Новости за 20.07.2023

Әлмәт районы мәшгульлек хезмәте белгечләре ике ел рәттән район өчен рекордлы югары күрсәткечләрне теркәгән. Быел эшсезләр саны ун ел элек булган дәрәҗәгә җитте. Ел башыннан «Россия работа» кадрлар үзәгенә 900 дән артык кеше мөрәҗәгать иткән. Беренче яртыеллык ахырына Әлмәттә эшкә урнашмаган 200дән артык граждан калган. Бу хакта «Әлмәт таңнары» хәбәр итә.

Якын көннәрдә Татарстанда һава торышында сизелерлек үзгәрешләр көтелми. Яшенле яңгыр явачак, көндез һава температурасы +20..+26 градус тәшкил итәчәк. Бу хакта республика Гидрометеорология һәм әйләнә-тирә мохитне күзәтү идарәсе хәбәр итә.

Хәрби самолет Азов диңгезенә егылып төшү нәтиҗәсендә һәлак булган өлкән лейтенант Тимур Хисмәтуллин белән хушлашу мәрасиме 22 июльдә 10.00 сәгатьтә Әлмәттә була.

Россия Президенты Владимир Путин Мурманск өлкәсенә килде. Бу хакта ТАСС агентлыгы хәбәр итә.

Татарстанның Дәүләт Киңәшчесе Минтимер Шәймиев бүген «Хәзинә» Милли сәнгать галереясында ачылган «Табигать. Шәһәр. Яз» фотокүргәзмәсе белән танышты. Аның өчен экскурсияне экспозиция авторы Рөстәм Хәйруллин үткәрде. Бу хакта ТР Рәисенең матбугат хезмәте хәбәр итә.

Кабан күле яр буенда Казан халкын һәм башкала кунакларын «Типтереп бию» дигән мишәрләрнең бию үзенчәлекләренә өйрәттеләр. Остаханә «Хәрәкәттә – бәрәкәт» проекты кысаларында үтте.

Россиядә ел ахырына кадәр бурычлы затлар һәм банкротларның чит ил паспортын алу кагыйдәләре барлыкка киләчәк. Хәзер федераль ведомстволар шуны әзерләү белән шөгыльләнә. Бу хакта «Российская газета» хәбәр итә.

Россия икътисади үсеш министры урынбасары Морат Керефов Татарстан Премьер-министры Алексей Песошинга республиканың «Хезмәт җитештерүчәнлеге» илкүләм проекты рейтингында җиңгәне өчен бүләк тапшырды.

Татарстанның тугыз пляжында су һәм комның сыйфаты начар булу аркасында коенмавың хәерле. Россия Кулланучы хокукларын яклау һәм кеше иминлеге өлкәсендә күзәтчелек федераль хезмәтенең (Роспотребнадзор) ТР буенча идарәсе матбугат хезмәтендә шулай дип белдерделәр.

Россия Хөкүмәте башлыгы Михаил Мишустин өстәмә кыйммәткә салым ике тапкыр (10 процентка кадәр) киметеләчәк балалар товарлары исемлеге киңәйтелүе хакында хәбәр итте.

Бәйрәм Балык Бистәсе мөхтәсибәте һәм Тәберде-Чаллысы мәчете белән берлектә оештырыла.

Биләрдәге «Сәләт» форумы үз экваторын кичте һәм кичә дүртенче смена - Медиа Биләр Форум старт алды, ул 25 июльгә кадәр дәвам итәчәк.

26 июльдә 10.00 сәгатьтә Габдулла Тукай әдәби музеенда шагыйрә, эссеист, тәрҗемәче, Төркиядәге Эрджиэс университетының рус әдәбияты укытучысы Лилия Газизова (Жанти) катнашында «Габдулла Тукай, татар һәм төрки телле әдәбиятчылар әсәрләрен тәрҗемә итүнең актуаль проблемалары һәм перспективалары» дигән түгәрәк өстәл узачак.

Татарстан дирижеры – Казанның La Primavera камера оркестры сәнгать җитәкчесе Рөстәм Абязов Дуслык ордены белән бүләкләнде. Россия Президенты Владимир Путин шул хактагы указны имзалаган.

