Новости за 24.05.2023

Апаста «Соңгы кыңгырау» бәйрәме Россия һәм Татарстан гимны белән башланып китте. Флаг күтәрү өчен төрле бәйгеләрдә җиңү яулаган 11 а класс укучысы Алинә Сусарина, 11 б класс укучысы Гүзәл Гыйсмәтуллина чакырылды. Бу хакта «Апастово-информ» сайтында хәбәр ителә.

Арча район суды Шәке авылыннан булган умартачы Нурулла Закиров файдасына карар чыгарды. Ул «Северный» авыл хуҗалыгы предприятиесе белән узган елның июлендә кырларны химик матдәләр белән эшкәрткәннән соң бал кортлары үлү сәбәпле судлашты, дип хәбәр итә Татарстан Авыл хуҗалыгы һәм азык-төлек министрлыгының матбугат хезмәте.

Иртәгә, 25 майда, Татарстанда урнашкан эссе һәм коры һава торышы сакланачак. Бу хакта Татарстанның Гидрометеорология үзәге хәбәр итә.

Казанның Борисково торак массивы янында Тула һәм Горийская урамнары киселешендә ике автомобиль бәрелешкән, дип хәбәр итте Метроэлектротранс.

Бүген Дәүләт Советы Рәисе Фәрит Мөхәммәтшин эш сәфәре белән Менделеевск районында булды, анда авыл халкының эшлеклелеген арттыру мәсьәләләре буенча зона семинар-киңәшмәсе үткәрде. Семинарда район һәм авыл җирлекләре башлыклары, шәхси ярдәмче хуҗалыклар һәм гаилә фермалары җитәкчеләре, республиканың көнчыгыш һәм төньяк-көнчыгыш зоналарының 14 районыннан авыл хуҗалыгы кооперативлары, профильле министрлыклар һәм ведомстволар, банк өлкәсе вәкилләре катнашты.

Махсус хәрби операциядә катнашучыларга ярдәм итүче Татарстан волонтерлары берләшмәләре бердәм базага берләштереләчәк. Алар өчен 450 квадрат метр мәйданлы бина бүлеп бирелде, анда алар бергә эшләячәк, дип хәбәр итә Халык фронтының Татарстан Республикасындагы яшьләр бүлеге матбугат хезмәте.

Татарстанда татар телендәге элмә такталарда һәм табличкалардагы хаталарны ачыклау буенча конкурс дәвам итә. 16 майга булган мәгълүматларга караганда, республика халкы 106 гариза җибәргән, шуларның 19 ы – казанлылардан.

КФУның Габдулла Тукай исемендәге Милли мәдәният һәм мәгариф югары мәктәбендә галимә, филология фәннәре докторы, профессор Флера Сафиуллинаның 85 еллыгына багышланган кичә булды.

Быел Россия мөселманнары өчен хаҗга бару урыннары саны тагын 2 мең урынга артырга мөмкин, дип белдерде Федерация Советының Фән, мәгариф һәм мәдәният комитеты рәисенең беренче урынбасары, сенатор Ильяс Умаханов.

Биектау районының Шигали авылында Солонка елгасында яшүсмер батуы турында хәбәр бүген көндез килде, дип хәбәр иттеләр «Татар-информ»га Россия Гадәттән тыш хәлләр министрлыгының Татарстан Республикасы буенча Баш идарәсе матбугат хезмәтендә.

Кинорежиссер Илшат Рәхимбайның «Микулай» фильмы 22 июньнән киң прокатка чыга. Фильмның афишасы чыккан.

Сенаторлар юл камераларын урнаштыру кагыйдәләре турындагы законны хуплады. «РИА Новости» шул турыда яза.

Татарстанда милли бәйрәмнәр 28 майда Лаеш районының Никольское авылында узачак «Каравон» бәйрәме белән башланып китә. Бу хакта «Татар-информ»да узган матбугат конференциясендә Татарстанның мәдәният министры урынбасары Дамир Натфуллин хәбәр итте.

