Новости за 06.05.2023

Татарстан Республикасында 2023 ел Милли мәдәниятләр һәм гореф-гадәтләр елы дип игълан ителгән иде. Шул уңайдан «Адымнар-Алабуга» күптелле белем бирү комплексында Татарстанның барлык «Адымнар» мәктәпләрендә укучыларның әти-әниләре өчен татар теленнән республика олимпиадасының йомгаклау туры узды.

Татарстан Авыл хуҗалыгы һәм азык-төлек министрлыгының яшь белгечләре «Азнакай» агрофирмасының мега-фермасында булды. Алар «Кайдзен» сакчыл җитештерү сынау проектының гамәлгә ашырылышы белән танышты. Бу хакта «Азнакай» сайтында хәбәр ителә.

Чүпрәледә мәктәп укучылары, приютта тәрбияләнүчеләр һәм ветераннар Кызыл Йолдыз рәвешендә өч венок ясый. Аларны 9 майда район үзәгендә Мәңгелек утка куячаклар. Бу хакта «Туган як» сайтында хәбәр ителә.

Алабугада «Хәтер бакчасы» акциясендә катнашучылар батыр якташлары, туганнары истәлегенә 4000  чыршы утыртты. Анда студентлар, полиция хезмәткәрләре, педагоглар, заводта эшләүчеләр һәм тагын башка бик күп һөнәр ияләре бар иде. Бу хакта «Алабуга нуры» хәбәр итә.

Май бәйрәмнәре көннәрендә һәм алдагы чәршәмбе көнне Татарстанда кырау төшүе көтелә. Бу хакта республиканың Гидрометеорология үзәге хәбәр итә.

11 яшьлек бала өстенә футбол капкасы ауганнан соң, ваемсызлык факты буенча җинаять эше кузгатылды, дип хәбәр итте Россия Тикшерү комитетының Татарстан Республикасы буенча идарәсе җитәкчесенең өлкән ярдәмчесе Андрей Шептицкий.

Казанда яшәүче бер хатын-кыз көчләүләре турында алдап гариза язган өчен суд каршына басачак, дип хәбәр итә Россия Тикшерү комитетының Татарстан Республикасы буенча идарәсе матбугат хезмәте.

22 майда Галиәсгар Камал театры бинасында язучы-прозаик, драматург, Г.Тукай исемендәге Дәүләт премиясе лауреаты, Татарстанның халык язучысы Рабит Батулланың 85 яшьлек юбилее уңаеннан иҗат кичәсе була.

COVID-19 беркайчан да тулысынча бетмәячәк, чөнки аның хайваннардан кешегә күчү ысуллары бу эшне бик катлауландыра. Аның нәтиҗәләре белән генә көрәшергә мөмкин, дип белдерде Бөтендөнья сәламәтлек саклау оешмасының сәламәтлек саклау өлкәсендә гадәттән тыш хәлләр программасы башкарма директоры Майк Райан. Моны РИА Новости яза.

Татарстанда 42 мәктәп һәм мәктәп-интернатны, биш балалар бакчасын төзекләндерү планлаштырылган. Шулардан 41 мәктәп һәм бер балалар бакчасында эшләр бара. Эшләр 26 һәм 70 процентка башкарылган, диде республиканың Төзелеш министрлыгы җитәкчесе Марат Айзатуллин. Бу хакта ул Татарстан Республикасы Хөкүмәте Йортында узган киңәшмәдә сөйләде.

Удмуртия «Ак калфак» татар хатын-кызлары берлеге активистлары Дуслык йортында Җиңү көненә багышланган иҗат кичәсе үткәрде. Бөтендөнья татар конгрессы сайты шул турыда яза.

26-28 майда Уфада «Беларусь Язучылар берлеге» иҗтимагый берләшмәсе рәисе Александр Карлюкевич һәм «Беларусь» нәшрияты җитәкчелеге «Китап бәйрәме» дигән беренче Халыкара китап ярминкәсендә катнашачак. Очрашу Россия һәм Беларусь төбәкләренең Х форумы кысаларында узачак. «Башинформ» шул турыда яза.

