Новости за 29.05.2023

Россия Президенты Владимир Путин телефоннан сөйләшкәндә төрек лидеры Рәҗәп Тайип Эрдоганны дәүләт башлыгы вазифасына яңадан сайлануы белән котлады. Бу хакта Кремльнең матбугат хезмәте хәбәр итә.

2023 елда Татарстан башкаласында Гвардия урамыннан Җиңү проспектына кадәр Вознесение трактының беренче участогы ачыла. Бу хакта эшлекле дүшәмбедә Казан башкарма комитеты башлыгы урынбасары Игорь Куляжев хәбәр итте.

Якындагы көннәрдә Татарстанда тотрыксыз һава торышы көтелә. Республикага яңгыр, боз яварга мөмкин, әмма һава температурасы күпкә төшмәячәк. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

2030 елга Россиядә минималь хезмәт хакы күләме яшәү минимумыннан 30 процентка артык булачак. Бу хакта Россия Хезмәт һәм социаль яклау министрлыгы башлыгы Антон Котяков белдерде. ТАСС шул хакта яза.

Татарстанда Корбан бәйрәме алдыннан татар мәкаме белән азан әйтү бәйгесенә старт бирелде. Әлеге конкурс 3 яшьтән алып 14 яшькә кадәрге малайлар арасында үткәрелә. Аны «Рухи моң» иҗат берләшмәсе «Ханский дом» төзелеш компаниясе һәм «Тәртип» радиосы белән берлектә оештыра. Консультант – Татарстан мөфтияте, диелә Диния нәзарәте хәбәрендә.

7-8 июльдә Троицк шәһәрендә «Рәсүлев укулары: Россия тарихында һәм хәзерге тормышында ислам» IV Халыкара ХII Бөтенроссия фәнни-гамәли конференциясе була. Бу хакта Чиләбе татарлары конгрессының социаль челтәрдәге төркемендә хәбәр ителә.

Башкортстанның Калтасы районында янгын сүндерүчеләр Куян авылыннан 4-6 чакрым ераклыкта табигый янгынны сүндерә. Торак пункт республиканың Кызыл Кама районына карый. Бу хакта «Башинформ» Башкортстанның Гадәттән тыш хәлләр министрлыгына сылтама белән хәбәр итә.

Казахстанда Сабантуй үткәрү көннәре билгеләнде. Мәдәни программада Татарстан Республикасы артистлары да катнаша. Бу хакта Татарстанның Казахстандагы Тулы вәкаләтле вәкиллегенең матбугат хезмәте хәбәр итә.

Сишәмбе көнне Татарстан территориясендә кабат яшен һәм көчле җил көтелә. Көндез җилнең тизлеге секундына 15-20 метрга кадәр, ә урыны белән 23 метрга кадәр җитәргә мөмкин. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Ата-анасы билгеле булмаган балалар, туендыручысыннан мәхрүм калган гаиләләр һәм халыкның кайбер башка категорияләре социаль һәм иминият пенсияләрен гариза бирмичә ала башлаячак. Бу хактагы законны бүген Россия Президенты Владимир Путин имзалады.

Мәскәүдә эш сәфәрендә Татарстан Рәисе Рөстәм Миңнеханов Кече һәм урта бизнесны үстерү мәсьәләләре буенча хөкүмәт комиссиясе утырышында катнашты. Чарада кече һәм урта бизнесны алга таба үстерү планнары, эшмәкәрләргә ярдәм чаралары турында фикер алыштылар.

Россия Президенты Владимир Путин юлда фото- һәм видеокамералар урнаштыру кагыйдәләрен билгели торган законга төзәтмәләр кертте. Ул 2024 елның 1 сентябреннән үз көченә керә. Бу документ хокукый мәгълүматның рәсми интернет-порталында чыкты.

Бүген иртән Зәйдә Горький урамында бер ир-ат шәхси канализация коесына егылып төшкән. Бу хакта «Татар-информ»га Россия Гадәттән тыш хәлләр министрлыгының Татарстан буенча Баш идарәсендә хәбәр иттеләр.