26-28 майда Уфаның Совет мәйданында беренче тапкыр «Китап бәйрәме» дигән китап ярминкәсе узачак. Ул ел саен үткәрелә торган чара булачак. Күргәзмәдә «Казан утлары» китаплар сериясе тәкъдим ителә. «Татмедиа» акционерлык җәмгыяте шул турыда хәбәр итә.

Россия Президенты Владимир Путин хәрби махсус операция зонасында бурычларны үтәүче Россия Гадәттән тыш хәлләр министрлыгы хезмәткәрләренең гаиләләренә бер тапкыр бирелә торган түләүләр билгели торган указ имзалады. Мисалга, алар яраланган очракта гаиләләргә 3 миллион сум, ә һәлак булган очракта 5 миллион сум түләнәчәк.

21 майда Свердловск өлкәсенең Татар мәдәнияте үзәгендә «Каюм Насыйри институты» Фәнни-мәгариф үзәге каршындагы якшәмбе мәктәбенең йомгаклау дәресләре булды. Бу хакта Татарстан Республикасының Свердловск өлкәсендәге Даими вәкиллеге хәбәр итә.

Казанда Әмәт станциясе янында поезд бер ир-атны бәрдергән, ул һәлак булган, дип хәбәр иттеләр Россия Тикшерү комитетының Транспортта төбәкара тикшерү идарәсенең матбугат хезмәтендә.

Россия Хөкүмәте һәм «Россия халыклары йорты» IT-компаниясе төрле халыкларның телләрен саклау эшенә ясалма интеллект җәлеп итәчәк. Бу хакта «Хөкүмәт сәгате» барышында Милләтләр эшләре буенча федераль агентлык җитәкчесе Игорь Баринов әйтте.

Бу елдан башлап ана (гаилә) капиталы акчаларыннан айлык түләү берничә үзгәрешне исәпкә алып бирелә. Хәзер түләү өч яшькә кадәрге, беренче баланы да кертеп, һәр балага каралган. Бу хакта бүген социаль челтәрдә оештырылган туры эфир барышында Россия Социаль фондының Татарстан Республикасы бүлеге идарәчесе Эдуард Вафин искә төшерде.

Мәскәүнең Җәмигъ мәчетендә Россиядә хаҗ миссиясенең 20 еллыгына багышланган «Россия мөселманнарының хаҗы: Империядән Федерациягә кадәр» фәнни-гамәли конференциясе узды. Бу хакта Россия Мөфтиләр шурасы хәбәр итә.

Адоратский урамында 7 машина бәрдергән Audi Q5 шоферын 10 тәүлеккә кулга алганнар. Бу хакта «Татар-информ»га шәһәр Дәүләт автоинспекциясенең матбугат хезмәтендә хәбәр иттеләр.

Блогерларның эшчәнлеген салымнар өлешендә җайга салу буенча Федерация Советы инициативасы белән Кремльдә әлегә танышмаганнар. Бу хакта РФ Президентының матбугат сәркатибе Дмитрий Песков әйтте.

Быел югары уку йортларына кабул итү кампаниясе үзгәрә, документларны электрон тапшыру өстенлекле алым булачак. Бу хакта Россиянең фән һәм югары белем министры Валерий Фальковка сылтама белән РИА Новости яза.

Татарстанда ана (гаилә) капиталы акчаларын куллануның биш төреннән иң популяр юнәлеш булып торак шартларын яхшырту тора. Бу хакта бүген социаль челтәрдә оештырылган туры эфирда Россия Социаль фондының Татарстан буенча бүлекчәсе идарәчесе Эдуард Вафин әйтте.

Иркутск мөселманнары шәһәрнең иске татар зиратында өмә уздырды. Бу хакта Россия мөселманнары Дини җыены сайтында хәбәр ителә.