Новости за 08.09.2023

Бүген хакимияттә Азнакай район һәм шәһәр ветераннар советы президиумы утырышы узды. Аның эшендә муниципаль район башлыгы Марсель Шәйдуллин, Әлмәт районы ветраннар советы рәисе Владимир Яшанин, башлангыч ветераннар оешмалары рәисләре катнашты. Бу хакта «Азнакай» сайтында хәбәр ителә.

«Халыклар дуслыгы кубогы» Петрозаводск шәһәрендә 30дан артык милләт футболчыларын җыйды. Бу турыда Бөтендөнья татар конгрессы хәбәр итте.

26 сентябрьдә Самара драма театрында Әлмәт татар дәүләт театры Гаяз Исхакый әсәре буенча «Ул әле өйләнмәгән иде» спектаклен күрсәтәчәк. Бу хакта Самара өлкәсенең «Бердәмлек» газетасы ВКонтакте социаль челтәрендәге сәхифәсендә яза.

Бүген Казанның «Ак Барс» хоккейчылары Пекинның «Куньлунь Ред Стар» командасын җиңде. Уен исәбе – 5:1. Матч Казанның «Татнефть Арена» боз сараенда узды.

Татарстан Диния нәзарәте намаз укырга һәм Ислам дине нигезләренә өйрәтүче «Ислам. Беренче адымнар»ның 12 нче сезонына тыңлаучылар җыя башлады. Укулар 14 октябрьдә башлана.

Кытай Халык Республикасы Рәисе Си Цзиньпин Казанга 2024 елда килергә мөмкин. Аны БРИКС илләре лидерлары форумында көтәләр. Бу хакта Татарстан Республикасы Рәисе Рөстәм Миңнеханов «РОСТКИ» форумының пленар утырышында хәбәр итте.

Түбән Камада «НТР» редакциясе бинасында журналист Александр Комаров хөрмәтенә мемориаль такта ачылды. Ул махсус хәрби операция зонасында һәлак булды. Бу хакта муниципалитет хакимиятенең телеграм-каналында хәбәр ителә.

Татарстан Республикасы Рәисе Рөстәм Миңнеханов югослав һәм серб кинорежиссеры, кино актеры Эмир Кустурица һәм «Ленфильм» киностудиясе Директорлар советы рәисе, продюсер, режиссер һәм актер Федор Бондарчук белән очрашты. Очрашу ТР Хөкүмәте Йортында узды. Бу турыда Татарстан җитәкчесенең матбугат хезмәте хәбәр итте.

Республиканың финанс органнарында профессионалларның берләшкән командасы эшли. Бу хакта Татарстан Республикасы Рәисе Рөстәм Миңнеханов Финансчылар көненә багышланган тантаналы чарада белдерде. Тантана Салих Сәйдәш исемендәге Зур концерт залында узды. Бу турыда Татарстан җитәкчесенең матбугат хезмәте хәбәр итте.

Мәскәүнең «Умарта» Татар теле үзәгендә яңа уку елы башлана. Бу хакта Татарстанның Россиядәге Тулы вәкаләтле вәкиллеге телеграм-каналында хәбәр ителә.

Татарстан белән Кытай арасындагы элемтәләр барлык юнәлешләрдә дә киңәячәк. Хезмәттәшлекне үстерү масштабы да зур булачак. Татарстан Республикасы Рәисе Рөстәм Миңнеханов Казанда узган «РОСТКИ» форумы кырында шулай дип белдерде.

Төмән өлкәсенең «Яңарыш» газетасында Вагай районының Казанлы авылында яшәүче Татарстан Республикасының атказанган укытучысы Асия Зимагулованың «Меткәдә яңа мәктәп ачылды» дигән язмасы чыкты.

«РОСТКИ» халыкара форумы кырында очрашулар яңа инвестиция проектларын гамәлгә ашыру өчен башлангыч нокта булып хезмәт итәчәк. Бу хакта Татарстан Рәисе Рөстәм Миңнеханов Россия-Кытай форумының пленар утырышында белдерде.