Төбәкләр Федерация Советындагы үз вәкилләрен вакытыннан алда чакыртып ала алачак. Мондый вәкаләтләрне аларга Россия Президенты Владимир Путин бирде.

Бу атнада Татарстанда аномаль эсселек кимүгә бара. Ул көнбатышка китә торган антициклон ярдәмендә мөмкин булды. Казан федераль университеты профессоры, география фәннәре докторы Юрий Переведенцев «Татар-информ»га якын көннәргә һава торышы фаразын хәбәр итте.

Ижауда 25 нче тапкыр татар-башкорт көйләрен башкаручыларның төбәкара «Язгы тамчы» инструменталь фестиваль-бәйгесе үтте. Аны Удмуртиянең Милли сәясәт министрлыгы ярдәме белән Татар иҗтимагый үзәге оештырды. Конкурсның максаты — талантлы балаларны барлап, татар музыка сәнгатенә мәхәббәт тәрбияләү, милли мәдәниятебез, сәнгатебез дөньясына әйдәү. Бу хакта «Яңарыш» сайты хәбәр итә. 

Хәзерге вакытта авыл хуҗалыгы икътисадның төп тармакларының берсенә әверелә. Шуңа күрә илнең һәм төбәкнең иң мөһим бурычларыннан берсе - авыл тормышын саклап калу. Бу хакта Татарстан Дәүләт Советы Рәисе Фәрит Мөхәммәтшин Биектау районындагы зона семинар-киңәшмәсендә белдерде.

1 июньдә 10.00 сәгатьтә III «УенФест» Халыкара традицион халык уеннары фестиваль-бәйгесенең финал туры башлана. Йомгаклау этабы «Казан Кремле» музей-тыюлыгында узачак. Бу хакта Татарстан Мәдәният министрлыгының матбугат хезмәте хәбәр итә.

Лаеш районында яшәүчене юл хәрәкәте кагыйдәләрен бозуы сәбәпле, ашыгыч ярдәм машинасы хезмәткәре үлемендә гаеплиләр. Бу хакта Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итә.

ТР Дәүләт Советына депутатлыкка кандидат Руслан Нигъмәтуллин өстәмә сайлауның якынча нәтиҗәләре буенча тавыш бирүдә әйдәп бара. Тавыш бирү кичә Чаллының 20нче Электротехник округында узды. Бу хакта Татарстан Үзәк сайлау комиссиясе хәбәр итә.

Июньдә Россия көнен билгеләп үтү уңаеннан кыска эш атнасы була. Бу хакта Хезмәт һәм мәшгульлек буенча федераль хезмәт хәбәр итә.

27 майда Төркиянең Анталия шәһәрендә башкорт Сабан туе булып узды. Бирегә башкортлар гына түгел, милли бәйрәмдә катнашырга теләгән татарлар да күпләп килгән иде.

3 июньдә 17.00 сәгатьтә себер татарларының «Тимур батыр» циклына тупланган әкиятләре Милли музыка оркестры квинтеты катнашында Татар китабы йортында укылачак. Кичәдә Себер татарларының йолалары һәм ышанулары турында да сөйләячәкләр.

2023 елның 29 маеннан 16 июньгә кадәр «Татар теле һәм әдәбияты буенча республика олимпиадалары һәм (яки) татар теле һәм әдәбияты буенча халыкара олимпиада призерлары һәм җиңүчеләре әзерләгән өчен татар теле һәм әдәбияты укытучыларына ярдәм» грантын дәгъвалаучылар арасында бәйге оештырыла. Бу хакта Татарстан Мәгариф һәм фән министрлыгының матбугат хезмәте хәбәр итә.

Түбән Камада «Лада Приора» автомобиленең йөртүчесе, идарәсен югалтып, эстакадага килеп бәрелгән, пассажиры комада. Бу хакта Түбән Кама Дәүләт автоинспекциясенең матбугат хезмәтендә хәбәр иттеләр.