Татарстанга Корбан бәйрәме өчен башка төбәкләрдән сарыклар кертүне тыячаклар
Татарстанга Корбан бәйрәме өчен Россиянең башка төбәкләреннән сарыклар кертүне тыячаклар. Хәзерге вакытта ветеринария хезмәте ТР мөселманнары Диния нәзарәте белән корбанлык хайваннарны бары тик республикада гына сатып алу мәсьәләсен килештерә. ТР Министрлар Кабинетының Баш ветеринария идарәсе башлыгы урынбасары Габделхак Мотыйгуллин «Татар-информ» агентлыгында узган матбугат конференциясендә шулай дип белдерде.
«Сарыкларны бары тик Татарстанда гына сатып алырга чакырабыз. Киләсе елда Корбан бәйрәме 16 июньдә узачак. Сарыкларны башка төбәкләрдән алып кайтуны килештермәячәкбез. Безгә республиканың иминлеген саклап калу мөһим. Быел корбанлык хайваннарны Чувашиядән алып кайттылар», - диде спикер.
Мотыйгуллин әйтүенчә, төбәккә башка субъектлардан авыру сарыклар алып кайту ихтималы бар. «Әгәр төбәктә ниндидер авыру ачыкланса, анда сату тыела һәм төрле юллар белән имин төбәкләр аша сарыкларны сатып җибәрергә тырышалар», - дип ачыклык кертте ул.
Быел Татарстанда Корбан бәйрәмен 28-30 июньдә билгеләп үттеләр. Чара оешкан төстә узды, күңелсез хәлләр булмады.