Новости за 23.01.2023

Аксубай районы волонтерлары махсус хәрби операция зонасында хәрби бурычларын үтәүче мобилизацияләнгәннәргә гуманитар ярдәм җыю һәм җибәрү буенча эшләүләрен дәвам итә. Бүген яшеренү челтәрләре һәм масхалатлар белән беррәттән, фронт госпитальләрен ир-атлар өчен пижама тибындагы кием белән тәэмин итү мәсьәләсе дә беренче планга чыкты. Бу хакта «Аксубай таңнары» сайтында хәбәр ителә.

Февраль аенда Казанда 187 нче күппрофильле лицей базасында «Инженерлык Республикасы» мәгариф проектының 5 еллык юбилеена багышланган «Хәзерге заман инженерлык белеме» мәгариф форумы узачак.

Россиянең Латвиядәге илчесе Михаил Ванин 24 февральгә кадәр илдән китәргә тиеш. Бу хакта Латвия Тышкы эшләр министрлыгы хәбәренә сылтама белән РИА новости яза.

Швециягә НАТОга керү мәсьәләсендә Төркиядән ярдәм көтәргә кирәкми. Төрекләргә һәм исламга каршы Стокгольмда оештырылган акцияләрдән соң Төркия Президенты Рәҗип Тайип Эрдоган шул хакта белдерде.

«Ак Барс» Континенталь хоккей лигасы чемпионаты матчында «Трактор»ны 4:1 исәбе белән җиңде. Зиннәтулла Билалетдинов командасы инде дүрт матч дәвамында оттырмый.

Прокуратура һәм хокук саклау органнарының уртак тырышлыгы белән былтыр меңнән артык ришвәтчел җинаять ачыкланган һәм булдырмый калынган. Бүген Татарстан Прокуроры Илдус Нәфыйков республика Прокуратурасының йомгаклау коллегиясендә әнә шундый саннар китерде.

Казан федераль университеты студенты Мәликә Хәйрулла татар телендә тиз уку курсы төзегән. Әлегә ул Россиядә бердәнбер. Дүртенче курс студентының «Тиз уку» проекты «КФУ Ел студенты-2022» конкурсының «Иң яхшы студент инициативасы» номинациясендә җиңде, дип хәбәр итә югары уку йортының матбугат хезмәте.

19-23 гыйнварда Омск шәһәрендә каратэ (WKF) буенча бөтенроссия ярышлары узды. Казан спортчылары әлеге ярышларда җиңүче һәм призерлар булды. Иртыш буе кубогы турниры илнең 29 төбәгеннән 1,5 меңгә якын атлетны берләштерде. Бу хакта Казан мэриясе матбугат хезмәте хәбәр итә.

Иртәгә Татарстан территориясендә аязучан болытлы һава көтелә, төнлә һәм иртән томан төшәргә мөмкин. Бу хакта Татарстанның Гидрометеорология үзәге хәбәр итә.

Россия Мәгариф министрлыгы «Россия Ел укытучысы» конкурсында җиңүчегә бер миллион сум, призерларга – 500 мең сум күләмендә бүләк бирергә тәкъдим итә.

Республикада төзелеш өлешчеләренә (дольщикларга) ярдәм итә торган федераль һәм республика фондларының актив эшчәнлеге һәм прокурорларның үз вакытында чаралар күрүе нәтиҗәсендә барлык озак барган төзелешләрдә төзү эшләре төгәлләнде. Республика Прокуратурасының йомгаклау коллегиясендә Татарстан прокуроры Илдус Нәфыйков шул турыда белдерде.

Мәскәүдәге Татар мәдәни үзәгендә Муса Җәлил истәлегенә концерт булды. Чара Муса Җәлил исемендәге «Шагыйрь һәм музыка» II Халыкара музыкаль-шигъри фестиваль кысаларында узды. Фестивальнең сәнгать җитәкчесе –Татьяна Малышева-Җәлил, шагыйрьнең оныгы.

