Новости за 05.02.2023

3-5 февраль көннәрендә Казанда рус шашкасы буенча республика беренчелеге узды. Анда Динар Закиров рус шашкасы буенча Татарстан чемпионы булды.

Әлки районы «Якташлык» җәмгыяте ярдәме белән Татарстанның атказанган табибы, шигъри җанлы Ирек Билаловның «Тукталышсыз гомер» дигән китабы дөнья күрде. Бу хакта «Әлки хәбәрләре» сайтында хәбәр ителә.

Лаеш шәһәре үзәк китапханәсендә «Мастер-новеллист» китап күргәзмәсе татар әдәбияты классигы Фатих Хөснинең 115 еллыгына багышланган. Бу хакта «Кама ягы» сайтында хәбәр ителә.

Лениногорск мөхтәсибәтендә узган мөселман яшьләре арасында республикакүләм чаңгы ярышы нәтиҗәләре билгеле булды. Чаңгы ярышларында барлыгы 11 районнан биш вакыт намаз укучы мөселманнар көч сынашты.

Иртәгә, 6 февральдә, Татарстанда салкынча һәм болытлы һава торышы көтелә. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Истанбулдагы Мәрмәрә университетында Төркия татарларының танылган табибы, «Сөембикә» татар җәмгыятен оештыручы, шагыйрь Ләбиб Каранның эшчәнлеге турында диссертация якланды. Бу хакта тарих галиме, профессор Әхмәт Канлыдәрә хәбәр итә.

Автоинспекторлар юлда Nissan автомобиле белән идарә итүче Мамадыш кешесен туктаткан һәм аның исерек булуын ачыклаган. Аңа карата беркетмә тутырганнар.

Серпуховта узган III Бөтенроссия боксерлар форумында Татарстанның Бокс федерациясе 2021-2022 ел нәтиҗәләре буенча Россиянең иң яхшы спорт федерациясе дип табылды. Федерация җитәкчелегенә Халыкара бокс ассоциациясе президенты, Россиянең Бокс федерациясе Башкарма комитеты рәисе Умар Кремлев исеменнән спортның әлеге төрен алга таба үстерү өчен 500 мең сумлык сертификат тапшырылды.

Татарстанның Лаеш районы Столбище авылында янгын чыгуы хакында хәбәр 112 бердәм номерына бүген 08.31 сәгатьтә килгән.

2023 елның 8 февралендә 14.00 сәгатьтә Татарстан Язучылар берлегендә проза, поэзия, балалар әдәбияты, әдәби тәнкыйть һәм драматургия остаханәләренең берләштерелгән утырышы була.

Татарстанның Буа районы махсус хәрби операция зонасына якташлары өчен гуманитар ярдәмнең чираттагы партиясен илтте. Йөкне район хакимияте вәкиле һәм «Сугышчан туганлык» оешмасының җирле бүлеге озата барды. Бу хакта «Татар-информ» агентлыгына район хакимиятенең матбугат хезмәтеннән хәбәр иттеләр.

3 февральдә Мәҗит Гафури исемендәге Башкорт академия драма театры тамашачылар игътибарына «Кызыл паша» спектакленең премьерасын тәкъдим итте. Режиссер Айрат Абушахманов сәхнәләштергән спектакль элеккесеннән сизелерлек аерылып тора. Бу хакта «Башинформ» агентлыгы хәбәр итә.

2 февральдә Пенза өлкәсенең Югары Әләзән авылы урта гомуми белем бирү мәктәбендә «Дәрестә һәм дәрестән тыш эшчәнлектә телне, мәдәниятне, традицияләрне саклау һәм укучыларны рухи-әхлакый тәрбияләү» дип аталган темага мәктәп директорлары, туган тел һәм әдәбият укытучылары семинары узды. Бу хакта Бөтендөнья татар конгрессының матбугат хезмәте хәбәр итә.

14 нче февральдә ТР Милли китапханәсендә китап свопы узачак. Бу көнне Бөтендөнья китап бүләк итү көне билгеләп үтелә, дип хәбәр итә ТР Милли китапханәсе матбугат хезмәте.

