Новости за 23.05.2023

Бүген Актаныш районында авыл хуҗалыгы тармагы белгечләре өчен республикакүләм Сенаж көне узды. Семинар-киңәшмәсендә Татарстан авыл хуҗалыгы һәм азык-төлек министры Марат Җәббаров, ТР Министрлар Кабинетының Баш ветеринария идарәсе башлыгы Алмаз Хисаметдинов, Актаныш районы башлыгы Ленар Зарипов катнашты. Бу хакта «Актаныш» сайтында хәбәр ителә.

Шәхси ярдәмче хуҗалыкларда авыл хуҗалыгы продукциясен җитештерү күләме буенча Татарстан Дагыстаннан соң Россиядә икенче урында тора. Бу хакта Татарстан авыл хуҗалыгы һәм азык-төлек министрының беренче урынбасары Ленар Гарипов ТР Дәүләт Советының Экология, табигатьтән файдалану, агросәнәгать һәм азык-төлек сәясәте комитеты утырышында хәбәр итте.

Татарстан дәүләт-хосусый партнерлыкны үстерү буенча Россия төбәкләре арасында дүртенче урынны алды. Рейтингны Россия Икътисади үсеш министрлыгы 2022 ел нәтиҗәләре буенча әзерләгән. Бу хакта Татарстан Инвестицион үсеш агентлыгы җитәкчесе Талия Миңнуллина хәбәр итә.

Иртәгә, 24 майда, Татарстан территориясендә алмашынучан болытлы һава көтелә. Көндез көчле җил фаразлана, аның тизлеге секундына 15-17 метрга кадәр җитәргә мөмкин. Бу турыда Татарстан Гидрометеорология һәм әйләнә-тирә мохитне күзәтү үзәге матбугат хезмәте хәбәр итә.

Депутатлар төркеме Дәүләт Думасына гражданнарга теркәлү урыны буенча яшәмәгән өчен штраф салуны гамәлдән чыгару турында закон проектын кертте. Бу хакта Дәүләт Думасы вице-спикеры Владислав Даванков белдерде. Хәзер прописка буенча яшәмәгән өчен штраф 2 мең сум чамасы тәшкил итә. Бу хакта ТАСС яза.

Чиләбе өлкәсе Арслан авылының «Ләйсән» халык фольклор ансамбле юбилеен билгеләп үтте. Бу хакта Татарстанның Свердловск өлкәсендәге Даими вәкиллегенең матбугат хезмәте хәбәр итә.

Чит ил паспортын югалту, шәхси мәгълүматларны үзгәртү, гамәлдә булу вакыты чыгу һәм башка берничә сәбәп чит ил паспортын гамәлдә түгел дип тануга сәбәп булырга мөмкин. Бу закон проектын йомгаклау укуында Дәүләт Думасы кабул итте. ТАСС шул хакта хәбәр итә.

Россия Фән һәм югары белем министрлыгы университетларга һәм башка югары уку йортларына махсус операциядә катнашучы студентлар һәм аларның гаилә әгъзалары өчен өстәмә ярдәм чаралары турында тәкъдимнәр җибәрде. Бу хакта ведомствоның матбугат хезмәте хәбәр итә.

Әлмәттә Ризаэддин Фәхреддин исемендәге премиягә ия булган укучылар исемлеге билгеле. Быелгы премиягә Рамазан Сәләхов һәм Эльвина Мусина лаек булды. Бу турыда оештыручылар хәбәр итте.

24 май көнне Бөтендөнья татар конгрессының Милли Шура рәисе Васил Шәйхразыев эш сәфәре белән Курган өлкәсенең Йолдыз (Эчкен) авылына барачак.

Бүген Татарстан Дәүләт Советы Рәисе Фәрит Мөхәммәтшин Иран Ислам Республикасының Генераль консулы Давуд Мирзахани белән очрашты. Алар Россия-Иран хезмәттәшлеге кысаларында Иран белән Татарстанның һәрьяклап хезмәттәшлек итү мәсьәләләре турында фикер алышты.

Татарстан Рәисе Рөстәм Миңнеханов Кытайның Аньхой провинциясе губернаторы Ван Циньсян белән очрашты. Бу хакта республика җитәкчесенең матбугат хезмәте хәбәр итә.

