Новости за 27.05.2023

Укытучылар һәм остазлар елында Татарстанда Мәгариф һәм фән министрлыгының ведомство бүләкләре исемлеге киңәйтелгән. Яңа бүләкләрне исәпкә алып, ел саен республикада 4 меңнән артык педагогка бүләкләр тапшырылачак. Бу хакта Татарстан мәгариф һәм фән министры Илсур Һадиуллин Яшел Үзәндәге парламент комитеты утырышында хәбәр итте.

Бүгенгә Татарстанның 13 районы терлек азыгы әзерләүгә кереште. Алар - Нурлат, Питрәч, Чүпрәле, Әлки, Зәй, Буа, Апас, Әгерҗе, Аксубай, Азнакай, Актаныш, Балтач, Тәтеш, Мөслим һәм Ютазы районнары. Бу хакта шимбә киңәшмәсендә Татарстан Республикасы Авыл хуҗалыгы һәм азык-төлек министрлыгы башлыгы Марат Җәббаров хәбәр итте.

Бүген Әстерханның Три Протока - Җәмәле авылында XIII Бөтенроссия авыл Сабан туе уза. Тантанада Әстерхан өлкәсе губернаторы Игорь Бабушкин һәм Татарстан Рәисе Рөстәм Миңнеханов катнаша.

Татарстанның Россиядәге Тулы вәкаләтле вәкиллеге хезмәткәрләре Бөек Ватан сугышы ветераны 98 яшьлек Идият Төфәтуллин белән очрашты. Бу хакта Вәкиллекнең матбугат хезмәте хәбәр итә.

Казанның Киров районы суды Гладилов урамындагы 17нче поликлиникада атыш оештырган 50 яшьлек ир-атны кулга алды. Ул үтерүгә омтылуда гаепләнә. Тикшерү версиясе буенча, Алмаз Әхмәтшин поликлиникага кергән һәм каравылчының кулына ике тапкыр аткан. Машинада аны иптәше көтеп торган. 

Татарстан Рәисе Рөстәм Миңнеханов Әстерхан өлкәсенә эш сәфәренә килде. Ул төбәк губернаторы Игорь Бабушкин белән XIII Бөтенроссия авыл Сабан туенда катнаша. Бу хакта республика җитәкчесенең матбугат хезмәте хәбәр итә.

Бүген, 27 майда, Татарстан Милли китапханәсендә ачык әдәби очрашу була. Ул ел саен уздырыла торган «Китапханә төне» социаль-мәдәни акциясе кысаларында уза. Бу хакта китапханәнең матбугат хезмәте хәбәр итә.

Татарстанда быелның дүрт аенда 400 меңләп кеше диспансеризация һәм һөнәри медицина тикшеренүе узган, тагын 118 116 кешегә тирәнтен диспансеризация үткәрелгән. Мондый тикшеренү нәтиҗәсендә һәр унбишенче кеше үзендә җитди авыру ачыклаган һәм вакытында дәвалана башлаган, дип хәбәр итә ТР Сәламәтлек саклау министрлыгы матбугат хезмәте.

Узган елның көзендә Түбән Камага керү юлында шәһәр мөселманнары һәм христианнары бергәләп мәчет һәм чиркәү төзү урынына символлар салды. Монда «Дини капка» төзелә. Бу хакта Түбән Кама муниципаль районының рәсми сайтында шәһәрнең баш архитекторы Равил Сафиуллинга сылтама белән хәбәр ителә.

Россия эшмәкәрлеге көне алдыннан Татарстан Милли китапханәсенең конференц-залында «Иң яхшы эшмәкәрләр советы» IV республика конкурсы җиңүчеләрен хөрмәтләделәр. Анда Актаныш районы эшмәкәрләр советы республиканың муниципаль районнары арасында «Кооперация һәм хуҗалык итүнең кече формаларын үстерүдә хакимият, бизнес берләшмәләре белән нәтиҗәле хезмәттәшлек өчен» номинациясендә җиңде.

«Гренада» паркындагы «Җиңү» спорт манежында Чаллының иң яхшы мәктәп футбол командаларын бүләкләү тантанасы булды. Җиңүчеләрне бүләкләргә шәһәр мэры Наил Мәһдиев килде. Бу хакта «Шәһри Чаллы» хәбәр итә.

Сарман балалар сәнгать мәктәбендә Татарстанның халык артисты, җырчы Зөһрә Шәрифуллина һәм аның тормыш иптәше – Татарстанның атказанган артисты, виртуоз баянчы Азат Хәлимов белән очрашу үткәрелде. Бу хакта «Сарман» сайтында хәбәр ителә.

Әлки районында суны максатчан файдалануны ачыклау өчен комиссияләр төзергә җыеналар. Көннәр эссе торганда күп кеше үзәктән килә торган суны кирәгеннән артык та файдалана башлый. Бу хакта «Әлки хәбәрләре» газетасының сайты хәбәр итә.