Пакистанның элеккеге Президенты Пәрвәз Мөшәррәф (2001-2008) 79 яшендә вафат булган. Бу хакта ТАСС агентлыгы Пакистанның Geo.tv телеканалына сылтама белән хәбәр итә.

Оператив штаб мәгълүматларыннан күренгәнчә, узган тәүлектә Татарстанда коронавирус инфекциясенең 85 яңа очрагы ачыкланган, 23 кеше хастаханәгә озатылган. 48 кеше терелгән, рәсми статистика буенча, яңа үлем-китем очраклары теркәлмәгән.

Татарстан башкаласындагы «Россия – Ислам дөньясы: KazanForum» Халыкара икътисади форумында ислам илләре белән хезмәттәшлек итүгә кагылышлы мөһим мәсьәләләр каралачак, дип белдерде РФ вице-премьеры Марат Хөснуллин. Планлаштырылган карарлар арасында яңа транспорт тимер юл коридоры төзү турындагы килешүгә кул кую, шулай ук хәләл продукция экспортлауның яңа алымнарын әйтеп үтәргә була, диде ул.

15 февральдә герой-шагыйрь Муса Җәлилнең тууына 117 ел тула. Ул үз исемен үлемсез әсәрләре һәм сугышта кылган батырлыгы белән мәңгеләштерде. Коточкыч җәзалаулар да, үлем куркынычы да шагыйрьне дәшми калырга мәҗбүр итә, әлеге кешенең какшамас холкын сындыра алмаган.

Чаллыда 15 яшьлек мәктәп укучысы 3 февральдә үк югалган.

«Василиса» эзтабарлар отряды сәхифәсендә үсмернең җомга көнне, 3 февральдә югалуы хакында хәбәр ителә. Хәзерге вакытта аның кайда икәнлеге билгеле түгел.

Үсмернең буе 155-160 сантиметр тирәсе, кара чәчле, коңгырт-кара күзле, уң күзенең өстендә яра эзе бар, алгы теше кителгән.

Кара куртка һәм башлык, кара спорт чалбары һәм шундый ук төстәге кроссовка кигән.

ТР буенча Эчке эшләр министрлыгының матбугат хезмәтендә... Читать дальше...

РФ Премьер-министры Михаил Мишустин авыл хуҗалыгы билгеләнешендәге җирләр реестрын алып бару тәртибен раслады. Бу хакта Хөкүмәт сайтында хәбәр ителә.

Интернетта материаллар тапшыруга көйләнгән видеокүзәтү IP-камераларын, кулланучы сурәтне иҗтимагый Wi-Fi аша караса, шулай ук бик тә гади пароль файдаланса ватарга мөмкиннәр. Бу хакта РИА Новости агентлыгы Россия сыйфат системасына сылтама белән хәбәр итә.

Нәҗип Җиһанов исемендәге Казан дәүләт консерваториясе Фәрит Яруллин исемендәге Әлмәт музыка көллияте белән берлектә музыкаль белем бирү проблемаларына багышланган күчмә утырыш уздырды.

Кичә Казанда Бөтендөнья хиҗаб көне уңаеннан тантаналы чара узды. Очрашуда танылган мөселман хатын-кызлары, хатын-кызлар оешмалары җитәкчеләре, остазлар, мөгаллимәләр һәм җәмәгать эшлеклеләре катнашты. Очрашуны ТР мөселманнары Диния нәзарәте, Россия мөслимәләре берлеге һәм «Halal market» хәләл ярминкәләр оештыручы үткәрде. Очрашуда шулай ук күп балалы һәм азкеремле әниләр дә катнашты, дип хәбәр итә ТР Диния нәзарәте матбугат хезмәте.

Камал театрында Илгиз Зәйниевнең «Ситса туй» пьесасы укылган. Комедияне Айдар Җаббаров куячак.

2 февральдә 94 яшендә Башкортстанның атказанган артисты, Фәйзи Гаскәров исемендәге Дәүләт академия халык бию ансамбле ветераны Тәлгать Урманов 94 яшендә вафат булды. Бу хакта «Башинформ» агентлыгы хәбәр итә.