Татарстан Рәисе Рөстәм Миңнеханов социаль челтәрдәге сәхифәсендә Мәскәүдә ТР Дәүләт Киңәшчесе Минтимер Шәймиевне бүләкләү тантанасыннан фото куйды. Искәртик, Россия Президенты Владимир Путин аңа Россия Федерациясенең югары бүләге - Андрей Первозванный орденын тапшырды.

Россия Президенты Владимир Путин Чечня башлыгының тормыш иптәше Медни Кадыровага «Герой ана» исемен бирде. Ул Мәскәү Кремлендә узган бүләкләү тантанасында катнашты.

Бу көннәрдә республиканың барлык мәктәпләрендә «Соңгы кыңгырау» бәйрәме һәм тантаналы линейкалар уза. Татарстанда 2022-2023 уку елында 11 сыйныфны - 15 мең һәм 9 сыйныфны 40 меңнән артык укучы тәмамлый. Соңгы кыңгырау бүген Казанның Лобачевский исемендәге лицее укучылары өчен яңгырады. Чыгарылыш укучыларын Татарстан Дәүләт Советы Рәисе Фәрит Мөхәммәтшин котлады.

Бүген Россия катлаулы вазгыять кичерә, шуңа да карамастан Россия Президенты Владимир Путин илнең күпмилләтле һәм күпконфессияле халкын берләштерә алды. Бу хакта Кремльдә бүләкләү тантанасында Татарстан Дәүләт Киңәшчесе Минтимер Шәймиев әйтте.

Казанда Citroen автомобилен йөртүче идарә итә алмаган, юлдан чыгып киткән һәм агачка бәрелгән. Бу хакта «Татар-информ»га авария шаһитлары хәбәр итә.

Башкортстан рестораторлары һәм отельерлары ассоциясе вәкиллеге Казан һәм Татарстан республикасы рестораторлары һәм отельерлары ассоциясе белән хезмәттәшлек турында килешү төзеде.

Россия Президенты Владимир Путин Татарстанның беренче Президенты, республиканың Дәүләт Киңәшчесе Минтимер Шәймиевне бүләкләде. Бүләкләү тантанасы Мәскәү Кремленең Екатерина залында уза.

Татарстан Рәисе Рөстәм Миңнеханов Кытайның Аньхой провинциясендәге Хэфэй шәһәрендә. Бу хакта республика җитәкчесенең матбугат хезмәте хәбәр итә.

Татарстан тикшерүчеләре чакыру буенча бармаган Буа үзәк район хастаханәсе табибларына җинаять эше кузгаткан, алар ваемсызлыкта гаепләнә. Нәтиҗәдә, ир-ат һәлак булган. Россия Тикшерү комитетының Татарстан Республикасы буенча идарәсе җитәкчесенең өлкән ярдәмчесе Андрей Шептицкий шул турыда хәбәр итте.

Бүген 11.21 сәгатьтә водолазлар кичә югалган яшүсмернең мәетен тапкан. Бу хакта «Татар-информ»га Россия Гадәттән тыш хәлләр министрлыгының Татарстан Республикасы буенча Баш идарәсе матбугат хезмәтендә хәбәр иттеләр.

Казахстан-Татарстан фильмы «Тарлан» бу атнада Бурятия Республикасында узган «Хрустальный нерпенок» I Халыкара балалар, яшүсмерләр һәм гаилә фильмнары кинофестивалендә берьюлы ике приз яулады. Картина «Халыкара конкурста иң яхшы балалар роле» номинациясендә, шулай ук конкурсның балалар жюрие призы белән билгеләнә, дип хәбәр итә ТР Мәдәният министрлыгы матбугат хезмәте.

Дәүләт Советы депутатын өстәмә сайлау өчен Казанда «Идел-Пресс» полиграфия комплексы мәйданчыгында бюллетеньнәр тапшырылды. Сайлау 28 майда Чаллыда узачак. Чара Татарстан Үзәк сайлау комиссиясе рәисе Андрей Кондратьев катнашында узды.

Россиядә яшәүчеләрнең пенсиягә чыкканнан соң уртача хезмәт стажы җиде ел ярым тәшкил итә. 2022 елда ул 7,47 ел булган. «РБК» басмасы Росстат тикшеренүләренең мәгълүматларын анализлаган.