Новости за 10.01.2023

Finiko Finiko финанс пирамидасын оештыручыларның берсе Эдвард Сабиров 20 млн сум залог белән сак астыннан азат ителүгә иреште. Бу хакта үз блогында Андрей Алистаров хәбәр итте.

Россиядә бер үк вакытта грипп һәм коронавирус йоктыру очракларын ачыклаганнар. Бу хакта «Российская газета» хәбәр итә.

Башкортстанның М.Төхвәтшин исемендәге сукырлар өчен махсус китапханәсенең тифлонәшрият бүлегендә Тәскирә Даянованың балалар китабы чыкты. Ул Брайльнең рельефлы-нокталы шрифты белән басылган. Башкорт телендәге китап рельефлы рәсемнәр белән тулыландырылган.

Узган елның 26 декабрендә республиканың Тукай районы Иске Ерыклы авылындагы хәлдән соң җинаять эше ачылган.

Узган тәүлектә Татарстанда 54 кеше коронавирус йоктырган. Бер көн алдан Covid-19 инфекциясен йоктыручылар да шул кадәр булган.

Татарстан белән Марий Эл арасындагы 334 чакрым озынлыктагы чик Бердәм дәүләт күчемсез милек реестрына кертелде. Бу хакта Россия Дәүләт теркәве, кадастр һәм картография федераль хезмәтенең (Росреестр) Татарстан буенча идарәсенең матбугат хезмәте хәбәр итә.

Яңа ел яллары вакытында Татарстан башкаласында 20 юл-транспорт һәлакәте теркәлгән, аларда 27 кеше зыян күргән. Автомобиль белән исерек килеш идарә иткән 97 йөртүче тоткарланган. Бу хакта мэриядә эшлекле дүшәмбедә Россия Эчке эшләр министрлыгының Казан буенча идарәсе башлыгы Надир Закиров хәбәр итте.

Быел Россиядә «хезмәт хакына кадәр» займ бирү күләме15-20 процентка артачак, уртача вакытлы займнар да шундый ук динамика күрсәтәчәк. Webbankir финанс онлайн-платформасы аналитиклары РИА Новостига шул хакта сөйләгән.

Чаллы шәһәрендә бүгеннән, 10 гыйнвардан, җәмәгать транспортында йөрү бәясе кыйммәтләнде. Билет акча һәм карта белән түләгәндә 30 сум тора, транспорт картасы белән 100 һәм аннан да күбрәк тапкыр йөрүгә түләгәндә 23 сум тәшкил итәчәк.

Казанның Яңа Савин районы суды интернет аша яңа туган баласын сатарга җыенган хатын-кызга карата ачылган җинаять эшен карый башлады. Казанда яшәүче 23 яшьлек София Акопянга шундый гаеп белдерелгән.

2022 ел нәтиҗәләре буенча Татарстан Республикасы мөселманнары Диния нәзарәтенең «Хәләл» стандарты комитетында 196 сертификацияләнгән оешма теркәлгән.

2020 елдан бирле беренче тапкыр Приморьеның Краскино үткәрү пунктында дүрт автобус Россия-Кытай чиген чыкты. Уссурийск таможнясы матбугат хезмәтенә сылтама белән РИА Новости шул турыда хәбәр итә.

Чаллы мэры Наил Мәһдиев хәрби хезмәттә булган ир-атның берничә көн элек туган улы Савелийны әнисе белән бала тудыру йортыннан өйләренә чыгару чарасында булды. Бу хакта шәһәр башлыгы үзенең Телеграм-каналында сөйләде.

Яңа ел бәйрәмнәрендә, 25 нче декабрьдән 8 нче гыйнварга кадәр, Казан Кремлендә 230 меңнән артык кеше булган, шуларның 200 меңе ишегалдында узган ярминкәдә катнашкан.

Саклык банкы 10 гыйнвардан яңа һәм икенчел торакка ипотека программалары буенча ставкаларны 0,5 процент пунктка күтәрде, хәзер еллык ставка 10,9 проценттан башлана. Банкның сайтында шул хакта хәбәр ителә. Моны РИА Новости яза.

Балаларын ялгыз тәрбияләүче күп балалы аталарга вакытыннан алда пенсиягә чыгу мөмкинлеге бирергә кирәк. Татарстанда бала хокуклары буенча вәкаләтле вәкил Ирина Волынец шундый тәкъдим белән чыгыш ясады. Ул әзерләгән хат Дәүләт Думасының Гаилә, хатын-кызлар һәм балалар мәсьәләләре комитеты рәисе Нина Останинага юлланган, дип хәбәр итә RТ сайты.

Татарстан Министрлар Кабинеты Казан метрополитенында йөрү һәм билгеләнгән нормалардан зуррак булган багаж ташуга бәйле яңа тарифларны раслады. Банк картасы яки транспорт картасы белән түләгәндә метрода йөрү бәясе 31 сумнан 35 сумга кадәр арта. Татарстан Республикасы премьер-министры Алексей Песошин имзалаган карарда шул турыда язылган.

Самараның «Дуслык» татар иҗади-иҗтимагый оешмасы һәм «Туган тел» өлкә татар җәмгыяте Крутые Ключи бистәсенең 7 санлы мәктәбендәге татар төркемендә Яңа ел бәйрәме оештырган. Татар оешмалары җитәкчеләре бу бәйрәмдә татар гаиләләре белән очрашкан.

Гыйнвар ялларында автобуста сәяхәт итү өчен Казан шәһәре иң популяр ун шәһәр исемлегенә керде. Бу хакта OneTwoTrip сервисы мәгълүматлары раслый.

4-6 гыйнварда Менделеевскида бокс буенча XV Бөтенроссия турниры узды. Ярышта Татарстан Республикасыннан, Удмуртия Республикасыннан һәм Киров өлкәсеннән 170тән артык спортчы катнашты.

Татарстан Хөкүмәте Татарстанда формалашкан «Алга» һәм «Тимер» батальоннары хәрбиләренә бер тапкыр бирелә торган түләүләр тәртибенә төгәллек кертте һәм анда 260 меңнән 360 мең сумга кадәр арттыруны билгеләде. Шундый карарны Татарстан Республикасы премьер-министры Алексей Песошин имзалады.

2023 елда Түбән Камада «Танеко-арена» боз манежын төзи башлау планлаштырыла. Бу хакта бу елның беренче планеркасында Түбән Кама муниципаль районы башкарма комитеты җитәкчесе Роман Булатов хәбәр итте.

Әлмәт районында  фельшер-акушерлык пунктының заманча бинасы «Сәламәтлек саклау» илкүләм проектының Татарстан сәламәтлек саклауның беренчел звеносын модернизацияләү программасы кысаларында төзелде һәм файдалануга тапшырылды.

Яңа ел ялларында Түбән Камада шәһәрне кардан чистарту эше дәвам итте. Бу хакта «ВКонтакте» социаль челтәрендәге сәхифәсендә шәһәр мэры Рамил Муллин хәбәр итте.