Омск өлкәсендә «Татар ишегалды» мәдәни үзәге ачыла
Омск төбәге губернаторы вазифаларын вакытлыча башкаручы Виталий Хоценко Татарстан Премьер-министры урынбасары Васил Шәйхразыев белән очрашты. Бу хакта Бөтендөнья татар конгрессының матбугат хезмәте хәбәр итә.
Губернатор вазифаларын вакытлыча башкаручы билгеләп үткәнчә, Омск өлкәсендә 130 дән артык милләт яши.
«Төбәк территориясе Себер татарларының традицион урнашу урыны булып тора. Мәдәният учреждениеләре каршында татар үзәкләре булдырылды, аларның эшчәнлеге милли традицияләрне һәм гореф-гадәтләрне саклауга юнәлтелгән», - диде Виталий Хоценко.
Төбәк башлыгы Омск өлкәсендә биш татар иҗтимагый оешмасы эшләвен искәртте.
«Татар берләшмәләре Россиядә беренче булып Милләтара һәм конфессияара гуманитар ярдәм үзәген булдыруга зур өлеш кертте. Ул Россия көнендә ачылды», - дип хәбәр иттеләр Омск өлкәсе хөкүмәте матбугат хезмәтендә.
Шулай ук алар Большеречье районындагы «Старина Сибирская» музее территориясендә «Татар ишегалды» мәдәни үзәген төзү турында да фикер алышты. Музей хезмәткәрләре экспозиция әзерли. Оешма ике телдә экскурсияләр уздыра ала торган хезмәткәрне табарга планлаштыра.
Музейга килүчеләр милли ризыклардан авыз итә алачак. Мәдәни үзәктә шулай ук хуҗалык корылмалары һәм йорт хайваннары да була.
Килүчеләр бердәм билет буенча яңа музей локациясенә эләгә ала. Үзәкне бер айдан ачарга җыеналар.