Новости за 12.07.2023

Чаллыда төзелеп килә торган «Җәмигъ» мәчетендә беренче тапкыр Коръән аятләре яңгырады. Шәһәр мэры Наил Мәһдиев зурлап корбан ашы уздырды. Мәҗлескә мәчет төзелешендә актив катнашучылар: шәһәр мөхтәсибәте, хәйриячеләр, битараф булмаган шәһәрдәшләр чакырулы иде, дип яза «Шәһәр Чаллы» газетасы.

Чиләбедә Зәйнулла Рәсүлев исемендәге Дини үзәктә балалар өчен җәйге сменалар эшли. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә.

Иркутск өлкәсенең Чун районында 8 июль көнне татар халык бәйрәме Сабан туе булды. Зермокан елгасы ярында ул икенче тапкыр узды. Бәйрәмдә Брат һәм Усы районнарыннан татар оешмалары вәкилләре катнашты.

6 июльдән 5 сентябрьгә кадәр «Дәүләт хезмәте» порталында яңадан беренче сыйныфка гаризалар кабул ителә. Бу турыда Татарстан Мәгариф һәм фән министрлыгы Россия Федерациясе Цифрлы үсеш, элемтә һәм массакүләм коммуникацияләр министрлыгына ылтама белән хәбәр итте.

Һава торышы начар булу сәбәпле, Әгерҗедә 618 кеше яши торган тагын 150 шәхси йорт электр энергиясез калган. Бу хакта Россия Гадәттән тыш хәлләр министрлыгының Татарстан Республикасы буенча Баш идарәсенең матбугат хезмәте хәбәр итә.

Кайбер илләрне «дустанә булмаган» дәүләтләр исемлегенә керткәч, Көнчыгыш илләре белән тыгыз элемтәләре булган Татарстанның роле артты, дип белдерде Татарстан Рәисе Рөстәм Миңнеханов. Шул ук вакытта Көнчыгыш илләре Россиягә һәм аның белән хезмәттәшлекне ныгытуга зур кызыксыну күрсәтә, дип билгеләп үтте ул ОТР телеканалына биргән интервьюсында.

Татарстанга сәнәгать төбәге буларак, транспорт артерияләренә ия булу мөһим һәм шуларның берсе – төзелеп килә торган М12 трассасы була. Декабрьдә юлны ачачаклар, шулай итеп Мәскәүдән Татарстан башкаласына хәтле юл 6,5 сәгатькә кыскарачак, диде Татарстан Рәисе Рөстәм Миңнеханов ОТР телеканалына биргән әңгәмәсендә.

Татарстан, грамоталы җитәкчелек ярдәмендә, хәтта ил өчен иң авыр булган 90нчы елларда да, җитештерүне саклап калды гына түгел, ә арттырды да. Республика предприятиеләр белән идарә итүдә дәүләт катнашуын саклап калуга ориентлашты, дип билгеләп үтте Татарстан Республикасы Рәисе Рөстәм Миңнеханов ОТР телеканалына биргән интервьюсында.

Теләсә кайсы төбәк башлыгы икътисади күрсәткечләргә генә түгел, ә халыкның тормыш сыйфатына да ориентлашырга тиеш, диде Татарстан Рәисе Рөстәм Миңнеханов ОТР телеканалына биргән әңгәмәсендә. Республиканың төрле рейтингларда үзгәрешсез рәвештә алдынгы булуы турында сөйләгәндә борынгы әйтемне искә алды.

Бүген Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев җитәкчелегендәге делегация янгыннан зыян күргән Курган өлкәсенең Йолдыз (Эчкен) авылына килде.

Свердловск өлкәсенең Невьянск шәһәр округы Шайдуриха авылында яшәүчеләрне янгын аркасында эвакуациялиләр, дип хәбәр итә ТАСС.

Татарстанның атказанган фән эшлеклесе, Татарстан Республикасы Дәүләт премиясе лауреаты, Россиянең югары һөнәри белем бирүдә мактаулы хезмәткәре, Казан федераль университетының атказанган профессоры Александр Маклаков 93 яшендә кичә вафат булган. Бу хакта университетның матбугат хезмәте хәбәр итте.

