Новости за 29.04.2023

Апаста «Алтын алка» боз сараенда 2008-2009 елгы яшүсмерләр арасында патриотик ярышлар узды. Ул махсус хәрби операциядә һәлак булган батыр райондашлар истәлегенә оештырылды. Ярышта Буа, Апас һәм Ульян каласыннан командалар катнаша. Төбәкара ярышның иганәчесе - «Апас-мол» берләшмәсе җитәкчесе Марат Хәсәнов.

Чирмешән районы ветераннарына Татарстан Рәисе Рөстәм Миннеханов исеменнән бүләкләр өләштеләр. Авыл җирлекләре башлыклары, мәктәп укучылары һәм мәдәният хезмәткәрләре белән берлектә өйләренә барып ветераннарга азык-төлек пакетлары тапшырдылар. Бу хакта «Безнең Чирмешән» хәбәр итә.

Бүген Әнкарада, Габдулла Тукай һәйкәле янында, Тукайның туган көне уңаеннан искә алу өчен Төркиядә яшәүче татарлар җыелышкан. Тукай һәйкәленә чәчәкләр салганнар. Шагыйрь турында сөйләшүдән соң аның шигырьләре укыдылар, дип хәбәр итте Төркиядә яшәүче Ләвәнт Булут.

 Махсус хәрби операция зонасында 430нчы полкта хезмәт итүче Алабуга хәрбиләре ветераннарны Җиңү көне белән котлап видео яздырган. Бу хакта «Алабуга нуры» хәбәр итә.

«Ак Барс» һәм ЦСКА командалары Гагарин кубогын җиңү саны буенча тигезләште.

Җиңү көне алдыннан Чүпрәле районында «Хәтер бакчасы» акциясе узды. Иске Чүпрәле авылының Мәктәп урамында 500 яшь чыршы һәм миләш утыртылды.

Татарстанда 1,4 млн квадрат метр торак файдалануга тапшырылган, республикада торак төзелеше буенча еллык план 45 процентка үтәлгән, дип хәбәр итте Татарстан Республикасы төзелеш, архитектура һәм торак-коммуналь хуҗалык министрлыгы башлыгы Марат Айзатуллин.

Хезмәт кадрлары кытлыгы проблемасын хәл итү максатыннан укучыларга 16 яшьтән эшләргә рөхсәт итәргә кирәк, дип белдерде «һөнәри компетенцияләрне үстерү үзәге» коммерцияле булмаган автономияле оешмасы генераль директоры Эмиль Гобәйдуллин. Шулай ук ул, яшь белгечләр республика предприятиеләрендә эшчеләр кытлыгын тулыландырсын өчен, махсус урта уку йортларын тәмамланганнан соң мәҗбүри эшне кире кайтарырга чакырды.

Севастопольдә нефть базасына пилотсыз аппаратлар (БПЛА) һөҗүм иткәннән соң чыккан янгынны тулысынча сүндереп бетергәннәр. Бу турыда Гадәттән тыш хәлләр министрлыгының биредәге идарәсенә сылтама белән төбәк губернаторы Михаил Развозжаев хәбәр итте.

Татарстан башкаласында май бәйрәмнәрендә һаваның уртача тәүлеклек температурасы климат нормасына якынлашачак. Ләкин салкын һава торышы кыска вакытлы була. Бу хакта «Татар-информ»га Казан федераль университеты профессоры, география фәннәре докторы Юрий Переведенцев хәбәр итте.

Дубайда 17 гарәп иленнән - Берләшкән Гарәп Әмирлекләре, Согуд Гарәбстаны, Оман, Иордания, Йемен, Катар, Мисыр, Тунис, Ирак, Иран, Сирия, Бахрейн, Кувейт, Ливия, Ливан, Израиль, Мароккода яшәүче татар активистлары җыелды.

28 апрельдә Татарстан Диния нәзарәте һәм «Мөхәммәдия» мәдрәсәсе хезмәткәрләре Казанның Яңа бистә зиратында өмә ясады.

