Новости за 20.07.2023

29 июльдә Көньяк Сахалинда Сабан туе була. Шул уңайдан хезмәт коллективлары, милли берләшмәләр һәм иҗтимагый оешмаларны бәйрәм ачылышында тантаналы йөрештә катнашырга чакыралар. Бу хакта SakhalinMedia агентлыгы Көньяк Сахалин хакимиятенең матбугат хезмәтенә сылтама белән хәбәр итә.

«Бигеш» халыкара аэропортында Мисырдан кайтучы туристларны тикшерү көчәйтелде. Роспотребнадзор белгечләренең югары режимда эшләве «билгесез бизгәк» белән бәйле. Бу хакта автошәһәрдәге матбугат конференциясендә Чаллының баш санитария табибы Илгизәр Бариев хәбәр итте.

Казанда гомуми файдаланудагы юлларда түләүле муниципаль паркингларның яңартылган реестрын тәкъдим иттеләр. Шул исәптән, аңа тарифы сәгатенә 50, 70 һәм 100 сумга кадәр арткан парковкалар кергән. Бу документ шәһәрнең хокукый актлары җыентыгына кертелгән.

«Бу уку елында балаларыбыз Татарбай авылы мәктәбенә укырга барыр дип өметләнәбез һәм ышанабыз», - диде Юлияна Мәгъзумова.

Ангола Татарстан белән тагын да тыгызрак хезмәттәшлек итәргә, шулай ук бу хезмәттәшлекне берничә юнәлеш буенча киңәйтергә тели. Бу хакта Анголаның Россиядәге Гадәттән тыш һәм Тулы вәкаләтле илчесе Аугусто да Силва Кунья Татарстанның Россиядәге Тулы вәкаләтле вәкиленең халыкара һәм икътисади элемтәләрне координацияләү буенча урынбасары Фәннур Гарифуллин белән очрашуда белдерде.

Хәрби комиссариатка җитди сәбәпсез килмәгән өчен штраф 50 мең сумга кадәр артачак. Дәүләт Думасының Дәүләт төзелеше һәм закон комитеты Административ хокук бозулар турындагы кодекска төзәтмәләрне хуплады. Бу хакта РИА Новости хәбәр итә.

Бүген «Хозур» нәшрият йорты YouTube-та «Ибн Фадлан» документаль-нәфис фильмын чыгарды. Бу хакта Татарстан мөфтиенең мәгълүмати сәясәт буенча урынбасары, нәшрият җитәкчесе Ришат хәзрәт Хәмидуллин фильмны төшереп дөньяга чыгарган төркем белән очрашуда хәбәр итте, дип яза ТР Диния нәзарәте. Шул рәвешле, хәзер кинофильмны барлык теләүчеләр интернет челтәрендә бушлай карый алачак.

Россиядә электросамокат, монотәгәрмәч, гироскутер һәм башка индивидуаль мобильлек чараларын (СИМ) мопедларга тиңләштерелергә мөмкин. Алар белән идарә итү өчен М категориясе булган йөртү таныклыгы алырга мәҗбүр итәчәкләр.

Татар провинцияләренең аксакаллары Кабулда эшли башлаган Россия эшлекле үзәгендә булды. Әфганстан татарлары советы аның мәйданчыгында «Татар-информ» белән хезмәттәшлектә мәгълүмат хезмәтен булдырырга тәкъдим итте.

Казанда җәмәгать транспорты тукталышларында мәгълүмат таблосы сервердагы өзеклек аркасында сафтан чыкты. Шулай ук пассажирлар вакытлыча «Казан транспорт» мобиль кушымтасында автобуслар, трамвайлар һәм троллейбусларның хәрәкәтен күзәтә алмый.

Казанга Самарадан Роберт Мусинның җинаять эше кайтты. Гомуми юрисдикциянең алтынчы кассацион суды карары буенча Татарстан Югары судының җинаять коллегиясе, барлык апелляция шикаятьләрен исәпкә алып, «Татфондбанк»ның элеккеге башлыгының хөкем карарының законлылыгын кабат караячак.

1 августтан эшләүче пенсионерларның пенсияләре гадәттәгечә артачак. Бу индексация түгел, ә өстәмә, ул алдагы елда эш бирүченең эшләүче пенсионерлар өчен социаль кертемнәрне түләвенә бәйле. Арттыру күләме һәр кешенеке аерым исәпләнелә, әмма закон буенча өч пенсия коэффициентыннан арта алмый. Бу хакта «Российская газета» хәбәр итә.

Татарстан Мәгариф һәм фән министрлыгы 2014 елдан башлап РФ субъектларыннан һәм районнарыннан татар балалары өчен профильле тел сменалары үткәрә.

Бүген, 20 июльдә, көнбатыштан килгән атмосфера фронты йогынтысы аркасында Татарстанда температура фоны төшәчәк. Бу хакта ТР Гидрометүзәге хәбәр итә.

18 июльдә Казанның «Черек күл» паркында спикинг-клаб форматында социаль проектлар ясау буенча MUSLIMMOL аралашу кичәсе оештырды. Әлеге очрашу алда торган Бөтенроссия мөселман яшьләре форумында катнашучыларны җыеп китерде, анда иң яхшы стартаплар сайлап алыначак һәм аларны коммерцияле булмаган оешмалар өчен конкурс һәм грант программаларына әзерләячәкләр.

Шимбә, 22 июльдә, Алабугада Җиңел атлетика манежында «Volga Fighting» һәвәскәрләр лигасы кысаларында катнаш көрәш буенча төбәкара турнир (MMA) уза. Алабугага Татарстан һәм якын төбәкләрдән спортчылар килә. Бу хакта «Алабуга нуры» хәбәр итә.

Махсус хәрби операциядә катнашучы Әлмәт кешесенең гаиләсен өченче баласы тууы белән котладылар. Аны бала тудыру йортыннан гаиләсе һәм шәһәр волонтерлары каршы алды. Бу хакта «Әлмәт таңнары» хәбәр итә.

Зәй районының «Созвездие» муниципаль балалар ял лагеренда өченче смена эшли башлады. Анда 123 бала дүрт отрядка бүленеп 21 көн дәвамында мавыктыргыч, үзенчәлекле ял үткәрәчәк. Бу хакта «Зәй хәбәрләре» сайтында хәбәр ителә.

Чаллыда Автозавод районындагы 22/15 йортында яшәүчеләр район хакимияте белән «Безнең ишегалды» республика программасы буенча ишегалларын төзекләндергән хезмәткәрләргә бәйрәм өстәле әзерләп, рәхмәт белдерделәр. Бу хакта «Шәһри Чаллы» хәбәр итә.

Аксубай районы башлыгы Камил Гыйльманов Ватанны саклаучыларга якташлардан рәхмәт сүзләрен җиткерү һәм хәрбиләр белән шәхсән аралашу өчен аларның һәрберсе белән очрашырга тырыша.