Новости за 25.03.2023

Кукмара муниципаль районының «М.П.Прокопьев ис. тулы булмаган урта мәктәбе» муниципаль бюджет белем бирү учреждениесендә Татарстан Республикасы авыл хуҗалыгы һәм азык-төлек министрының беренче урынбасары Наил Залаков «Смартфонда нәрсә яшеренгән: мобиль куркынычлыкны тикшерәбез» темасына цифр дәресе үткәрде. Бу хакта министрлыкның матбугат хезмәте хәбәр итә.

Бөгелмә муниципаль районы башлыгы Линар Закиров хезмәтләрнең язгы ташуга әзерлеген тикшерде. Шәһәрнең иң куркыныч территорияләрен, Татар-Димскәе авылын, шәһәр тибындагы Карабаш бистәсен тикшерде. Торак пунктларда яшәүчеләр һәм махсуслаштырылган хезмәт вәкилләре белән аралашты.

Лениногорскида яшәүче 52 яшьлек хатын-кыз җыйган акчасын арттырырга теләп, мошенниклар капкынына эләккән. Ул, интернетта инвестицияләр ярдәмендә акчаларын арттыру мөмкинлеге турында реклама күргәч, гариза калдырырга карар иткән. Шул ук көнне, инвестицияләү нәтиҗәсендә бик күп керем вәгъдә итүчеләр аңа үзләре шалтыратып, табыш алу схемасы турында сөйләгән.

Азнакай шәһәренең 12нче һәм 6нчы территориаль иҗтимагый үзидарәләр урнашкан гимназия бинасына хатын-кызлар «Солдатларга өй токмачы» акциясендә катнашты.

Галиәсгар Камал исемендәге Татар дәүләт академия театры ике елдан соң яңа бинага күчәчәк. Шул вакытта яңа бинага беренче тамашачылар килә ала. Бу хакта театр директоры Илфир Якупов хәбәр итте.

Татарстан төзелеш, архитектура һәм торак министры Марат Айзатуллин ТР Хөкүмәте Йортында узган традицион республика киңәшмәсендә социаль-мәдәни өлкә объектларын, гидротехник корылмаларны һәм күпфатирлы йортларны капиталь ремонтлау эшләренең торышы турында сөйләде.

Татарстанда «Челныводоканал» эшчесе үлгәннән соң, хезмәтне саклау кагыйдәләрен бозу турында җинаять эше ачылды.

Казан Башкарма комитеты Тел культурасы өлкәсендә милли сәясәтне гамәлгә ашыру бүлеге җитәкчесе Айсылу Лерон «Әйтер сүз» сәхифәсендә туры эфирда барган әңгәмә барышында социаль челтәрләрдә зур аудиторияле татар төркемнәре булдыру серен ачты.

Федерация Советының Икътисади сәясәт комитеты РФ Сәнәгать һәм сәүдә министрлыгына 2023 елның 1 июненә кадәр ана капиталына автомобиль сатып алырга рөхсәт итү мәсьәләсен өйрәнергә тәкъдим итте. Бу хакта автомобиль сәнәгатен үстерү темасына парламент тыңлаулары нәтиҗәләре буенча комитет тәкъдимнәрендә әйтелә. РИА Новости шул хакта хәбәр итә.

Татарстан Рәисе Рөстәм Миңнеханов ТР Хөкүмәт Йортында узган традицион киңәшмәдә муниципалитетлар җитәкчеләренә юлдагы чокырларны ремонтлауны контрольгә алырга кушты. Бу хакта республика җитәкчесенең матбугат хезмәте хәбәр итә.

Казан Башкарма комитеты Тел культурасы өлкәсендә милли сәясәтне гамәлгә ашыру бүлеге җитәкчесе Айсылу Лерон «Әйтер сүз» сәхифәсендә туры эфирда барган әңгәмә барышында яңа вазифада нинди проектлар өчен җаваплы булачагы турында сөйләде.

