Новости за 29.09.2023

Мөслимдә Разалия мәчете ачылды. Дин йортын ачу тантанасында Татарстан мөфтиенең мөхтәсибәтләр белән эшләү буенча урынбасары Равил хәзрәт Зөфәров, республика районнары мөхтәсибәт җитәкчеләре, дин әһелләре катнашты. Бу хакта «Мөслим-информ» хәбәр итә.

Мәскәү шәһәренең Татар милли-мәдәни мохтариятенең мактаулы рәисе, генерал-полковник Рәсим Акчурин Татар мәдәни үзәгендә булды һәм Мәскәү татарлары мохтарияте җитәкчесе Фәрит Фарисов белән очрашты. Алар яңа иҗади сезонга әзерлек һәм эш планнары турында фикер алышты. Бу хакта «Мәскәү татар милли-мәдәни мохтарияте» төбәк иҗтимагый оешмасы матбугат хезмәте хәбәр итә.

Чувашия Республикасы мөселманнары Диния нәзарәте җитәкчелегендә һәм Венер Усманов авторлыгында Чувашиядә «Чувашстан Республикасы татар эпиграфик һәйкәлләре» дигән китап чыкты. Бу хакта Россия мөселманнары Дини җыены матбугат хезмәте хәбәр итә.

Татарстан Республикасы Мәгариф һәм фән министрлыгының «Безнең яңа укытучы» грантын алуга конкурста катнашу өчен 500дән артык яшь укытучы гариза биргән. Бу турыда министрлыкның матбугат хезмәте хәбәр итте.

«ПромРейтинг» агентлыгы 2023 елның икенче кварталында Татарстан министрлыклары һәм ведомстволары җитәкчеләренең, шәһәрләре һәм районнары башлыкларының медианәтиҗәлелеге буенча чираттагы тикшерүнең нәтиҗәләрен тәкъдим итте. Анда беренче урынны Казан мэры Илсур Метшин алган.

7 октябрьдә 12.00 сәгатьтә Краснодарда Байбулат Батулланың «Ядәч! Истә — Бери да помни» фильмы күрсәтеләчәк. Бу хакта «Вконтакте» социаль челтәрендәге «Краснодар татарлары» сәхифәсендә хәбәр ителә.

Россия парламентының Түбән палатасына эшләмәүче пенсионерларның пенсиясен индексацияләү турындагы закон проектын карауга керттеләр.

Якутск шәһәрендә Саха (Якутия) Республикасында Татарстан көннәре кысаларында нигез салынган «Казан» скверын төзекләндереп бетергәннәр. Яңа скверда Советлар Союзы Герое, шагыйрь, татар халкының бөек улы Муса Җәлилнең бюсты урнаштырылган. Бу хакта Бөтендөнья татар конгрессының матбугат хезмәте хәбәр итә.

Җенесне алмаштыру Татарстанның Гаилә кодексында аерылышуга өченче нигез булды. 14 сентябрьдә ТР Дәүләт Советы кабул иткән бу законны бүген Татарстан Рәисе Рөстәм Миңнеханов имзалады.

Вакытлыча хезмәткә яраксызлык буенча пособиенең максималь күләме киләсе елда аена 83 мең сумнан 122 мең сумга кадәр (гражданның кереме тиешле дәрәҗәдә булганда) артачак. Бу хакта Россия Хезмәт һәм социаль яклау министрлыгы матбугат хезмәтендә сөйләделәр.

Сәүдә вакытында доллар курсы 8 сентябрьдән бирле беренче тапкыр 98 сумга кадәр артты. Бу хакта Мәскәү биржасы хәбәр итә.

Әфганстан буенча Мәскәү консультацияләр форматының 5нче утырышын уздыру кысаларында Татарстан Рәисе Рөстәм Миңнеханов белән Әфганстан эчке эшләр министры вазифасын башкаручы Амир-Хан Моттаки очрашуы булды.

«Созвездие-Йолдызлык» фестиваленең жюри әгъзалары традицион мастер-классларын башлап җибәргән. Тәтештә һәм Апаста XXIV «Созвездие-Йолдызлык» эстрада сәнгате ачык республика телевизион яшьләр фестивале алдыннан беренче мастер-класслар узган.

Татарстанда 17 618 йорт ягып җылыту сезонына әзерлек паспорты алды, бу 99,9 процент йортны тәшкил итә. Бүгенгесе көндә вентиляция каналларын тикшерү 17 829 йортта башкарылган, ул 97,4 процент тәшкил итә. Бу хакта матбугат конференциясендә Дәүләт торак фонды башлыгы урынбасары Ирек Шәйдуллин хәбәр итте.

«Оренбург шәл бәйләүчеләре» оешмасы авыл балаларын шәл бәйләү һөнәренә 5 ел элек өйрәтә башлаган.

Рабигыль-әүвәл аеның 13нче көнендә Нәзарәттә Пәйгамбәребез Мөхәммәдкә с.г.в. багышланган мөбарәк кичә – театральләштерелгән Мәүлид үткәрелде.

Россия Президенты Владимир Путин бүген Альберт Суяргуловны биш елга Татарстан прокуроры билгеләү турындагы карарны имзалады. Бу документ хокукый мәгълүматның рәсми порталында чыкты.

Россия Хөкүмәте Дәүләт Думасына 2024 елдан хезмәт хакының минималь күләмен 19242 сум итү турындагы закон проектын кертте. Документ Думаның электрон базасында чыкты. Бу хакта РИА Новости хәбәр итә.

Татарстан Рәисе Рөстәм Миңнеханов Һиндстанның Россиядәге Гадәттән тыш һәм Тулы вәкаләтле илчесе Паван Капур белән очрашты. Ул Казанга Әфганстан буенча консультацияләрнең Мәскәү форматы утырышында катнашу өчен килде. Татарстан җитәкчесе матбугат хезмәтендә шул хакта хәбәр иттеләр.

Бүген Казан кешеләре Авиатөзелеш районындагы янгынны видеога төшергән. Видеоязмалар Телеграм-каналларда чыкты.

Уфада тимераякта фигуралы шуу буенча, шул исәптән юниорлар арасында да, бөтенроссия ярышлары узачак. Турнирны ачу тантанасы Спорт сараенда 11 октябрь — Башкортстан Республикасы көнендә узачак. Бу хакта «Башинформ» яза.

Татарстан сәламәтлек саклау министры Марсель Миңнуллин «Академик В.И. Шумаков» медале белән бүләкләнде. Бу хакта «Татар-информ»га Республика Сәламәтлек саклау министрлыгының матбугат хезмәте хәбәр итте.

Казаннан Дубайга яңа авиарейслар ачарга планлаштыралар. Очышлар программасы кышкы яллар һәм яңа ел каникуллары чорына төзелгән: 2023 елның 21 нче декабреннән 2024 елның 31 нче гыйнварына кадәр, дип хәбәр итә Казан аэропортының матбугат хезмәте.

Татарстан Рәисе Рөстәм Миңнеханов Төркиянең Россиядәге Гадәттән тыш һәм Тулы вәкаләтле илчесе Мәхмәт Самсар белән очрашты. Миссиясе тәмамлануга бәйле рәвештә, дипломат илдән китә. Бу хакта Татарстан Рәисенең матбугат хезмәтендә хәбәр итәләр.

4 октябрьдә Татарстан Республикасында халыкка хәбәр итү системасын тикшерәчәкләр. Бу хактаРоссия Гадәттән тыш хәлләр министрлыгының Татарстан буенча баш идарәсендә хәбәр итәләр.