Ял көннәрендә Чистай мөхтәсибәте мөселман яшьләре берлеге активистлары Рәҗәб ае җитү уңаеннан хәйрия акциясе үткәрде. Алар Чистай мөхтәсибәтенең социаль ашханәсендә тукланучы аз керемлеләргә һәм мохтаҗларга  бүләкләр тапшырды.

Ел башында Татарстан буенча уртача хезмәт хакы 50,2 мең сум тәшкил итә, ул бер ел эчендә 17 процентка арткан. Ел дәвамында бу сан тагын да артырга мөмкин. Бу турыда «Татар-информ»га Татарстан Республикасының хезмәт, халыкны эш белән тәэмин итү һәм социаль яклау министры урынбасары Клара Таҗетдинова хәбәр итте.

Татарстан Президенты Рөстәм Миңнеханов республиканың җиде кешесен бүләкләде. Аларның алтысына Татарстан Республикасы җитәкчесенең рәхмәте белдерелде, берсе «Дуслык» орденына лаек булды. Документлар Татарстан Республикасы Президенты сайтында урнаштырылган.

Свердловск өлкәсендә «Гомерем минем халыкта моңлы бер җыр иде» дип исемләнгән шигырь укучылар бәйгесе узачак.

Кариев театры бер ай эчендә – 25 гыйнвар – 22 февраль аралыгында өч спектакль чыгарачак. Режиссерларның барысы да эксперименталь юнәлешләрдә эшләргә курыкмый торган яшь иҗатчылар.

Полициягә Казанның Химиклар урамындагы бер йорт янында билгесез кешенең хатын-кызга һөҗүм итүе турында хәбәр килгән.

Казан кооператив институтында Түбән Новгород өлкәсендәге мәктәпләр өчен ачык ишекләр көне үткәрелгән. 40 кешелек делегацияне Россия кооперация университеты ректоры Алсу Нәбиева исеменнән Казан кооператив институтының исәп-хисап һәм финанс кафедрасы мөдире Илһамия Миңнехәмитова каршы алган.

Казан авиация заводы Татарстанның горурлыгы булып тора. Бу хакта Россия Президенты Владимир Путин Татарстан Республикасы Президенты Рөстәм Миңнеханов белән очрашуда белдерде. Чара Мәскәү Кремлендә узды.

Уңайсыз һава шартлары аркасында Казанга юл тоткан берничә рейс запас аэродромнарга китте. Бу хакта «Татар-информ»га «Казан» халыкара аэропорты матбугат сәркатибе Гадел Гатауллин хәбәр итте.

Татарстан Президенты Рөстәм Миңнеханов Идел буе Болгар дәүләтендә ислам динен кабул итүгә 1100 ел тулуны бәйрәм итү һәм оештыруда ярдәм күрсәткәне өчен Россия Президенты Владимир Путинга рәхмәт белдерде. Искәртеп узабыз, мөселманнар өчен зур әһәмияткә ия әлеге дата узган ел федераль дәрәҗәдә билгеләп үтелде.

Татарстанда халыкның аерым категорияләрен торак белән тәэмин итү программасын гамәлгә ашыру дәвам итә. Әйтик, ел саен күп балалы гаиләләр һәм 600 ятим бала яңа фатир ачкычлары ала. Бу җәһәттән чират зур түгел, якындагы ике елда ул тулысынча бетәчәк, диде ТР Президенты Рөстәм Миңнеханов Россия Президенты Владимир Путинның соравына җавап биреп.

Татарстан махсус хәрби операциягә ярдәм йөзеннән 2,5 миллиард сумга якын акча бүлеп биргән. Республика Президенты Рөстәм Миңнеханов бүгенге очрашуда Россия Президенты Владимир Путинга шул хакта хәбәр итте. Очрашу Мәскәүдә узды.

Татарстан Республикасы спорт министрлыгы коллегиясенең киңәйтелгән утырышында Татарстан көрәшчеләре һәм тренерларына Россиянең атказанган спорт остасы таныклыгы тапшырылган. Бу хакта ТР көрәш федерациясенең телеграм каналында һәм ТР спорт министрлыгы сайтында хәбәр иттеләр.