Новости за 01.07.2023

Зәй районының комбайнчы-механизаторлары «Урып-җыю-2023»кә әзерлекләрен белдереп техникаларын комбайннар парадына алып чыкты. бу хакта «Зәй хәбәрләре» газетасы яза.

Лениногорскиның 27 нче балалар бакчасына йөрүче балалар 66 нчы Янгын сүндерү частендә экскурсиядә булды. Бу хакта «Заман сулышы» газетасы яза.

Саба районының Шәмәрдән бистәсендә балалар өчен дини Сабантуй узды. Бу хакта «Саба таңнары» гаетасы яза.

28 июньдә бөтен дөньяда яшәүче мөселманнар Корбан бәйрәмен билгеләп үтте. Күркәм гадәткә кергәнчә, дин тотучылар Красноярск шәһәре Җәмигъ мәчетенә иртәннән үк килә башлады. Быел Красноярск крае мөфтие Гаяз хәзрәт Фәтхуллин Мәккәгә хаҗ кылырга китү сәбәпле, бәйрәм намазын Красноярск крае мөселманнары Бердәм Диния нәзарәте имам-мөхтәсибе Рафаэль Миндубаев үткәрде. Бу хакта Россия Мөфтиләр шурасының матбугат хезмәте хәбәр итә.

Мәскәү өлкәсе Бакчачылар берлеге рәисе һәм Дәүләт Думасы («Бердәм Россия») депутаты Никита Чаплин РИА Новости агентлыгына дачада күршеләр ризалыгыннан башка нинди корылмалар төзергә мөмкин икәнлеге хакында сөйләде.

Якшәмбе төнлә һәм көндез Татарстан территориясендә яшенле яңгырлар көтелә. Җилнең тизлеге урыны белән секундына 15-20 метрга кадәр җитәчәк, дип кисәтә ТР Гидрометеорология һәм әйләнә-тирә мохитне күзәтү идарәсе.

ТР Дәүләт Советы Рәисе Фәрит Мөхәммәтшин Мәскәү шәһәр Думасы башлыгы Алексей Шапошниковка «ТАССР оешуга 100 ел» медален тапшырды һәм юбилее белән котлады. Бүләкләү башкалада Сабан туен ачу тантанасы вакытында булды.

Корбан бәйрәменең икенче көнендә Саратов шәһәренең Ислам комплексы ишегалдында теләгән һәркемне пылау белән сыйладылар. Бу хакта Россия Мөфтиләр шурасының матбугат хезмәте хәбәр итә.

Саранчаның Татарстанга һөҗүм итү ихтималы бар, әмма республика корткычлар белән көрәшергә әзер. Биология фәннәре кандидаты, КФУ доценты Николай Шулаев «Татарстан-24» телеканалына биргән интервьюсында шулай дип белдерде.

Мәскәүдә гомумшәһәр Сабан туе башланды. Башкалада уза торган әлеге бәйрәм – үзенә бер төрле, дип белдерде Татарстан Дәүләт Советы Рәисе Фәрит Мөхәммәтшин, Россия төбәкләре һәм чит илләрдәге тантаналарга нәтиҗә ясап.

Төркиянең Кахраманмараш провинциясендә 3,5 магнитудалы җир тетрәү теркәлгән. Илнең табигый бәла-каза нәтиҗәләрен бетерү идарәсе (AFAD) Twitter социаль челтәрендә шул хакта хәбәр итә.

ТР Рәисе Рөстәм Миңнеханов бүген Татарстанның Тәтеш районында «Валда Шинясь» - мордва мәдәнияте бәйрәме узуын искәртте. ТР җитәкчесе Кемероводан (ул анда Федераль Сабан туенда катнаша) халык бәйрәмендә катнашучыларны һәм кунакларны тәбрик итте.

Казанның Дәрвишләр бистәсендәге Комсомол күлендә бер ир-ат ял итүчеләрнең күз алдында батып үлгән. Бу хакта «Татар-информ» агентлыгына Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр иттеләр.

Әлмәттә ике автомобиль бәрелешкән, ике кеше зыян күргән. Бу хакта «Татар-информ» агентлыгына авариянең шаһитлары хәбәр итте.

1-21 июльдә балалар һәм яшүсмерләр өчен XXIV #әдәбимарафон проектына старт бирелде. Марафонда катнашу өчен гаризалар рәсми берләшмәдә кабул ителә.

Татарстан юлында авария аркасында йөк машинасына ут капкан.

Бүген социаль челтәрләрдә шуның видеосы чыкты.

Республика Дәүләт автоинспекциясендә «Татар-информ» агентлыгына хәбәр итүләренчә, юл һәлакәте М7 трассасының 869нчы километрында булган.

Volvo автомобиленең йөртүчесе тиешле дистанция сакламаган һәм алда барган Opel машинасына килеп бәрелгән.

Табиблар җиңел машинада барган пассажирларны караганнан соң өйләренә кайтарып җибәргән.

Татарстан Рәисе Рөстәм Миңнеханов Кемеровоның «Мөнирә» Җәмигъ мәчете белән танышты һәм төбәк җитәкчелегенең җирле татарлар өчен яңа объектлар ачуга бәйле планнары хакында белде. Бу хакта ТР җитәкчесенең матбугат хезмәте хәбәр итә.

Пенза өлкәсе Урта Әләзән авылында корь авыруы таралган, авылда карантин башланган. Туй мәҗлесләре, корбан ашларын үткәрү, массакүләм чаралар үткәрү тыелган. Бу хакта Урта Әләзән авылының телеграмдагы каналы хәбәр итә.

Татарстанда кеше үтерү турында җинаять эше кузгатылды. Бу хакта РФ Тикшерү комитеты ТР буенча идарәсе җитәкчесенең өлкән ярдәмчесе Андрей Шептицкий хәбәр итте.

Габдулла Кариев исемендәге Казан татар дәүләт яшь тамашачы театры киләсе 36 нчы сезонда тамашачыны «Ал җилкәннәр» спектакле премьерасы белән сөендерәчәк. Шул уңайдан театр коллективы журналистларны спектакльнең ачык репетициясенә чакырды.

2001 елдан Федераль Сабантуй Россиянең бер төбәгендә Татарстан белән берлектә үткәрелә, һәм 2024 елда бәйрәм үткәрү эстафетасы Марий-Эл республикасына күчте.

Кемеровода узган Федераль Сабан туенда Татарстан егете Радик Сәлахов батыр калды. Асболют батырга ул Башкортстан егете Турал Азимов белән көрәште.

Россиялеләр алдагы Яңа ел бәйрәмнәрендә 10 көн ял итәчәк. Россия өч яклы комиссиясе бу тәкъдимне хуплады, дип хәбәр итә ТР вице-премьеры Татьяна Голикова аппараты. Бу хакта «Российская газета» яза.

Татарстан Рәисе Рөстәм Миңнеханов бүген эш сәфәре белән Кемерово өлкәсенә килде. Ул биредә XXIII Федераль Сабан туенда катнаша, дип хәбәр итә ТР җитәкчесенең матбугат хезмәте.

Казанда иртәнге сәгать 5 булганда, Кемеровода халык сабантуйга агыла башлаган иде инде. Кемеровоның Мәскәү мәйданында XXIII Федераль сабантуй һәм III Шахтерлар сабантуе бара.