Новости за 21.07.2016

ავტოსაგზაო შემთხვევა მოხდა დასავლეთ საქართველოში. ორი მსუბუქი ავტომობილის შეჯახების შედეგად 3 ადამიანი დაიღუპა 4 კი დაშავდა. 

თურქეთის პრეზიდენტმა ქვეყანაში სამთვიანი საგანგებო მდგომარეობა გამოაცხადა. გადაწყვეტილება თურქეთის ხელისუფლებამ მიიღო, საზოგადოებას კი ინფორმაცია, თურქეთის პრეზიდენტმა თავად გააცნო.  

რუსეთში ქართულ პროდუქციაზე ემბარგოს დაწესებას განიხილავენ. ღვინის და მინერალური წყლის აკრძალვის მოთხოვნას კრემლში საქართველოს მიერ გადადგმულ ნაბიჯებს უკავშირებენ.

პრემიერმინისტრი თავდაცვის მინისტრის შემცვლელს ეძებს. გიორგი კვირიკაშვილმა დღეს მხოლოდ ის დაადასტურა, რომ საბოლოო გადაწყვეტილება მიღებული არ არის და ახალ მინისტრთან დაკავშირებით განცხადება უახლოეს პერიოდში გაკეთდება.

ერევანში დაკავებული დემონსტრანტების წინააღმდეგ გამოძიება დაიწყო. მათ ბრალად ედებათ პოლიციელებზე თავდასხმა და არეულობის ორგანიზება. 

უშიშროების ყოფილი მინისტრი საქართველოში ჩამოსვლისთანავე დაკავებული იქნება - ამ განცხადებას მთავარი პროკურატურა აკეთებს, რომელიც უკვე მომავალ კვირაში ინტერპოლის ცენტრალურ ოფისში დოკუმენტაციას გაგზავნის და იგორ გიორგაძეზე საერთაშორისო ძებნის დაწყებას ისევ მოითხოვს.

კორცხელის სკანდალური დაპირისპირების მონაწილეები მილანსა და ნიუ იორკში მოგზაურობენ. გიგა ტყემალაძეს და ნოშრევან წურწუმიას სასამართლომ აღმკვეთ ღონისძიებად გირაო შეუფარდა. როგორც გაირკვა, პროკურატურას ჯგუფურ ხულიგნობაში ბრალდებულებისთვის ქვეყნიდან გასვლაზე შეზღუდვების დაწესება არ მოუთხოვია. 

რუსთავი 2-ის გარეშე საპარლამენტო არჩევნები ვერ იქნება ლეგიტიმური - დღეს ამერიკელმა დიპლომატმა საქართველოში კიდევ ერთი განცხადება გააკეთა, ელჩმა კელიმ თავის განცხადებაში კიდევ უფრო მკაფიოდ ჩამოაყალიბა რუსთავი 2-ის და შესაბამისად, წინასაარჩევნო გარემოს თავისუფლების კრიტერიუმები.

ინტერპოლმა ძებნილთა სიიდან კიდევ ერთი ქართველი ამოიღო. ის ამჯერად ედუარდ შევარდნაძის ეკონომიკური მრჩეველი თემურ ბასილიაა.

საკონსტიტუციო სასამართლოში რუსთავი 2-ის საქმის განმხილველ მოსამართლეებზე ზეწოლა მიმდინარეობს. რუსთავი 2-ის ინფორმაციით, ერთ-ერთ მოსამართლეს, მისი ოჯახის საკუთრებაში არსებული ბიზნესკომპანიის გაკოტრებით აშანტაჟებენ.

რამდენიმე წუთის წინ დმანისის რაიონის სოფელ სოღუთლოში განმეორებითი ბიძგები დაფიქსირდა. სეისმოლოგიური ცენტრის ინფორმაციით, ბიძგების სიმძლავრემ 2,8 მაგნიტუდა შეადგინა.

ბრაზილიელმა სამართალდამცველებმა ტერაქტის ორგანიზებაში ეჭვმიტანილი ათი პირი დააკავეს. ძალოვანების ინფორმაციით, დაკავებულები ტერაქტის მოწყობას რიოს ოლიმპიური თამაშების დროს გეგმავდნენ.

ქართულმა ოცნებამ ამომრჩეველს იმერეთში კიდევ სამი ოლქის მაჟორიტარობის კანდიდატი წარუდგინა. პრემიერმინისტრი დღეს ტყიბულში, თერჯოლაში, ბაღდათსა და წყალტუბოში იმყოფებოდა.

