Новости за 14.01.2023

Яңа елның беренче семинары традиция буенча Кукмара районының «Восток» хуҗалыгында үтте. Анда үткән ел башкарылган эшләргә йомгак ясалды, киләчәккә бурычлар билгеләнде. Бу хакта «Хезмәт даны» сайтында хәбәр ителә.

Чаллыда өлешчә мобилизация кысаларында махсус хәрби операциягә киткән Фирдүс Сибгатуллин гаиләсендә кыз туды. Аңа Әминә дип исем куштылар.

Әлмәт районында яшәүче 25999 сумлык робот тузансуырткыч урлаган өчен хөкем ителгән. Бу хакта Әлмәт шәһәр суды матбугат хезмәтенә сылтама белән «Әлмәт таңнары» хәбәр итә.

Минзәләнең Урыс авылында мобилизацияләнүчеләр өчен өй токмачы бастылар. Авыл халкы #йөрәктәнйөрәккә# акциясендә теләп катнаша.

Магнитогорскида Татарстан Республикасының атказанган һәм халык артисты Габдулла Рәхимкулов исемендәге Халыкара вокалистлар конкурсы уза.

Бүген Татарстан Президенты Рөстәм Миңнеханов эш сәфәре белән Алтай Республикасында булды. Төбәк башлыгы Олег Хорохордин белән ул республиканың Маймин районында «Карым» комплексы территориясендә урнашачак «Кар барсы» биологик төрлелекне саклау үзәген төзү буенча киңәшмә үткәрде.

«Манзара» спорт-музыкаль премиясенең көрәш буенча 2023 елгы җиңүчеләре билгеләнде.

8 декабрьдән 12 гыйнварга кадәр Кытай медицина учреждениеләре коронавирустан 59,9 мең үлем очрагын теркәгән.

Россия мөселманнары Диния нәзарәте рәисе урынбасары – Диния нәзарәте эшләре идарәчесе, Россия Федерациясе Тикшерү комитеты каршындагы Иҗтимагый совет әгъзасы Рәфыйк Фәттахетдинов эксклюзив истәлекле «Петр I тууына 350 ел» медале белән бүләкләнде.

Әгәр фатирның температурасы законда билгеләнгән +20 градустан түбән булса, җылыту өчен түләү яңадан исәпләнергә тиеш.

Самара өлкәсенең Ширяево авылы янындагы тауда Кодрак ханга һәйкәл куелган. Тарихи мәйданчыкка таш сынны «Болгар мирасы» мәдәни-тарихи фонды урнаштырган.

Бүген, 14 гыйнвар көнне, театр һәм кино актрисасы, СССРның халык артисты Инна Чурикова вафат булган.

Камал театрында Рөстәм Галиуллинның «Көзге кайтаваз» пьесасы буенча спектакльнең премьерасы 2023 елның апрель аенда көтелә. 

Казанның «Ак Барс» көрәш сараенда «Манзара-2023» спорт-музыкаль премиясе башланып китте. Ул быел җиденче тапкыр үткәрелә. 

2023 елда ташламалы шартларда автокредитны кимендә бер баласы булган кешеләр, дәүләт медицина оешмаларында эшләүчеләр, шулай ук элек беркайчан да автомобильләре булмаган гражданнар ала алачак.

Чаллының 63нче микрорайонында 63-02нче социаль ипотека йортында 170 гаилә яңа фатир ачкычлары алды.

Россия Федерациясе Хезмәт һәм социаль яклау министрлыгы 1 февральдән 40 пособие, компенсация һәм төрле түләүләрне 11,9 процентка индексацияләргә җыена. Бу хакта ведомствоның матбугат хезмәтенә сылтама белән ТАСС хәбәр итә.

Татарстанда өченче көн рәттән коронавирус белән авыручылар санының артуы күзәтелә. Соңгы тәүлектә Сovid-19 вирусын республиканың 65 кешесе йоктырган, бер көн элек – 60, ә ике көн алдан 56 авыручы булган. Бу хакта стопкоронавирус.рф. сайтындагы мәгълүматлар дәлилли.

Петербургның танылган татар җәмәгать эшлеклесе, фотограф Мөнирә Моратова вафат булды.

Биатлончы Эдуард Латыйпов Миланда һәм Кортина-д’Ампеццода (Италия) 2026 елда узачак Кышкы Олимпия уеннары тышлыгына эләккән.

Татарстан Республикасының Россия Федерациясендәге Тулы вәкаләтле вәкиллегендә Ливиянең Россия Федерациясендәге Гадәттән тыш һәм Тулы вәкаләтле Илчесе Эмхемед Альмаграви һәм Ливиядәге Россия Федерациясенең Гадәттән тыш һәм Тулы вәкаләтле Илчесе Айдар Аганин булды. Бу хакта вәкиллекнең матбугат хезмәте хәбәр итә.

15 гыйнвардан Татарстанда хайваннарны кышкы исәпкә алу башлана – бу аучылык ресурсларының 18 төренә дәүләт мониторингы кысаларында ел саен үткәрелә торган чара. Бу хакта Биоресурслар буенча Татарстан дәүләт комитетының матбугат хезмәте хәбәр итә.

2023 елда Татарстанда илкүләм проектлар һәм дәүләт программаларын гамәлгә ашыру дәвам итәчәк. Республикада парк һәм скверларны төзекләндерү, башкаладагы каты көнкүреш калдыклары полигонын һәм ләм кырларын рекультивацияләү, сырхауханәләр, мәктәп һәм балалар бакчалары төзү планлаштырыла.

Хәрби хезмәттә булмаган 30 яшьтән өлкәнрәк россиялеләр өчен хәрби җыеннар уздыру турындагы мәгълүмат чынбарлык белән бәйле түгел, дип белдерде Дәүләт Думасының Саклану комитеты башлыгы Андрей Картаполов. Аның сүзләрен РБК яза.

Буада район мәдәният йорты бинасына реконструкция ясала. Төзекләндерелгән бинага Буа дәүләт драма театрын кертү турында сөйләшүләр бара.