Татарстан Фәннәр академиясенең Шиһабетдин Мәрҗани исемендәге Тарих институтын «дәүләт бюджет учреждениесе»ннән «фәнни» дип үзгәртергә телиләр. Татарстан Республикасы Министрлар Кабинеты карары проектын республиканың Мәгариф һәм фән министрлыгы әзерләгән. Документ «Рәсми Татарстан» порталында урнаштырылды һәм коррупциягә каршы экспертиза уза.

Бөгелмәдән ике педагог – тарих укытучысы һәм физик тәрбия укытучысы, үз теләкләре белән хәрби хезмәткә алынырга һәм махсус хәрби операция зонасына китәргә карар кылган.

Татарстан мәдәният министры Ирада Əюпова җырчы Илсөя Бәдретдинованы чыдамлык үрнәге дип атады.

Россия Диния нәзарәтеннән хәйрия юлламалары белән исламның изге урыннарына җибәрелгән төркемнең хаҗга сәяхәте уңышлы тәмамланды. Мәккәгә хаҗ кылу мөмкинлеге Россиянең алтмыш төбәгеннән йөзгә якын кешегә - руханилар, мөселман җәмгыятьләре активлары, сугыш хәрәкәтләре ветераннарына бирелде. Россия Мөфтиләр Шурасы сайты шул турыда яза.

Казан мэриясе игълан иткән Казан шәһәренең сәнгати образын формалаштыру, шәһәрне сурәтләү максатыннан «Саумы, Казан!» рәсем сәнгате конкурсына гаризалар 15 июльгә кадәр кабул ителә.

Казанның Совет районында Mercedes-Benz машинасына ут төркәннәр, полиция хезмәткәрләре бу факт буенча тикшерү үткәрә. Бу хакта «Татар-информ»га Россия Эчке эшләр министрлыгының Казан идарәсе матбугат хезмәтендә хәбәр иттеләр.

Дәүләт Думасы депутатлары Ислам банкингы турындагы закон проектын карады. Дәүләт Думасының финанс базары комитеты документны икенче укылышта кабул итәргә тәкъдим итте, дип хәбәр итә ТАСС. Проект сынау үткәрүне күздә тота, аның барышында Татарстанда һәм башка берничә төбәктә финанслау буенча партнерлык (ислам) эшчәнлекнең хокукый режимы урнаштырылачак.

Мошенниклар ялган сайтлар ярдәмендә Россия банклары яки полиция хезмәткәрләрен тикшерү хәйләсен уйлап тапкан. Шул рәвешле, алар потенциаль корбаннарының ышанычын яулый, аны кредит рәсмиләштерергә һәм барлык акчаны җинаятьчеләр счетына күчерергә инандыра. Бу хакта РИА Новости агентлыгы Саклык банкына сылтама белән хәбәр итә.

Казан полициясе хезмәткәрләре кайнар эзләр буенча җинаятьне ачты, дип хәбәр итә Россия Эчке эшләр министрлыгының Казан идарәсе матбугат хезмәте.

Мобиль операторларның берсе шәхси машинасында сәяхәт итүчеләр өчен аудиогид төзегән. Аның ярдәмендә кунаклар Татарстан мәдәнияте белән якыннанрак таныша һәм Казан – Болгар маршрутының уникаль истәлекле урыннары турында күп кенә нечкәлекләрне белә алачак.

Россия туристлары, татарстанлыларның үзләренә караганда, республиканың истәлекле урыннарына активрак сәяхәт кыла. ТР Туризм буенча дәүләт комитеты башлыгы Сергей Иванов Төбәк белән идарә итү үзәгендә туры эфир вакытында шундый статистика белән уртаклашты. Ул шулай ук кунаклар республиканы килеп күрергә тиешле өч сәбәпне дә атады.

Курган өлкәсе Эчкен авылында янгында зыян күргән гаиләләрнең балаларына никах укыдылар. Никах туен үткәрүне Бөтендөнья татар конгрессы үз өстенә алган. Милли Шура вәкилләре Эчкен авылында төзелеш эшләре башлануга багышланган күчмә утырыштан соң никах туенда катнашты.

«Микулай» фильмының прокат вакыты тәмамланып килә. Оештыручылар хәбәр итүенчә, 14 июльдә Казанда фильмның соңгы махсус күрсәтелеше билгеләнгән.