25 еллыгына багышлап Мәскәү һәм бөтен Россия Патриархы Кирилл рәислегендә үтте. Киңәшмә эшендә шулай ук Татарстан мөфтие Камил хәзрәт Сәмигуллин һәм РФ мөселманнары Диния нәзарәте вәкилләре катнашты. Бу хакта ТР Диния нәзарәте матбугат хезмәте хәбәр итә.

Казан мэры Илсур Метшин «Илкүләм мэрлар рейтингы»нда иң яхшы шәһәр башлыклары бишлегенә керде. Рейтинг РФ Хөкүмәте каршындагы Финанс университеты белән берлектә «Рейтинг» мәгълүмати коммуникацияләр үзәге экспертлары тарафыннан төзелгән. Тикшеренүдә 2023 елның октябрь-ноябрь айлары өчен Россиянең 88 шәһәре мэрлары эшчәнлеген бәяләгәннәр.

Бүген 95 яшендә Татарстан Республикасы прокуратурасы ветераны, РСФСРның атказанган юристы Мөбарәк Әшрәпов вафат булган.

Россия – Европаның иң зур икътисады һәм үсеш темпы буенча Европа берлегенең барлык әйдәп баручы илләрен узып китә. РФ Президенты Владимир Путин «ВТБ: Россия чакыра» форумында шулай дип белдерде.

1-4 декабрьдә Берләшкән Гарәп Әмирлекләренең Дубай шәһәрендә билбау көрәше буенча халыкара ярышлар узды. Бу хакта ТР Спорт министрлыгының матбугат хезмәте хәбәр итә.

Һава температурсы -23..-32 градус тәшкил итсә, Татарстан мәктәпләрендә дәресләр үткәрелмәскә мөмкин. Бу хакта ТР Мәгариф һәм фән министрлыгының матбугат хезмәтендә хәбәр иттеләр.

Казанда яшәүчеләр өч яңа локациядә тантаналы шартларда никахларын терки алачак. ТР башкаласы Башкарма комитетының документлар һәм хокукый актлар җыентыгында шулай диелә.

ТР Үзәк сайлау комиссиясе алдында җитди бурычлар тора. Хәзер илнең төп сайлауларына әзерлек бара инде. Комиссия рәисе Андрей Кондратьев шулай дип белдерде.

Чиләбедә шагыйрь, язучы, Бөек Ватан сугышы фронтовигы Әхмәт Рафиковның 107 еллыгы билгеләп үтелә. Бу хакта «ВКонтакте» социаль челтәрендәге Чиләбе өлкәсе татарлары конгрессы сәхифәсендә хәбәр ителә.

БРИКС һәм БРИКС+ илләре башлыклары саммитына, шулай ук KazanForum халыкара икътисади форумына яшьләрне җәлеп итәргә кирәк. Бу хакта Татарстан Рәисе Рөстәм Миңнеханов Ислам хезмәттәшлеге оешмасының Яшьләр форумы президенты Таха Айхан белән очрашуда белдерде.

Дәүләт Думасы торак-коммуналь хезмәтләр өчен түләгәндә банк комиссиясе алуны тыю турындагы карарны өченче, йомгаклау укылышында кабул итте. Ул пенсионерларга, аз керемле кешеләргә, инвалидларга, сугыш хәрәкәтләре ветераннарына һәм башка гражданнарга кагыла. Бу хакта үз Дәүләт Думасы рәисе Вячеслав Володин Телеграм-каналында сөйләде.

Татарстан Рәисе Рөстәм Миңнеханов Дәүләт Думасының Физик культура һәм спорт комитеты рәисе Дмитрий Свищев белән очрашты. Бу хакта республика җитәкчесенең матбугат хезмәте хәбәр итә.

Галиәсгар Камал исемендәге театрның Һади Такташ һәм Назарбаев урамнары чатында урнашкан яңа бинасының мәйданы 48,8 мең кв. метр тәшкил итәчәк, ул 1370 урынга исәпләнгән. Театр территориясе 3,15 га. Планировка проектына үзгәрешләр Казан башкарма комитетының документлар һәм хокукый актлар җыентыгында күрсәтелгән.

8 декабрьдә 10.00 сәгатьтә Татар китабы йортында имам Исмәгыйль хәзрәт Сәлимшин мирасына багышланган «Мин сезгә васыять язам» лекцияләр циклында тарихчылар, дин әһелләре һәм имамның варислары чыгыш ясаячак. Лекциядә имамның кулъязмалар җыентыгы белән танышып булачак.

9 декабрьдә 12:00 сәгатьтә Казан ипподромында Татарстан Ат спорты федерациясенең Яңа ел кубогы оештырыла. Татарстан Авыл хуҗалыгы һәм азык-төлек министрлыгының Телеграм-каналында хәбәр ителгәнчә, чарага керү түләүсез була.

1231нче полк хәрби хезмәткәрләренә Татарстан Республикасы дәүләт бүләкләре тапшырылды. Бу хакта Татарстан Рәисе Рөстәм Миңнеханов Телеграм-каналында хәбәр итә.