Новости за 22.01.2023

Буа районының Зур Фролово авылыннан махсус хәрби операциядәге якташларына 31 «мич-ракета» җибәргәннәр. Бу хакта «Байрак» сайтында хәбәр ителә.

Федераль җыенның Россия Дәүләт Думасы депутаты Татьяна Ларионова «Теләкләр чыршысы» проекты кысаларында биш яшьлек Ваняның хыялын тормышка ашырды.

Чистай район үзәк хастаханәсе стационары базасында заманча кабул итү-диагностика бүлеге ачылды. Ул сменага 100 кешегә кадәр кабул итүгә исәпләнгән. Анда пациентларны кабул итү блогы, критик халәтләр блогы, йогышлы авырулар боксы, шок хәлендәге авырулар залы, процедуралар залы, яраларны бәйләү бүлмәләре, күзәтү һәм диагностика кабинетлары бар. Яңа кабул итү-диагностика бүлеге атнаның 7 көнендә дә 24 сәгать эшләячәк.

Аксубай туган якны өйрәнү музеенда Татарстанда Милли мәдәниятләр һәм гореф-гадәтләр елына багышланган «Халык мәдәнияте чыганакларына» дип аталган чигү күргәзмәсе ачылды.

«Җиһановның һәр әсәре төрле яктан аңлашыла, һәркем үзенчә күрә, ишетә ала», - диде Милли музыка оркестры сәнгать җитәкчесе.

«Аның әсәрләре катлаулы, кайвакыт ул аңлаешлы булмаска, күңелсез тоелырга мөмкин, ләкин бу Җиһанов музыкасының тулаем матурлыгын аңламаудан гына», – диде ул.

Нурлатның ат спорты мәктәбендә дәресләр дәвам итә, балалар атта йөрү осталыгына өйрәнә, дип хәбәр итте Татарстан Президенты Рөстәм Миңнеханов. Телеграмдагы үзенең каналында ул төрле яшьтәге балалар төшкән фотолар урнаштырган.

Татарстанның Мамадыш районында 2022 елда диспансерлаштыру вакытында 18 кешедә онкология авыруы ачыкланган.

Татарстан Президенты Рөстәм Миңнеханов Махсус Олимпиаданың Бердәм уеннарында катнашучы республика җыелма командасы белән очрашты. Ярышларны ачу тантанасы бүген «Казан Экспо»да узды. Татарстан Президенты яшьләр белән аралашты һәм аларга уңышлар теләде.

2023 елда Казан марафонында катнашучылар санын шактый арттырырга ниятлиләр, оештыручылар 20 мең спортчы җәлеп итәргә җыена. Бу хакта Татарстанның Спорт министрлыгы коллегиясенең йомгаклау утырышында ведомство җитәкчесе Владимир Леонов хәбәр итте.

Быел Татарстан, җитди санкцияләргә карамастан, берничә эре халыкара һәм Бөтенроссия чаралары үткәрде. Бу хәл Россиягә бу өлкәдә нинди ресурслар барлыгын күрсәтте. Республика мондый чикләүләргә дөрес җавап бирүнең иң яхшы үрнәкләренең берсе булды. Мондый фикерне Татарстан Республикасы Спорт министрлыгы коллегиясенең йомгаклау утырышында Россия спорт министры Олег Матыцин әйтте.

Татарстанда корпоратив спорт белән кызыксыну арту фонында хезмәт коллективлары арасында республика спартакиадасын уздыру әйбәт адым булыр иде. Татарстан Республикасы Спорт министрлыгы коллегиясенең йомгаклау утырышында ведомство башлыгы Владимир Леонов шундый тәкъдим белән чыгыш ясады.

Бүгенге көндә Татарстанда халыкның якынча 60 проценты даими рәвештә физик культура һәм спорт белән шөгыльләнә. Соңгы биш елда бу күрсәткеч 10 процентка арткан, ә 2030 елга 75 процентка җитәргә тиеш. Бу хакта Татарстан Республикасы Спорт министрлыгы коллегиясенең йомгаклау утырышында ведомство җитәкчесе Владимир Леонов хәбәр итте.