Татарстанның Республика клиник хастаханәсендә 70 яшьлек хатын-кызга кабат бөер трансплантациясе ясаганнар. Ханым Балык Бистәсе районында яши. Бүгенге көндә ул Татарстанда орган күчереп утыртылган иң өлкән пациент. Бу хакта «Татар-информ»га Республика клиник хастаханәсенең матбугат хезмәте хәбәр итте.

Россия-Кытай мөнәсәбәтләре бүгенге заманда ике зур дәүләтнең хезмәттәшлек эталоны булып тора. Бу хакта Россия тышкы эшләр министры Сергей Лавров Казанда «РОСТКИ» халыкара форумның пленар утырышында белдерде.

РФ икътисади үсеш министры Максим Решетников, Татарстан Рәисе Рөстәм Миңнеханов белән бергә, «КАМАЗ» заводында булды. Визит кысаларында аларны «КАМАЗ» ГАҖ генераль директоры Сергей Когогин озатып йөрде. Бу турыда Татарстан җитәкчесенең матбугат хезмәте хәбәр итте.

Актер, кинорежиссер һәм продюсер Федор Бондарчук бүген Казанда «Ак Барс» хоккей клубының баш тренеры Зиннәтулла Билалетдинов белән очрашты.

Бүген Татарстан Рәисе Рөстәм Миңнеханов һәм Россия Икътисади үсеш министрлыгы башлыгы Максим Решетников «Алабуга» махсус икътисади зонасында булдылар. Кунаклар өчен зона территориясендә ачылган производстволар буенча экскурсия үткәрделәр, монда тормышка ашырылучы яңа проектлар турында сөйләделәр. Бу хакта Татарстан җитәкчесе матбугат хезмәте хәбәр итә.

Татарстан өчен Кытай белән хезмәттәшлек өстенлекле характерда. Бу хакта Татарстан Республикасы Дәүләт Советы Рәисе Фәрит Мөхәммәтшин белдерде. Ул бу турыда Казанда «РОСТКИ» Россия-Кытай халыкара форумында, «Сәяси партияләрнең үзара хезмәттәшлеге — халыкара мөнәсәбәтләрнең мөһим өлеше» темасына түгәрәк өстәлендә әйтте.

Татарстанда 2024 елга балалар бакчасы өчен түләүнең максималь күләме расланган. Татарстан Хөкүмәтенең әлеге карары Республика хокукый мәгълүмат рәсми порталында дөнья күрде.

Иртәгә, 9 сентябрьдә, Татарстанда урыны белән көчле, давыллы җил көтелә. Бу хакта Татарстан Гидрометеорология үзәге кисәтә.

Татарстанда алдагы өч елга айлык акчалата һәм башка төр түләүләр күләме расланган. 2024-2026 елларда аларның индексация коэффициенты ел саен 1,04 тәшкил итәчәк, бу республика Хөкүмәте карарында чагыла.

Новокузнецк шәһәрендә «Безнен йорт» татар халык көнкүреше музеенда Ачык ишекләр көне үткәрелде. Анда татар халык мәдәниятенең үзенчәлеген ача торган экспозиция күрсәтелде. Бу хакта Бөтендөнья татар конгрессының матбугат хезмәте хәбәр итә.

«Мәдәни җомга» газетасы журналисты, Татарстанның атказанган мәдәният хезмәткәре Сөембикә Кашапова фикеренчә, татар матбугатында җиңелчә темалар кешегә файда бирми.

ТР мөселманнары Диния нәзарәтенең «Зәкят» хәйрия фонды Курган өлкәсенең Шадрин районы Йолдыз авылын төзекләндерү һәм торгызу өчен акчалата ярдәм күрсәтте. Иганә суммасы 1 400 000 (бер миллион дүрт йөз мең сум) тәшкил итә.