Татарстан Рәисе Рөстәм Миңнеханов ТР Хөкүмәт Йортында узган традицион киңәшмә барышында республика мөфтияте җитәкчелегенә һәм муниципалитетлар башлыкларына Рамазан аенда мәчетләрдә иминлекне тәэмин итүне йөкләде.

Машина йөртүчеләргә автомобильнең кышкы тәгәрмәчләрен җәйгегә алмаштырырга әлегә иртә, чөнки мартның соңгы көннәрендә төнлә һава температурасы төшүе көтелә. Моннан тыш, шулай ук явым-төшем фаразлана. Бу хакта «Известия» яза.

Татарстанның Актаныш районында «Лада» фургоны йөртүчесе тракторга бәрелгән. Юл-транспорт һәлакәте Поисево авылы янында булган.

Бүген, 25 мартта, «Казан» гаилә үзәгенең күзәтү мәйданчыгы яңадан эшли башлады. Ул 9 гыйнвардан бирле эшләүдән туктаган иде. Бу хакта Казанның Парклар һәм скверлар дирекциясе хәбәр итә.

Татарстан Республикасы мәдәният министры Ирада Әюпова Татарстан мәдәният хезмәткәрләрен һөнәри бәйрәмнәре белән котлый.

Татарстанда 2022 елда утыздан артык бала туберкулез белән авырган. Бу хакта «Татар-информ»дагы матбугат конференциясендә Татарстан Сәламәтлек саклау министрлыгының баш балалар фтизиатры, республика Туберкулезга каршы диспансерның баш табибы урынбасары Рәмзия Фатыйхова сөйләде.

Шимбә Татарстан территориясендә аязучан болытлы һава торышы көтелә. Секундына 15-17 метр тизлектә көчле җил фаразлана. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

1 апрельдән социаль пенсияләрнең традицион артуы көтелә. Хезмәт министрлыгында аныклаганча, индексация күләме узган елда пенсионерларның яшәү минимумы үсеше темпларыннан чыгып исәпләнә. Бу хакта «Российская газета» яза.

Казанда республикакүләм «Ел укытучысы-2023» бәйгесенә йомгак ясалды. «Ел укытучысы» исеменә быел Иннополис лицеенда математика укытучысы Арман Костанян лаек булды. «Укытучы булу – ул «круто», – диде ул җиңүеннән соң журналистларга.

Төркиянең көньяк-көнчыгышында Кахраманмараш провинциясе территориясендә 4,7 магнитудалы җир тетрәү булды. Бу хакта РИА Новости сейсмологларга сылтама белән хәбәр итә.

Бүген иртән Татарстанда урыны белән, шулай ук Казанда томан төште. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

2023 елда Татарстанда «Имин һәм сыйфатлы юллар» илкүләм проекты буенча 133 юл объекты ремонтланачак. Бу максатка 11 миллиард сумнан артык финанслар бүленгән, аларның 4,6 миллиарды – федераль бюджеттан, ә 6,4 миллиарды Татарстан бюджетыннан юнәлдерелә, дип хәбәр итә ТР Транспорт һәм юл хуҗалыгы министрлыгы.

21-22 мартта Әлмәттә Татарстан идарәче кадрлар резервының белем бирү модуле кысаларында республика чарасы узды. Район башлыгы Тимур Нагуманов муниципалитеттагы эш тәҗрибәсе белән уртаклашты, шәһәрне үстерү стратегиясе турында сөйләде, кадрлар резервында катнашучыларның сорауларына җавап бирде.

Түбән Камада юллардагы чокырларны ремонтлауга ел башына район бюджеты акчаларыннан 50 млн сум акча бүлеп бирелгән. Бу хакта Түбән Кама муниципаль районы советының һәм шәһәр советының берләштерелгән сессиясендә бюджетлар һәм финанслар департаменты җитәкчесе Светлана Логинова хәбәр итте.