Новости за 12.02.2023

Алабуга районы башлыгы Рөстәм Нуриев Шишкин буаларында эш барышы белән танышты. Биредә ике яңа буа төзергә уйлыйлар, ике буа бар иде инде. Махсус салынган дренаж тау битләреннән бәреп чыккан чишмә суларына шушы буаларга агып төшәргә мөмкинлек бирәчәк. Шул рәвешле, аларның суы агып торачак.

Әгерҗе районының Бимә авылы умартачылары мобилизацияләнүчеләргә күчтәнәчкә бал җибәргән. Аны Бима мәктәбендә автобус шоферы булып эшләүче Леонид Юферов 100 кило әлеге файдалы, экологик яктан чиста ризыкны юллаган.

Баулы районында Фәнис Яруллинны искә алу чаралары дәвам итә. Бүген аның туган авылында да матур чара узды. «Яруллин укулары» дип исемләнгән төбәкара бәйгегә Ютазы һәм Баулы районы, Башкортстан мәктәпләреннән 120дән артык катнашучы килде.

2022 елда капиталь ремонт программасы буенча Алабугада 23 күп фатирлы йорт төзекләндерелгән. Төзекләндерү эшләренә киткән акчаның гомуми күләме 129 миллион сум тәшкил итә. Бу акча хисабына йортлар тыштан җылытылган, инженер челтәрләренә ремонт ясалган.

Татарстан синоптиклары киләсе атна башындагы һава торышы турында сөйләде. Шул хактагы мәгълүмат ТР Гидрометеорология һәм әйләнә-тирә мохитне күзәтү идарәсе сайтында урнаштырылган.

Төркиянең көньяк-көнчыгышында булган җир тетрәү корбаннарының саны 29 695кә җиткән. Бу хакта ТАСС Агентлыгы Гадәттән тыш хәлләр идарәсенә сылтама белән хәбәр итә.

Төркиянең көньяк-көнчыгышындагы җир тетрәүдән соң хасил булган тектоник җир убылуның фотосы чыкты. Ул «Роскосмос» дәүләт корпорациясенең телеграм-каналында урнаштырылган.

Башкортстан коткаручылары Төркиядә җимерекләр астыннан өч кешедән торган гаиләне тапкан һәм табибларга тапшырган. Бу хакта РИА Новости агентлыгы республиканың Гадәттән тыш хәлләр буенча дәүләт комитетына сылтама белән хәбәр итә.

Киләсе атнада Россиянең Үзәк өлешендә һава басымы һәм температурада кискен тирбәнешләр көтелә, диелә «Фобос» һава торышы үзәгенең «Метеохәбәрләр» порталында. Бу хакта РИА Новости агентлыгы хәбәр итә.

Якшәмбе көнне, 12 февральдә, Грузиянең көнбатышында 4,4 һәм 3,3 магнитудалы ике җир тетрәү теркәлгән. Бу хакта «Известия» газетасы Илья университеты каршындагы Сейсмик мониторинг үзәгенә сылтама белән хәбәр итә.

Татарстан полицейскийлары Азнакай шәһәрендәге бер банкның офисына ут төртүгә бәйле факт буенча тикшерү үткәрә, гаепләнүче тоткарланган. Бу хакта РИА Новости агентлыгы ТР буенча Эчке эшләр министрлыгына сылтама белән хәбәр итә.

15 февральдә, герой-шагыйрь Муса Җәлилнең туган көнендә, Татарстан Милли музеенда Казан халкы һәм кунаклары нацистлар әсирлегендә язылган шигырьләр җыентыгының төп нөсхәсен күрә алачаклар. Бу хакта Казан мэриясе матбугат хезмәте хәбәр итә. 

Бүген Төркиядәге җир тетрәү зонасыннан илгә кайтырга теләк белдергән 39 россиялене эвакуацияләгәннәр. Бу хакта «Известия» газетасы Россиянең Әнкарадагы илчелегенә сылтама белән хәбәр итә.

