Новости за 19.04.2023

Яшел Үзәннең Васильево пыяла заводы 172 млн сумга сатылды. Сатуларны «Россия аукцион йорты» АҖ оештырды. Заводны шәхси инвестор сатып алганлыгы билгеле.

Иртәгә, 20 апрельдә, Татарстанда элек урнашкан җылы һава торышы сакланачак, температура фоны үзгәрмәячәк диярлек. Бу хакта ТР Гидрометүзәге хәбәр итә.

Бүген Казан хоккейчылары «Ак Барс» - ЦСКА плей-офф сериясенең икенче уенында оттырды. Матч исәбе – 0:3.

Казанда «Дөньяда сүзебез бар» дип исемләнгән Хатыйп Миңнегулов исемендәге IV Бөтенроссия фәнни-гамәли конференциясе узды.

Рөстәм Миңнеханов Ураза бәйрәме алдыннан Мәскәүнең «Рамазан чатыры»нда оештырылган ифтарда катнашты. Чатыр, традиция буенча, Тәүбә тавындагы Мемориаль мәчет янында оештырылган.

Коронавирусның Россиядә ачыкланган «Арктур» варианты - ул инде билгеле булган «Омикрон»ның күп санлы генетик вариантларының берсе. Бу хакта «Российская газета»га Медицина фәннәре докторы, Роспотребнадзорның Г.Н. Габричевский исемендәге тикшеренү институтының клиник эшләр буенча директор урынбасары Татьяна Руженцова сөйләде.

Әдәбият галиме, тәнкыйтьче, профессор Тәлгат Галиуллин «Дөньяда сүзебез бар» дип исемләнгән Хатыйп Миңнегулов исемендәге IV Бөтенроссия фәнни-гамәли конференциядә Хатыйп Миңнегуловны укытканы турында хатирәләрен сөйләде.

21 апрель – Ураза бәйрәме көнендә Мәскәүнең Җәмигъ, Тарихи һәм Мемориаль мәчетләрендә гает намазы иртәнге 7:00 сәгатьтә башлана. Мәскәү Хөкүмәте ярдәме белән башкаланың Көньяк-Көнчыгыш административ округындагы Печатники районында бу көнне бәйрәм намазы өчен өстәмә мәйданчык эшләячәк, дип хәбәр ителә Россия Мөфтиләр шурасы сайтында.

Молдова хакимияте Татарстан Рәисе Рөстәм Миңнехановны илгә кертүдән баш тартканнан соң Кишиневтагы Россия Илчелеге хезмәткәрләренең берсен чыгару турында игълан итте. Бу хакта РИА Новости Молдованың Тышкы эшләр министрлыгына сылтама белән хәбәр итә.

Габдулла Тукайның тууына 137 ел тулуга багышланган «Тукай иле» III иҗади бәйгедә җиңүчеләр билгеләнде.

Бүген Татарстан Рәисе Рөстәм Миңнеханов Мамадыш районына эш сәфәре барышында язгы кыр эшләре темплары белән танышты. ТР вице-премьеры – Авыл хуҗалыгы һәм азык-төлек министры Марат Җаббаров озатуында ул район кырларын әйләнеп чыкты, авыл хуҗалыгы производстволарын карады һәм фермерлар белән аралашты.

Кичә Самарада узган алтынчы кассация суды Милли юристлар ассоциациясенең «Сахих әл Бухари» җыентыгын тәрҗемә итүне тыю турындагы шикаятен канәгатьләндерде. Россия Мөфтиләр шурасы һәм Чечня башлыгы Рамзан Кадыйровның мәнфәгатьләрен ышаныч кәгазе буенча яклаган адвокат Руслан Нагиев,«Миллиард.Татар» басмасына биргән интервьюсында бу мәсьәләне хәл итүгә җәмәгать резонансы ярдәм итте, дигән фикерен белдерә.

Бүген Дәүләт Думасы ирекле пенсия тупланмалары буенча гарантияле компенсациянең чик күләмен ике тапкыр арттыру турында закон кабул итте. Шулай итеп, аның суммасы 1,4 млн сумнан 2,8 млн сумга кадәр арта. Дәүләтнеке булмаган пенсия фондларында катнашучыларның хокукларын гарантияләү турындагы законга үзгәрешләр кертелә.

