Новости за 16.12.2023

Аяз Гыйләҗев исемендәге Чаллы татар дәүләт драма театры тамашачыларга чираттагы премьераны тәкъдим итте. Театрның сәнгать җитәкчесе, баш режиссер Олег Кинҗәгулов Нәбирә Гыйматдинованың «Сихерче» әсәрен сәхнәләштерде. Заманында бу әсәрне халык егылып укыды. Республиканың 6 театры аны сәхнәгә куйды. Бу хакта «Шәһри Чаллы» хәбәр итә.

Бүген "Казан Экспо" халыкара күргәзмәләр үзәгенең Илһам Шакиров исемендәге концертлар залында 24нче тапкыр "Татар җыры" фестивале узды.

«Россия - Ислам дөньясы» стратегик караш төркеме рәисе, Татарстан Рәисе Рөстәм Миңнеханов Кувейт әмире Наваф әл-Әхмәт әл-Джабер ас-Сабах вафатына бәйле кайгы уртаклашу белдерде. Телеграмма аның варисы кече энесе Мишааль әл-Әхмәт әл-Джабер Ас-Сабах адресына җибәрелгән. Бу хакта республика җитәкчесенең матбугат хезмәте хәбәр итә.

Татарстан Рәисе Рөстәм Миңнеханов «Татар җыры» фестиваленнән фотоны телеграм-каналына куйды. Тамаша бүген «Казан Экспо» халыкара күргәзмәләр үзәгенең Илһам Шакиров исемендәге концертлар залында уза.

Сарманның «Айтуган» спорт залында район тарихчысы, яшь буында хоккейга карата мәхәббәт тәрбияләгән күренекле шәхес Наил Сафин истәлегенә мини-футбол буенча турнир уза. Бу хакта «Сарман» сайтында хәбәр ителә.

Саба районы Төбәк авылында соңгы Бөек Ватан сугышы ветераны Хаҗиәхмәт Әлмиев вафат булган. Районның иң өлкән кешесенә 103 яшь иде. Бу хакта «Саба таңнары» хәбәр итә.

Түбән Новгород өлкәсенең Мәдәнә авылында 2024 елның 2 гыйнварында алтынчы тапкыр «Тау шуу» бәйрәме оештырылачак. Бу турыда «Туган як» газетасы социаль челтәрләрдә хәбәр итте.

Краснодар шәһәренең Милли мәдәниятләр үзәгендә «Оста бикә» конкурсында иң яхшы татар кызларын ачыкладылар. Бу хакта «Болгар-К» төбәк татар җәмгыятенең «Вконтакте» социаль челтәрендәге «Краснодар татарлары» сәхифәсендә хәбәр ителә.

«Казан Экспо» халыкара күргәзмәләр үзәгенең Илһам Шакиров исемендәге концертлар залында «Татар җыры» фестивале башланды. Залда тамашачылар арасында Татарстан Республикасы Рәисе Рөстәм Миңнеханов бар.

Бүген Татарстан Республикасы Рәисе Рөстәм Миңнеханов «Автодор» дәүләт компаниясе кубогына көрәш ярышларында булды. Ул «Ак Барс» көрәш сараенда (Казан) уза, анда Россиянең 35 төбәгеннән 350 спортчы катнаша.

Татарстанда торак-коммуналь хезмәтләр өчен түләүләрне җыю 0,9 процентка артты. Ноябрьдә күрсәткеч 99,7 процент тәшкил итте, уртача еллык күрсәткеч – 99,3 процент. Бу хакта Татарстан Хөкүмәте Йортында киңәшмәдә ТР Төзелеш, архитектура һәм торак-коммуналь хуҗалык министрлыгы җитәкчесе Марат Айзатуллин сөйләде.

2024 елгы сайлауда Россия Президенты Владимир Путинның үзен-үзе тәкъдим итүен хуплаучы сайлаучылар төркеменә 700дән артык кеше рәсми рәвештә теркәлгән. Сайлаучыларның инициатив төркеме җыелышы вакытында КАМАЗ генераль директоры Сергей Когогин шул хакта белдерде. Бу турыда ТАСС хәбәр итте.

Махсус хәрби операциядә катнашучыларга һәм аларның балаларына да Казан федераль университетыннан (КФУ) бер тапкыр бирелә торган матди ярдәм күрсәтү мөмкинлеге турындагы боерык килешүгә тапшырылган. Бу хакта «Татар-информ»да «Үзебезнекеләр турында кайгырту: махсус хәрби операциядә катнашучыларның балаларына ярдәм итү чаралары» темасына багышланган матбугат конференциясендә КФУның тышкы элемтәләр буенча проректоры Тимирхан Алишев сөйләде.