თბილისთან ახლოს ცოტა ხნის წინ მიწიძვრა მოხდა. არსებული ინფორმაციით, ეპიცენტრი დმანისის რაიონის სოფელი სოღუთლოა.

ჩვენ მაქსიმალური გავაკეთეთ ამ ოთხ წელიწადში იმისათვის, რომ ადამიანებს არ ჰქონოდათ მინიმალურ საკითხებზე საზრუნავი - ეს განცხადება გიორგი კვირიკაშვილმა ტყიბულში გააკეთა.

სტიქია ბოლნისის რაიონში. ძლიერმა ქარმა და სეტყვამ რამდენიმე სოფელი დააზარალა. განადგურებულია მოსავალი, დაზიანებულია ელექტროგადამცემი ხაზები და საცხოვრებელი სახლები. 

ნაციონალური მოძრობა ახალციხის მუნიციპალიტეტს შეკრებისა და მანიფესტაციის უფლების დარღვევაში ადანაშაულებს. პარტიაში განმარტავენ, რომ ადგილობრივი ხელისუფლება შოთა რუსთაველის ძეგლთან, ამომრჩეველთან შეხვედრის უფლებას არ აძლევს.

გიორგი პაპუაშვილის სკანდალურ განცხადებას, სადაც ის მოსამართლეებზე მიმდინარე ზეწოლაზე საუბრობს, არასამთავრობო სექტორში ეხმაურებიან. მესამე სექტორში მიაჩნიათ, რომ დაუყონებლივ განცხადების გაკეთების შემდეგ პროკურატურას, საკონსტიტუციო სასამართლოს თავმჯდომარის განცხადების საფუძველზე უნდა დაეწყო გამოძიება.

იგორ გიორგაძის საქმესთან დაკავშირებით იუსტიციის მინისტრი კომენტარს არ აკეთებს. თეა წულუკიანმა ჟურნალისტების დასმულ შეკითხვებს არ უპასუხა. ის გარემოს დაცვის სამინისტროში გიგლა აგულაშვილთან კონსულტაციას აწარმოებდა, თუმცა შეხვედრის დეტალები უცნობია.

საქართველოს მთავარმა პროკურატურამ საკონსტიტუციო სასამართლოს თავმჯდომარეს საგამოძიებო ორგანოში გამოცხადების შესახებ შეტყობინება გაუგზავნა. ამის თაობაზე მთავარმა პროკურატურამ განცხადება გაავრცელა. 

გიორგი პაპუაშვილის საგანგებო განცხადების შემდეგ რამდენიმე წუთის წინ სპეციალური განცახდება გააკეთეს პარტია საქართველოს ევროპელი დემოკრატებში.

საკონსტიტუციო სასამართლოს მოსამართლეებზე ზეწოლას ლეიბორისტები რუსთავი 2-ის საქმეს უკავშირებენ. განცხადება გიორგი გუგავამ რამდენიმე წუთის წინ გააკეთა. პარტიის ერთ-ერთი ლიდერი ამბობს, რომ გიორგი პაპუაშვილის განცხადება საგანგაშოა. 

"როგორც ჩანს ხელისუფლება აკრძალული მეთოდებით ცდილობს მოსამართლეებზე ზეწოლას, რაც არ გვიკვირს,"-ასე გამოეხმაურნენ პარტია თავისუფალ დემოკრატებში, საკონსტიტუციო სასამართლოს თავმჯდომარის, გიორგი პაპუაშვილის განცხადებას, სადაც საუბარი იყო მოსამართლეებზე მიმდინარე ზეწოლის შესახებ. 

გიორგი პაპუაშვილის განცხადებას ეხმაურება პრემიერმინისტრი. გიორგი კვირიკაშვილის განცხადებით, საქმის დეტალების გარკვევა მან მთავარ პროკურორს დაავალა.

"მე ზოგადი შინაარსი მოვისმინე, ეს ნამდვილად ასეა, მან პროკურატურას უნდა მიმართოს," - ასე ეხმაურება პარლამენტის ვიცე სპიკერი მანანა კობახიძე, საკონსტიტუციო სასამართლოს თავმჯდომარის, გიორგი პაპუაშვილის განცხადებას მოსამართლეებზე მიმდინარე ზეწოლის შესახებ.