Спорт инфраструктурасының норматив һәм техник тузу проблемасына зур игътибар бирергә кирәк. Объектларның инженерлык системаларына хезмәт күрсәтү өчен вакытында килешүләр төзергә кирәк, бигрәк тә йөзү бассейннарына игътибарны юнәлтергә кирәк. Татарстан Республикасы Спорт министрлыгы коллегиясенең йомгаклау утырышында Татарстан Премьер-министры Алексей Песошин шундый йөкләмә бирде.

Түбән Новгород өлкәсенең Кызыл Октябрь районы Уразавыл авылында 3 мартта «НижгарСылу» конкурсы узачак. Бәйгедә 16-18 яшьлек туташлар катнашыр дип көтелә. Илдәге вазгыятьне истә тотып, бәйгегә «Беz cеzнең белән» дигән бирем­не кертәргә булганнар.

2020 елдан башлап Татарстанда спорт объектларын капиталь ремонтлау программасы тормышка ашырыла. Быел план буенча 500 миллион сумга 15 спорт корылмасы яңартылачак. Бу хакта Татарстан Республикасы Спорт министрлыгы коллегиясенең йомгаклау утырышында ведомство җитәкчесе Владимир Леонов хәбәр итте.

Россия компанияләрендә гыйнвар ае өчен аванс түли башладылар. Хезмәткәрләрнең күбесен аванс күләменең алдагы айларга караганда кимрәк булуы гаҗәпләндергән.

22 гыйнварда Казанда Махсус Олимпиаданың Бердәм уеннары башлана. Алар 23-26 гыйнварда 14 объектта узачак. Татарстанны 95 атлет тәкъдим итәчәк, алар спортның 15 төрендә чыгыш ясый.

Подрядчы оешма Кырым Җәмигъ мәчетендә төп төзелеш-монтаж эшләрен тәмамлады. Төзәтелгән проект документлары Баш дәүләт экспертизасына тапшырылырга әзерләнә, дип хәбәр итте «СпецСтройКрым» генподряд оешмасының баш инженеры Сергей Литвиненко РИА Новости агентлыгына.

Кичә кичке сәгать җиделәр тирәсендә Казанның «Тандем» сәүдә үзәгендә 14 яшьлек кыз үлгән. Яшүсмернең фуд-корт зонасында вафат булуы билгеле. «Татар-информ»га шул турыда мәгълүм булды.

Елның иң бәрәкәтле чоры – Рамазан ае башланырга 2 ай вакыт калды. Аның иң беренче галәмәте – Раҗәб ае. Ул бүген кояш баю белән керә. Сезне ихлас күңелемнән шушы мөкатдәс айның җитүе белән тәбрик итәм һәм ураза гыйбадәтенә рухи һәм физик яктан әзерлекне башларга чакырам, диде Татарстан мөфтие Камил хәзрәт Сәмигуллин якынлашып килүче Раҗәб ае җитү уңаеннан мөрәҗәгатендә.

Башкортстан биатлончысы Эдуард Латыйпов Белоруссиянең Раубичи шәһәрендә уза торган биатлон буенча Бердәмлек Кубогының дүртенче этабында (12,5 км) алтын медаль яулады.

Стокгольмда Төркия илчелеге алдында изге Коръәнне яндыруга карата Швеция хакимияте реакция белдерергә, бу акциядә катнашучыларның барысы да җавапка тартылырга тиеш. Россия мөселманнары Диния нәзарәте рәисе урынбасары Рушан Аббясов шул турыда белдерде.

Филиппинда су басулардан үлүчеләр саны 35 кешегә җитте, 12 кеше зыян күргән. Илнең табигать афәтләре куркынычын киметү буенча дәүләт советы шундый мәгълүмат чыгарды. РИА Новости шул турыда яза.

Эстониянең җирле радиосында ай саен чыга торган «Дуслык» тапшыруының гыйнвар чыгарылышы эфирга чыкты. Европада татар телендә чыга торган әлеге радиотапшыруның бу чыгарылышы дастаннар темасына багышланды.