Новости за 06.01.2023

Аксубай районы Кәкре Күл урта мәктәбенең 3 сыйныф укучысы Арсений Крайнов «Укучының мәдәни көндәлеге» республика проекты кысаларында «Синичкин день» республика бәйгесендә 1 нче урынны алган. Бу хакта «Аксубай» газетасы яза. 

Кукмараның Комсомол мәйданында «Кукмара киез итекләре – 2023» –  #ITEKFEST фестиваль-ярминкәсе үтте. Бу хакта «Хезмәт даны» газетасы яза. 

31 декабрь көнне Әлмәт районының Елхово авылы мәчете каршында балалар ечен дини укулар, уеннар оештырылды. Бу хакта «Әлмәт таңнары» газетасы яза.

Бүген Казанның Комсомол күлендә кыш көне су коенучылар – «моржлар» өчен уелган бәкедә сәламәтләндерү акциясе оештырылды. Кече суднолар буенча дәүләт инспекциясе (ГИМС) инспекторлары һәм Казанның Бөтенроссия суда коткару җәмгыяте (ОСВОД) коткаручылары анда куркынычсызлыкны тәэмин итте. Бу хакта Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр.

Татарстан мәктәпләрендә 2022-2023 уку елында меңнән артык яшь белгеч эшли башлады, шуларның 400дән артыгы – Казанның мәгариф оешмаларында, дип хәбәр иттеләр ТР Мәгариф һәм фән министрлыгы матбугат хезмәтендә.

21 декабрьдән 8 гыйнварга кадәр Казан автоинспекторлары «Кышкы каникуллар» дигән профилактик чара үткәрә, шушы вакыт аралыгында алар балаларны автомобиль салонында тиешенчә утыртып йөртмәгән шоферларны ачыклый.

Мәскәүдәге Татар мәдәни үзәгенең сәнгать җитәкчесе Илдар Шиһапов һәм «Илдан» татар бию ансамбле җитәкчесе Рәдиф Яваев Яңа елның милли исеме турында «Мослента»га сөйләгән.

Татарстан һәм Башкортстаннан чыккан кешеләр үз автомобильләренең номерларында Россия триколоры урынына милли флаглар төсен урнаштыра башлаган. Төгәлрәк әйтсәк, RUS хәрефләрен TAT хәрефләренә алмаштыралар, дип хәбәр итә «Новые Известия».

Россиянең Фән һәм югары белем министрлыгы Татарстанның югары уку йортларына 2023 елда абитуриентлар кабул итү өчен 20 844 бюджет урыны бүлеп бирде. Аларның 60 проценты бакалавриат программаларына, 30 проценты – магистратурага һәм 10 проценты белгечлеккә туры килә, дип хәбәр иттеләр Татарстан Республикасының Мәгариф һәм фән министрлыгын матбугат хезмәтендә.

Башкортстанның Сибай шәһәреннән махсус хәрби операция зонасына Сибай концерт-театр берләшмәсе артисты Фларид Биргалин китте. Аның белән бергә филармониядәге хезмәттәшләре һәм бертуган абыйсы да хәрби зонага юл тоткан. Бу хакта «Герои спецопреции Z» телеграмм-каналы хәбәр итә, дип яза «Башинформ».

Республика Дәүләт автоинспекциясе республика халкын юлда сак булырга һәм Татарстанда аномаль салкыннар булганда ерак сәфәрләргә чыкмаска өнди.

Татарстанда Татарстан Президенты вазифасы атамасына кагылышлы үзгәрешләр кертү эше төгәлләнде. Татарстан Республикасы Конституциясенә шул турыдагы төзәтмәләрне Татарстан Республикасы җитәкчесе Рөстәм Миңнеханов раслады.

Чаллыда Җәмәгать судының 3 һәм 6нчы бүлекләре бинасына бер ир-ат өч патронлы травматик пистолет белән килгән. Утлы коралны судка килүчеләрне карап керткән вакытта суд приставы Сергей Язынин тапкан.

Милли китапханәдә «Туңган як: Суоми» документаль фильмы беренче тамашачыларга күрсәтелде. Алар арасында әлеге фильм геройларының берсе – музыкант Дениз Бәдретдин дә бар иде.

Православие динен тотучыларга Россия ислам оешмалары җитәкчеләре Раштуа бәйрәме уңаеннан котлау хатлары юллады. Бу хакта РИА Новости хәбәр итә.

Дагыстан Хөкүмәтенең элеккеге рәисе Магомед Абдуллаевны автомобиль бәрдергән, ул хастаханәдә үлгән, дип хәбәр итте җомга көнне республиканың Эчке эшләр министрлыгы матбугат хезмәте. Бу хакта Интерфакс хәбәр итә.

1 гыйнвардан башлап музей-тыюлыкта 25 меңнән артык кеше булды, килүчеләр тагын күпләп көтелә: кагыйдә буларак, Яңа ел бәйрәмнәрендә 6 һәм 7 гыйнвар көннәре иң күп кеше йөри торган көннәр була, дип сөйләде «Татар-информ»га Зөя утрау-шәһәрчегенең матбугат хезмәте җитәкчесе Юлия Нуриева.

Түбән Кама һәм Түбән Кама районы чиркәүләрендә Раштуа бәйрәме уңаеннан служба 6 гыйнвардан 7 гыйнварга каршы төндә узачак. Шәһәр җәмәгать транспорты хәрәкәте махсус режим буенча оештырыла, дип хәбәр ителә шәһәр хакимиятенең телеграм-каналында.

Раштуа бәйрәме һәр кешегә аңлаешлы мәңгелек хакыйкатьләрне – гаилә кыйммәтләренең какшамаслыгы, ана булу шатлыгы һәм балалар ниятләренең чисталыгы турында белдерә, дин тотучыларны Аллага яраклы эшләргә һәм шәфкатьле гамәлләргә рухландыра. Татарстан Президенты Рөстәм Миңнеханов Татарстан халкын бәйрәм уңаеннан котлавында шундый сүзләр җиткерде.

Атна ахырына Татарстанда суыта, әмма киләсе атнада температура төшүен дәвам итәчәк. Бу хакта Татарстанның Гидрометеорология үзәге хәбәр итә.

ТР Мөселманнары диния нәзарәтенең Әлмәт районы һәм Әлмәт шәһәре мөхтәсибәте үткәргән «Әйтер сүзем бар» дигән вәгазьчеләр бәйгесендә Мөслим районыннан 4 кеше катнашты. Бу хакта «Мөслим-информ» газетасы яза. 

5 гыйнварда «Сабантуй»ял паркында гаиләләр арасында «Сәламәт гаилә» дип исемләнгән кышкы спорт фестивале узды. Бу хакта «Хезмәт» газетасы яза. 

Минзәлә районының Гөлек авылында мәчет фасады ремонтланган. Бу хакта «Минзәлә-информ» сайты яза. 

Сабаның «Яшьлек» яшьләр үзәгендә Кыш бабай призларына өстәл теннисы буенча Яңа ел турниры узды. Бу хакта «Саба таңнары» газетасы яза.