Рөстәм Миңнеханов «Рамазан чатыры»нда ифтарда була, аны ел саен Мәскәүдә мөселманнар өчен изге айда оештыралар. Республика җитәкчесе Мәскәүдә оештырылган Татарстан көнендә булачак, дип хәбәр итте матбугат конференциясендә Россия Мөфтиләр шурасы рәисенең беренче урынбасары Рушан хәзрәт Аббясов.

Татарстанның танылган журналисты Кирилл Шлыков «Вечерняя Казань» газетасының яңа баш мөхәррире булды.

Рөстәм Миңнеханов Түбән Кама һәм Чаллы шәһәрләрен урап узу участогында Мәскәү – Владимир – Түбән Новгород – Казан – Уфа М7 «Волга» автомобиль юлы төзелеше барышын карады. Ул Чулман аша күпердә тукталды, анда хәзер төзүчеләр күпер терәкләрен төзиләр.

Бөтендөнья татар конгрессы 8 март – Халыкара хатын-кызлар көне уңаеннан гүзәл затлар арасында «Оста куллар-2023» конкурсы игълан иткән иде. Җиңүчеләрен бүләкләү тантанасы 27 апрель көнне 13.00 сәгатьтә Казанда уза. Бу турыда конгрессның матбугат хезмәте хәбәр итте.

Казанның Фестиваль бульварында, «Татмедиа» бинасы янында, «Чаян» («Скорпион») сатира һәм юмор журналының йөз еллыгына багышланган «Еллар аша көлү» карикатуралар күргәзмәсе ачылды. Алдагы ике айда бульварда йөрүчеләрнең барысы да төрле еллардагы журнал тышлыкларыннан 25ләп карикатураны күрә алачак.

Бүген Татарстан Рәисе Рөстәм Миңнеханов Мамадышта «Азбука сыра» сыр заводында булды. Бу хакта «Татар-информ»га ТР Рәисенең матбугат хезмәте җитәкчесе Лилия Галимова хәбәр итте.

 «Ак калфак» Бөтендөнья татар хатын-кызлары иҗтимагый оешмасы рәисе Кадрия Идрисова сүзләренчә, төбәкләрдә яшәүче татарлар арасында шәхси мәктәп ачарга теләүчеләр бар. 

Татарстан Рәисе Рөстәм Миңнеханов Алабуга районына эш сәфәре барышында муниципалитетның авыл хуҗалыгы өлкәсендәге уңышларын бәяләде. Аграрийлар һәм авыл җирлекләре башлыклары белән очрашу Малореченский бистәсе янындагы «Мир» ҖЧҖ фермасында узды, дип хәбәр итә республика җитәкчесе матбугат хезмәте.

Ислам дөньясы белән хезмәттәшлек һәрвакытта да Татарстанның тышкы икътисади һәм халыкара эшчәнлегенең төп элементларыннан берсе булды һәм агымдагы шартларда аның әһәмияте тагын да артты. Татарстан Рәисе Рөстәм Миңнеханов «Интерфакс» агентлыгына биргән интервьюсында шул хакта хәбәр итте.

Казан шәһәрендәге 11нче татар гимназиясендә Казан федераль университеты профессоры, әдәбият галиме Хатыйп Миңнегуловның музее эшли башлады. Биредә аның шәхси әйберләрен – кулъязмаларын, эш өстәлен, язу машинкасын, шкатулкасын фотоларын, шахмат фигураларын, сәгатен, дипломнарын да күреп була.

Хәрби хезмәткә алдагы язгы чакырылышта «Дәүләт хезмәтләре» порталында электрон повесткаларны сынау режимында җибәрә башларга мөмкиннәр. Шул ук вакытта, аларның традицион алымнар белән күчермәсе дә әзерләнергә тиеш, дип белдерде Дәүләт Думасының саклану комитеты башлыгы Андрей Картаполов. Бу хакта «Коммерсантъ» газетасы яза.

Клячкин хастаханәсендәге Габдулла Тукай вафат булган палата төзекләндереләчәк һәм халык йөри ала торган ачык мәйданчыкка әйләнәчәк, диде «Алдынгылар хәрәкәте» («Движение первых») илкүләм балалар һәм яшүсмерләр хәрәкәте җитәкчесе Тимур Сөләйманов.