Иртәгә, 17 декабрьдә, Түбән Новгород өлкәсе Дзержинск шәһәрендә билбаулы көрәш буенча ачык беренчелек була. Бу хакта Түбән Новгород өлкәсе татарлары милли-мәдәни мохтариятенең «ВКонтакте» социаль челтәрендәге сәхифәсендә хәбәр ителә.

Бөгелмәдә 2024 елга «Безнең ишегалды» программасыннан «Жилсервис» генподрядчысы читләштерелде. Татарстан Дәүләт төзелеш күзәтчелеге инспекциясе компаниянең күпсанлы хокук бозуларына нигезләнеп карар кабул итте. ТР Хөкүмәте Йортында киңәшмәдә «Татарстан шәһәрләре үсеше институты» фонды җитәкчесе Наилә Зиннәтуллина шул хакта әйтте. Чараны республика Рәисе Рөстәм Миңнеханов үткәрде.

Кувейт әмире Наваф әл-Әхмәт әл-Джабер Ас-Сабах вафат булу сәбәпле, Россия Президенты Владимир Путин кайгы уртаклашу белдерде. Телеграмма аның варисы кече энесе Мишааль әл-Әхмәт әл-Джабер Ас-Сабах адресына җибәрелгән.

Казан вәкилләре «Россия тәрбиячеләре» конкурсында призлы урыннар яулады. Бүләкләү тантанасы Санкт-Петербургта шул ук исемдәге форумда узды. Бу турыда Казан мэриясе хәбәр итте.

Татарстанда яшәүче ир-атны 12 яшьлек кызны мәсхәрә иткән өчен хөкем иттеләр. Бу хакта Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте.

15 декабрьдә Казан федераль университеты үткәрә торган Казан «Халыкара лингвистик саммит - 2023» кысаларында «Евразия гуманитар фәне контекстында татар тел белеме» фәнни-гамәли конференциясе узды. Конференция традицион рәвештә Филология һәм мәдәниятара багланышлар институтында дүртенче тапкыр үткәрелә. Быел ул татар теле белемендә тирән эз калдырган, 2023 елда юбилеен билгеләп үткән галимнәргә багышланган иде.

Санкт-Петербург татар җәмгыятендә туган якны өйрәнүче беренче тарихчы, татар милли хәрәкәте активисты Дауд Әминовның 100 еллыгына багышланган кичә булды. Бу хакта Санкт-Петербург һәм Ленинград өлкәсе Татарлар порталында хәбәр ителә.

Кувейт әмире Наваф әл-Әхмәт әл-Джабер ас-Сабах 86 яшендә вафат булган. Бу турыда РИА Новости хәбәр итте.

Россиядә ташламалы ипотека буенча кертемне 30 процентка кадәр арттырдылар. Хәзер барлык төбәкләр өчен мондый кредитның минималь күләме 6 млн сум тәшкил итәчәк. Бу хакта Россия Финанслар министрлыгы Телеграм-каналында хәбәр итә.

Татарстанда йомырка җитештерү куллану нормасыннан 13 процентка күбрәк. Ул сөт җитештерү күрсәткеченнән 28 процентка, итнекеннән 29 процентка артып китә. Бу хакта Татарстан Авыл хуҗалыгы һәм азык-төлек министрлыгы Казанда һәм республиканың зур шәһәрләрендә узган авыл хуҗалыгы ярминкәләре йомгаклары буенча хәбәр итә.

М-12 «Көнчыгыш» тиз йөрешле автомобиль юлын ачу – республика һәм ил өчен эпохаль вакыйга. Россия тарихында мондый инфраструктура проектлары шулай кыска вакыт эчендә беркайчан да төзелмәгән. Бу хакта Татарстан Республикасы Хөкүмәте Йортында узган республика киңәшмәсендә Татарстан Республикасы Рәисе Рөстәм Миңнеханов белдерде.

Якындагы көннәрдә Татарстан шәһәрләрендә һәм районнарында чыршы шәһәрчекләре эшли башлый. Бәйрәм чараларын оештыруга төп таләпләрнең берсе - иминлек һәм җәмәгать тәртибен тәэмин итү. Бу турыда Татарстан Хөкүмәте Йортында узган киңәшмәдә республика Рәисе Рөстәм Миңнеханов әйтте.