Татарстан һәрвакыт барлык тармакларда да югары күрсәткечләргә омтыла һәм нәкъ менә республикабызның «Хезмәт җитештерүчәнлеге» илкүләм проектын гамәлгә ашыру буенча лидер төбәк дип танылуы куандыра. ТР Премьер-министры Алексей Песошин «Җитештерүчәнлек 360» халыкара форумы пленар сессиясендә шулай дип белдерде.

Кичә Горький исемендәге Үзәк мәдәният һәм ял паркында «Древо жизни» проекты чаралары кысаларында рус мәдәнияте бәйрәме булды.

Дәүләт Думасы «Мәгариф турында»гы законга мәктәп укучыларына хезмәт тәрбиясе бирү принципларын кертә, көмеш медальләрне кире кайтара һәм тормыш иминлеге нигезләре предметының яңа атамасын билгели торган төзәтмәләрне кабул итте. Бу хакта РИА Новости агентлыгы хәбәр итә.

Махсус хәрби операция ветераннарын һәм анда катнашучыларны мәктәпләрдә уза торган «Мөһим мәсьәлә турында сөйләшү» дәресләренә чакырырга кирәк. Россия мәгариф министрының беренче урынбасары Александр Бугаев (ул хәзерге вакытта министр вазифасын башкара) шулай дип белдерде. Бу хакта ТАСС агентлыгы хәбәр итә.

29 июльдә 16.00 сәгатьтә Теләче районы Баландыш авылында «Кичке уен» бәйрәме була. Бәйрәмдә «Теләче» районы газетасы абунәчеләре арасында бүләкләр уйнатылачак.

Омск төбәге губернаторы вазифаларын вакытлыча башкаручы Виталий Хоценко Татарстан Премьер-министры урынбасары Васил Шәйхразыев белән очрашты. Бу хакта Бөтендөнья татар конгрессының матбугат хезмәте хәбәр итә.

Татарстанга Корбан бәйрәме өчен Россиянең башка төбәкләреннән сарыклар кертүне тыячаклар. Хәзерге вакытта ветеринария хезмәте ТР мөселманнары Диния нәзарәте белән корбанлык хайваннарны бары тик республикада гына сатып алу мәсьәләсен килештерә. ТР Министрлар Кабинетының Баш ветеринария идарәсе башлыгы урынбасары Габделхак Мотыйгуллин «Татар-информ» агентлыгында узган матбугат конференциясендә шулай дип белдерде.

Чаллының ГЭС бистәсе Муса Җәлил проспектындагы 9/1нче йорт фасадында герой-шагыйрьнең портреты төшерелгән мурал барлыкка киләчәк. Архитектура, шәһәр төзелеше һәм торак үсеше идарәсенең генераль план һәм территорияләрне үстерү бүлеге башлыгы Мәликә Шәмсиева мэриядә узган матбугат конференциясендә шул хакта хәбәр итте.

Россия туриндустрия берлеге быел Россия Федерациясеннән читтә ял итүчеләр саны 10 миллионга җитәр дип өметләнә. Бу хакта ТАССта узган матбугат конференциясендә Россия туриндустрия берлеге президенты Илья Уманский белдерде. Аның бәяләве буенча, безнең илдә «эшләр начар бармый»: тармак 15 процентка үсә.

Татарстан бүгенге көндә хайваннарда һәм кошларда аеруча куркыныч авырулар буенча имин төбәк булып тора. Әмма вирусларны күрше төбәкләрдән кертү куркынычы саклана. Бу хакта Татарстан Министрлар Кабинетының Баш ветеринария идарәсе башлыгы урынбасары Габделхак Мотыйгуллин «Татар-информ» матбугат конференциясендә хәбәр итте.

«Тормыш стиле – мәдәни код» этно-fashion фестивалендә «Миллиард.татар» редакциясе игълан иткән «Милли киемнәр парады» акциясендә «Татнефть-Мирас» номинациясендә җиңгән Нәзифә Рәшитова үзенең үрнәгендә балаларга милли тәрбия бирүе турында сөйләде.