Чаллыда мэр Наил Мәһдиев Җиңү көненең 78 еллыгы уңаеннан Бөек Ватан сугышы ветераннары һәм кыска вакытлы ялга кайткан махсус хәрби операциядә катнашучы хәрбиләрне тантаналы рәвештә кабул итте. Чарадан фотосурәтләр шәһәр администрациясенең телеграмдагы каналында чыкты.

Казан Дәүләт автоинспекциясендә бүлекчәләрнең май бәйрәмнәрендәге эш режимы турында сөйләделәр.

Россиядә алкогольгә каршы яңа чаралар карала, шул исәптән 20.00 сәгатьтән 11.00 сәгатькә кадәр спирты күп күләмдә булган эчемлекләр сатуны тыю. Моннан тыш, мондый эчемлекләрне 21 яше тулган сатып алучыларга гына сату рөхсәт ителергә мөмкин. РИА Новости бу турыда Сәламәтлек саклау министрлыгы отчетына сылтама белән хәбәр итә.

Татарстанда 27 кешедә коронавирус инфекциясе расланган. Авыручылар саны бераз арту 3 майдан соң инде дүртенче көн рәттән күзәтелә, 3 майда республикада 24 авыручы ачыкланган. Стопкоронавирус.рф порталында шул турыда хәбәр ителә.

Якын арада Семейда татар шагыйре һәм журналисты, Советлар Союзы Герое Муса Җәлилгә һәйкәл ачарга ниятлиләр. Шул ук вакытта Татарстан башкаласы Казанда казах шагыйре һәм мәгърифәтчесе Абай Кунанбаевка һәйкәл куелачак, дип хәбәр итә Tengrinews.kz корреспонденты.

Татарстан Республикасында һава шартлары бозылу сәбәпле, шторм кисәтүе игълан ителде, дип хәбәр итә Россия Гадәттән тыш хәлләр министрлыгының Татарстан Республикасы буенча Баш идарәсе. Бу хакта Татарстанның Гидрометеорология һәм әйләнә-тирә мохит мониторингы идарәсенә сылтама белән хәбәр ителә.

Режиссер Илдар Матуров «Безнең тарих – безнең горурлык» проектының бер өлеше булган «Хәтерлибез һәм горурланабыз» («Помним и гордимся») документаль фильмын әзерләп бетергән.

Татарстанның Мамадыш районында Hyundai Solaris һәм Ford йөк машинасы бәрелешкән. Бу хакта «Татар-информ»га юл-транспорт һәлакәте шаһитлары хәбәр итте.

Төш вакытыннан кичке җидегә кадәр Татарстанның көнчыгыш районнарында яңгыр һәм яшен көтелә, дип кисәтә Татарстанның Гидрометеорология үзәге.

Журналист Айгөл Шәрәфиева әтисе - журналист, «Татарстан яшьләре» газетасында 27 ел баш мөхәррир булып эшләгән Исмәгыйль Шәрәфиевне искә алды.

5 майда Уфада капиталь төзекләндерүдән соң Шаһит Ходайбирдинның (1896 – 1924) йорт-музее ачылды. Аның исеме алтын хәрефләр белән Башкортстан елъязмасына язылган. Ул күпкырлы шәхес – күренекле партия һәм дәүләт эшлеклесе, Эчке эшләр халык комиссары, республикага нигез салучыларның берсе, язучы һәм журналист. «Башинформ» шул турыда яза.

Подмосковье дачниклары берлеге рәисе Никита Чаплин (Дәүләт Думасы депутаты, «Бердәм Россия» фракциясе) «РИА Новости»га хәбәр иткәнчә, әгәр дачалардагы күршеләр территорияне пычратса, судка мөрәҗәгать итәргә кирәк. Хокук бозган өчен штраф 50 мең сумга кадәр җитә ала.

Татарстан Рәисе Рөстәм Миңнеханов Россия Федерациясе Эчке эшләр министрлыгының Казан юридик институты җитәкчесе Фоат Зиннуровка «Татарстан Республикасы алдындагы казанышлары өчен» ордены медале тапшырды. Шул турыдагы указ республика җитәкчесе сайтында урнаштырылган.