Россия мөселманнары Диния нәзарәтенең «Зәкят» хәйрия фонды Төркия һәм Сириядә җир тетрәүдән зыян күргән кешеләр өчен беренче чиратта кирәкле әйберләр җыюны тәмамлады. Барлыгы 5 тоннадан артык йөк җыелган. Бу хакта «Российская газета» яза.

Төркиядә коткаручылар җир тетрәүдән соң алтынчы көнне дә исән калган кешеләрне җимерекләр астыннан чыгаруны дәвам итә. Бу хакта ТАСС агентлыгы җирле гаммәви мәгълүмат чараларына сылтама белән яза.

Стопкоронавирус.рф порталы хәбәр иткәнчә, узган тәүлектә Татарстанда коронавирус инфекциясенең 100 яңа очрагы расланган. 39 пациент хастаханәгә озатылган.

РФ мәгариф министры Сергей Кравцов Бөтенроссия экспертлар педагогик советы утырышын үткәрде. Ул мөгаллимнәр белән федераль төп гомуми укыту программаларына күчү, мәктәпләрнең юбилейларын билгеләп үтү традициясен кертү, шулай ук мәктәпләрнең «Беренчеләр хәрәкәте» Бөтенроссия балалар һәм яшьләр хәрәкәте белән хезмәттәшлегенә бәйле мәсьәләләр хакында фикер алышты. Бу хакта Россия Мәгариф министрлыгының матбугат хезмәте хәбәр итә.

Россия Гадәттән тыш хәлләр министрлыгы коткаручылары Төркиядә мобиль ашыгыч төркемнәр белән эшләүгә күчкән. Әгәр ниндидер урыннан җимерекләр астында кешеләр булырга мөмкин дигән хәбәр килсә, министрлыкның мобиль төркемнәре тиз арада шунда юл тота. Әлеге төркемнәр «Центроспас» отряды составыннан формалаштырылган. Бу хакта «Российская газета» яза.

РФ Хезмәт һәм социаль яклау министрлыгы бөлгенлеккә төшкән предприятие, оешма һәм компания хезмәткәрләре алдындагы бурычны каплауның яңа механизмы күрсәтелгән закон проекты әзерләгән. Хәзер аны Россиянең өч яклы комиссиясе карый. Бу хакта «Российская газета» яза.

Кичә кич Гадәттән тыш хәлләр министрлыгына Лениногорск шәһәренең Ленин урамында бер гаиләнең ис газы белән агулануы хакында хәбәр килгән. Бу хакта Россия Гадәттән тыш хәлләр министрлыгының ТР буенча Баш идарәсе матбугат хезмәтеннән хәбәр иттеләр.

2023 елның 1 июненнән медицина-социаль экспертизаны дистанцион рәвештә узып булачак. Бу хакта Россия Хезмәт һәм социаль яклау министрлыгының матбугат хезмәте хәбәр итә.

Төркиядә җир тетрәү нәтиҗәсендә һәлак булучылар саны 24 617гә җиткән. Бу хакта ТАСС агентлыгы хәбәр итә.

1 марттан торак милекчеләре гомумйорт ихтыяҗларына тотыла торган коммуналь ресурсларны яңача түләячәк, шуның аркасында түләүләр артырга мөмкин. Гражданнар, счетчик урнаштырылган очракта, чынлыкта күпме куллануларыннан чыгып түләячәк. Мондый счетчик булмаса, үзгәргән нормативлар буенча түләргә туры киләчәк. Өстәвенә, барысы да (һәр каттагы ут, лифт куллана торган электр энергиясе, подъездда идән юу өчен су) исәпкә алыначак, дип яза «Парламентская газета».

Россия һәм Советлар Союзы Геройларын халык алдында мыскыл иткән өчен җинаять җаваплылыгы кертү турында закон кабул итәргә кирәк. Бу хакта РИА Новости агентлыгы Дәүләт Думасының иминлек һәм коррупциягә каршы көрәш комитеты әгъзасы Солтан Хәмзәевкә сылтама белән хәбәр итә.

Әлмәттә яшәүчеләр өчен «Ислам. Беренче адымнар» дип аталган дәресләр тәкъдим ителә. Алар Әлмәт яшьләр үзәгендә уза.