Новости за 30.07.2023

Бүген Питрәч районында җиденче тапкыр «Скорлупино» Бөтенроссия фестивале булды. Быел фестиваль 2023 ел - Милли мәдәниятләр һәм гореф-гадәтләр елы кысаларында узды. Бу хакта «Теләче-информ» хәбәр итә.

Бүген Җиңү паркында бәйрәм уңаеннан Актанышта Хәрби диңгез флотында хезмәт итүчеләргә һәйкәл ачылды. Бу хакта Актаныш муниципаль районы матбугат хезмәте хәбәр итә.

Алабугада бүген социаль ипотека буенча торак алуга чиратта 92 кеше тора. Көзен «Танайка-2» микрорайонында Болгар урамында ике яңа йорт төзелеп бетәчәк. Бу хакта «Алабуга нуры» хәбәр итә.

Бүген, июль аеның соңгы якшәмбесендә Ватан алдында хәрби бурычларын үтәгән Азнакай ир-егетләре Хәрби-диңгез флоты көнен билгеләп узды. Бу хакта «Азнакай» сайтында хәбәр ителә.

Чувашиядә начар һава шартлары Идел елгасында бәхетсезлеккә сәбәп булган. 29 июльдә 20.30 сәгатьтә көчле яшен вакытында сулыкта җиңел моторлы катер әйләнеп капланган һәм баткан. Ул Амоксар утравыннан уң як ярга, Чабаксар округының Адылъял авылы ягына йөзгән булган. Якынча мәгълүматлар буенча, 5 пассажирга исәпләнгән судно бортында 10 кеше булган, шул исәптән 6 бала.

Бүген Балтач районы Бөрбаш Сәрдегәне авылында Чишмә бәйрәме узды. Бәйрәм, 2013 елда Габделнур Хөсәенов төзекләндерә башлап, 2016 елда җиде нәни чишмәне берләштереп ясалган мул сулы «Нурзидә» чишмәсе янында үтте.

31 июльдә төнлә һәм иртән Татарстанда һава шартлары начарлануы көтелә. Бу хакта Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Татарстан Рәисе Рөстәм Миңнеханов кичә – 29 июльдә Идел буе федераль округындагы давыл аркасында һәлак булган кешеләрнең гаиләләренең кайгысын уртаклаша. Бу хакта «Татар-информ»га Татарстан Рәисенең матбугат хезмәте җитәкчесе Лилия Галимова хәбәр итте.

Августта Федераль резерв системасы, Европа үзәк банкы һәм Россия Банкының процент ставкалары буенча утырышлары көтелми. Бу рубльнең әлеге карарлардан җитди ориентирлар алмаячагын аңлата, позитив та, тискәре дә яңалык булмаячак. Бу хакта «Россия газетасына» икътисадчы, «BitRiver» оешмасының коммуникацияләр буенча директоры Андрей Лобода сөйләде.

Марий Элда давыл вакытында һәлак булучылар арасында Питрәч районы Көек авылы кешеләре дә бар. Бу хакта Питрәч районы башлыгы Илһам Кашапов хәбәр итте.

Татарстанның вице-премьеры – Татарстанның Россиядәге Тулы вәкаләтле вәкиле Равил Әхмәтшин Хәрби-диңгез флоты көнендә «1941-1942 елларда Севастопольне Геройларча саклау мемориалы»на чәчәкләр куйды. Бу хакта вәкиллекнең матбугат хезмәте хәбәр итә.

Марий Элда давыл вакытында һәлак булучылар арасында Яшел Үзәндә яшәүче өч кеше дә бар. Бу хакта Яшел Үзән мэры Михаил Афанасьев хәбәр итә.

Россия Президенты Владимир Путин Санкт-Петербургта һәм Кронштадта Россия Хәрби-диңгез флоты көне уңаеннан уза торган төп хәрби-диңгез парадында Татарстанда төзелгән «Зеленый Дол» кече ракета корабы (МРК) экипажын сәламләде.

Татарстан Республикасының Лаеш районында 29 июль кичендә булган давыл вакытында 14 яшьлек кыз бала һәлак булган.

Агымдагы елның беренче алты аенда Татарстанда торак шартларын 36 меңнән артык гаилә яхшырткан. Бу хакта Росреестрның Татарстан буенча идарәсенең матбугат хезмәте хәбәр итә.

Марий Элда яшен һәм көчле җил аркасында һәлак булучылар саны 8 кешегә җитте. Бу хакта Россия Гадәттән тыш хәлләр министрлыгының Марий Эл Республикасы буенча Баш идарәсе матбугат хезмәтендә хәбәр иттеләр.

Россия Президенты Владимир Путин Сенегал башлыгы Маки Салл белән әңгәмә барышында Татарстанның кунакларны кабул итә белүен билгеләп үтте. Салл Россиягә сәфәрен нәкъ менә Татарстаннан башлаган иде.

Бүген Татарстанда алмашынучан болытлы һава торышы көтелә. Урыны белән кыска вакытлы яңгыр, урыны белән көчле, кайбер районнарда яшенле һәм бозлы яңгыр фаразлана. Җил көньяк-көнчыгыштан 6-11 метр, урыны белән 19-21 метр тизлектә исәчәк. Һава температурасы +26..+31 градус, көнчыгыш районнарда +34 градуска кадәр булырга мөмкин. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Начар һава торышы сәбәпле, Идел буе федераль округында тугыз кеше (җидесе – Марий Элда) һәлак булган, 76 кеше имгәнгән. Бу хакта Россия Гадәттән тыш хәлләр министрлыгы матбугат хезмәте хәбәр итә.

Теләче районында Баландыш авылында Түгәрәк уен үтте. Район башлыгы Нәҗип Хаҗипов район хәбәрләрен җиткерүдә «Теләче» газетасының роле мөһим булуын әйтте.

Түбән Камада «Мәктәпкә җыенырга ярдәм ит!» республика хәйрия акциясе башланды. Бу хакта «Туган як» сайтында хәбәр ителә.

Мәскәү белгечләре Алабуга җәмәгать транспортының яңа схемасын эшли. Яңа схема буенча маршрут автобуслары 2024 елның гыйнварында ук йөри башлар дип көтелә. Бу хакта шәһәр трибунасыннан район башкарма комитеты җитәкчесенең инфраструктура үсеше буенча урынбасары Андрей Томилин сөйләде. «Алабуга нуры» шул хакта яза.

Әгерҗедә «Автоледи» бәйгесенең район этабы узды. Гүзәл затлар арасында узган бәйгенең быелгысы шуның белән үзенчәлекле булды, анда катнашучыларның күбесе тәүге тапкыр сыналучылар иде. Бу хакта «Әгерҗе хәбәрләре» сайтында хәбәр ителә.