Россия һәм Төркия туристлар өчен уртак түләү системасын эшләүгә кереште. Бу хакта Төркия лидеры Рәҗәп Тайип Эрдоган хакимиятендәге чыганакларга сылтама белән Hurriyet газетасы яза.

Уфа «Нур» театрының Казан гастрольләре Мирхәйдәр Фәйзинең «Галиябану» спектакле белән төгәлләнде.

Татарстанда җылы көннәр дәвам итәчәк, ә яңа атна 30 градуслы һава температурасыннан башлана, дип хәбәр итә ТР Гидрометеорология үзәге. Шул ук вакытта республикада көчле җилләр сакланачак, дип искәртә синоптиклар.

68 яшендә актер һәм телевидение алып баручысы, Россиянең атказанган артисты Сергей Колесников вафат. Бу хакта аның хатыны, актриса Мария Великановага сылтама белән РИА Новости хәбәр итә.

Бүген Казанда һәм Мәскәүдә «Киләчәк уеннары» башланырга 300 көн кала стелалар ачылды. Тантанада РФ вице-премьеры Дмитрий Чернышенко һәм Татарстан Рәисе Рөстәм Миңнеханов катнашты.

Кызамык һәм паротитка каршы прививка балачакта ясала, әгәр аны ясамаган булсалар, хәзер ясату мөһим. Бу хакта «Татар-информ»да узган матбугат конференциясендә баш эпидемиолог һәм Татарстан Сәламәтлек саклау министрлыгының иммунопрофилактика буенча белгече Дмитрий Лопушов сөйләде.

Казанда һәм республиканың кайбер районнарында чүп-чарны вакытында чыгармау белән проблема бар, бу темага халыктан күп шикаятьләр һәм мөрәҗәгатьләр килә. Татарстан Рәисе Рөстәм Миңнеханов ТР Министрлар Кабинетында узган киңәшмәдә шикаятьләргә мөмкин кадәр тизрәк җавап биреп, мәсьәләне хәл итәргә чакырды.

2024 елда Казанда узачак Беренче халыкара мультиспорт «Киләчәк уеннары» – бу әлегә беркем дә, беркайда да һәм беркайчан да үткәрмәгән уникаль ярышлар, дип белдерде Президент Владимир Путин.

Татар язучылары Казанның Яңа Татар бистәсе зиратында хәтер өмәсе ясаган. «Татарстан язучылар берлеге әгъзалары һәм хезмәткәрләре күренекле әдипләрнең каберләрен чистартты», дип хәбәр итә Берлекнең матбугат үзәге.

«Мәйдан» журналы редакциясе Татарстан Язучылар берлегенең Чаллы бүлеге белән берлектә «Ил мәйданы» дип аталган әдәби очерклар конкурсы игълан итә.

Казанның Советлар Союзы Герое И.Кабушкин исемендәге «Метроэлектротранс» предприятиесе трамвай йөртүчесе Екатерина Соболевага «Татарстан Республикасының атказанган транспорт хезмәткәре» дигән мактаулы исем бирелде. Тиешле указны ТР Рәисе Рөстәм Миңнеханов имзалады.

Серго Орджоникидзе исемендәге Россия дәүләт геология-разведка университетында «Мәскәү һылыуҡайы – 2023» матурлык конкурсы узды. Башкала югары уку йортларының иң матур һәм талантлы ун студенты беренче гүзәл зат титулы һәм таҗ өчен көрәштеләр, дип хәбәр итә «Башинформ».

2023 елгы яңа туристлык сезонында Казаннан «Бөек Идел юлы» бренды белән Идел буйлап күп санлы круизлар башлана. Моннан тыш, Татарстаннан Алтай Республикасына турыдан-туры даими авиарейслар булачак. Яңа юнәлешләр «Туризм һәм кунакчыллык индустриясе» илкүләм проектын гамәлгә ашыру нәтиҗәсендә үсеш ала.