Новости за 06.02.2023

Бүген Чаллыда капиталь ремонттан соң йогышлы авырулар хастаханәсенең А корпусын ачтылар. Анда шәһәр мэры Наил Мәһдиев катнашты. Бу хакта «Шәһри Чаллы» газетасы хәбәр итә.

Атна уртасына кадәр Татарстанда төнге һава температурасы -22..-27 градуска кадәр булырга мөмкин, әмма соңыннан һава торышы җылырак булачак. Бу хакта республиканың Гидрометеорология үзәге хәбәр итә.

Быел җәй көнендә Тинчурин театры залында үзгәрешләр көтелә. Барысы да планлаштырганча барса, яңа сезонда театр тамашачысын яңа урындыклар белән каршы алырга мөмкин.

Педагогик эшчәнлектә ирешкән уңышлары өчен укытучыларга Президент премияләре саны 1 меңнән 1 250гә кадәр арттырылган. Россия Президенты Владимир Путин шундый карар имзалады, документ хокукый мәгълүмат порталында урнаштырылган.

Иртәгә, 7 февральдә, Татарстан территориясендә болытлы һава көтелә. Төнлә һәм көндез урыны белән томан булачак, дип хәбәр итә республиканың Гидрометеорология үзәге.

Татарстан Рәисе Рөстәм Миңнеханов Ливиянең Россиядәге Гадәттән тыш һәм Тулы вәкаләтле Илчесе Әмөхәммәд А.Ә. Әлмәграви белән очрашты. Очрашу Казан Кремлендә узды, дип хәбәр итә республика җитәкчесенең матбугат хезмәте.

Россия мөселманнары Сирия һәм Төркия халыкларының кайгысын уртаклаша һәм җир тетрәүдән зыян күрүчеләргә ярдәм итү өчен акча җыюны оештыра.

Татарстан Рәисе Рөстәм Миңнеханов Discover Events идарәсе рәисе, Төркиянең Халыкара күргәзмәләр оештыручылар ассоциациясе президенты Юныс Эте белән очрашты. Бу хакта республика җитәкчесенең матбугат хезмәте хәбәр итә.

Казахстанның көньягында 5,4 магнитудалы җир тетрәү булган. Кайбер торак пунктларда яшәүчеләр 2-3 баллы җир асты тетрәүләрен сизгән. Бу хакта Казахстан Гадәттән тыш хәлләр министрлыгының сейсмологик тәҗрибә-методик экспедициясенә сылтама белән РИА Новости яза.

Төркиядә нәшер ителә торган «Төрки дөнья тарих мәдәният журналы»ның быелгы февраль санында күренекле татар язучысы Фәнис Яруллин турында күләмле язма чыккан.

Төркиядә җир тетрәү аркасында үлүчеләр саны 1498 кешегә кадәр җиткән, дип хәбәр итте гадәттән тыш хәлләр идарәсе (AFAD) башлыгы Юныс Сезер.

Татарстан Рәисе Рөстәм Миңнеханов Red Square Chapter Russia мотоклубы директоры Сергей Писаренко белән очрашты. Бу хакта Татарстан Республикасы җитәкчесенең матбугат хезмәте хәбәр итә.

Төркия Республикасының Казандагы генераль консулы Исмет Эрикан ватандашларына һәм туган иленә кайгы уртаклашу сүзләрен җиткерде, анда бүген ике көчле җир тетрәү булды.

Җәза төре буларак милекне конфискацияләү турында фикер алышалар, хәзерге вакытта мондый төзәтмәләрне хупларга юридик яктан ярамый, ләкин «глобаль» төзәтмәләр булса, Дәүләт Думасының дәүләт төзелеше буенча комитеты аларны караячак, дип хәбәр итте журналистларга дәүләт төзелеше комитеты башлыгы Павел Крашенинников. РИА Новости шул турыда яза.

Татарстанның дүрт кешесенә – медицина өлкәсеннән ике белгечкә, шулай ук фән һәм спорт вәкилләренә Россия Федерациясенең дәүләт бүләкләре һәм мактаулы исемнәре бирелде. Аларны бүләкләү турындагы карарны Россия Президенты Владимир Путин имзалады.

Мурманск өлкәсе имамы Мөхәммәдхәбиб хәзрәт Гаджаев Мурманск шәһәрендә Ислам үзәген төзүдә финанс яктан ярдәм иткән кешеләргә исемле сертификатлар тапшырды. Россия мөселманнары Дини җыенының матбугат хезмәте шул хакта хәбәр итә.

Татарстан Рәисе Рөстәм Миңнеханов телеграмдагы үзенең каналында яңартылган КАМАЗ-54901 йөк машинасының фотосурәтен урнаштырган. Искәртеп узабыз, автогигант соңгы буын локальләштерелгән автомобильләр җитештерүне февраль аенда яңадан башлап җибәрергә карар кылган иде.

Антальяның рус берләшмәсе җир тетрәү вакытында зыян күргән кешеләргә ярдәм җыя. Бу хакта шул ук исемдәге телеграм-каналда хәбәр ителә.

Свердловск өлкәсе мөселманнары Диния нәзарәте вәкилләре (Үзәк мөфтият) –  мөфти урынбасары Ибраһим хәзрәт Якубов, имам хатыйб Асланов Фаиг Самир Оглы –  Невьянск шәһәре төзәтү колниясендә (ИК-46) мәчет ачу тантанасында катнашты. Бу хакта Россия мөселманнары Дини җыены Үзәкләштерелгән дини оешмасының матбугат хезмәте хәбәр итә. 

Татарстанда «Рухи моң» татар рухи мәдәниятен үстерү фестиваль-конкурсы быел дүртенче тапкыр була.

Татарстан Рәисе, «Россия-Ислам дөньясы» стратегик күзаллау төркеме рәисе Рөстәм Миңнеханов Сирия Президенты Бәшәр Асадка кайгы уртаклашу белдерде. Исегезгә төшерәбез, бүген иртән илнең төньяк һәм төньяк-көнбатыш өлешләрендә көчле җир тетрәде, анда 300дән артык кеше корбан булган.

Россия Президенты Владимир Путин минлек советы секретаренең беренче урынбасары итеп Рәшит Нургалиевны билгеләү турындагы карарны имзалады. Бу турыдагы документ хокукый мәгълүмат порталында чыкты.

Бүген Татарстан Республикасы Президенты Рөстәм Миңнеханов Россия Фәннәр Академиясенең Уникаль приборлар төзү фәнни-технологик үзәге директоры Марат Булатов белән очрашты.

Төркиядә 1939 елдан бирле иң көчле, 7,7 магнитудалы җир тетрәү булды. Бу хакта Төркия лидеры Рәҗәп Тайип Эрдоган коткару эшләрен координацияләү үзәгендә әйтте.

Соңгы мәгълүматлар буенча, 1710 бина җимерелгән, 284 кеше вафат, 1 мең 323 кеше яралы.