Новости за 12.04.2023

10–19 апрельдә Зәйдә Бөек Җиңү көненә багышланган хәйрия марафоны уза. Марафон кысаларында махсус хәрби операциядә катнашучы Зәй егетләренә, Лисичанск шәһәрендә яшәүчеләр өчен гуманитар ярдәм җыела.

Рамазан аенда Казанның кайбер хәләл кафе һәм рестораннары Нәзарәтнең «Рамазан – изге гамәлләр ае» хәйрия марафонына кушылып, мохтаҗлар өчен ифтар җыелмаларын бушлай тарата.

Дәүләт Думасы депутатларының Россиядә мәгариф турындагы законга үзгәрешләр кертү турындагы федераль закон проектын Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты утырышында парламентарийлар хуплады. Документ махсус хәрби операциядә катнашучы гражданнарның балаларын бушлай укыту бүлекләренә күчерүне күздә тота.

Америка Кушма Штатлары Финанс министрлыгы чикләүләр кертелгән юридик һәм физик затларның яңа исемлеген чыгарды. Алар арасында Россия вице-премьеры Марат Хөснуллин да бар, дип хәбәр итә ТАСС.

«Агыйдел» әдәби журналы үзенең гасырлык юбилеена 100 хикәядән торган ике томлык чыгарды. Бу әсәрләрнең барысы да журнал битләрендә төрле елларда басылып чыккан. «Башинформ» шул турыда хәбәр итә.

Казан мэриясе Дубравная урамындагы урман паркы язмышын хәл итә алмый – участок федераль милек исәбендә санала. Бу хакта Татарстан Республикасы башкаласының Башкарма комитеты белдерде. Җир кишәрлеген җирлек җирләренә күчерү һәм аны үз мәнфәгатьләрендә куллану турындагы имеш-мимешләргә карата мэриядә шундый аңлатма бирелде.

Татарстан экология һәм табигать ресурслары министры Александр Шадриков сүзләренчә, Татарстан халкының 94 проценты экологик акцияләрдә катнашырга әзер. Бу хакта ул Татарстан Дәүләт Советында узган утырышта әйтте.

Татарстан Рәисе Рөстәм Миңнеханов Беларусь Республикасының татар иҗтимагый берләшмәләре вәкилләре белән очрашты. Беларусь ягыннан чарада вице-премьер Петр Пархомчик катнашты.

Татарстан авыл хуҗалыгы һәм азык-төлек министрының беренче урынбасары Наил Залаков әйтүенчә, 2023 елның гыйнвар-февраль ае өчен сөт җитештерүчеләргә субсидияләр бирелгән.

Иртәгә, 13 апрельдә, Татарстанда алмашынучан болытлы һава торышы көтелә, явым-төшем ихтималы аз. Көндез урыны белән көчле җил көтелә, аның тизлеге көчәйгәндә секундка 15-17 метрга кадәр җитәргә мөмкин. Татарстанның Гидрометеорология үзәге шул турыда хәбәр итә.

Рөстәм Миңнеханов ике көнлек эш сәфәре белән Беларусьта. Бу хакта республика җитәкчесенең матбугат хезмәте хәбәр итә.

Татарстан Республикасының экология һәм табигать ресурслары министры Александр Шадриков сүзләренчә, быел халыктан Самосырово полигонына бәйле бер шикаять тә килмәгән.

2022-2023 уку елында мәгариф учреждениеләре төзелеше дәвам итә. ТР мәгариф һәм фән министры Илсур Һадиуллин сүзләренчә, уку елы азагына унбер мәктәп тапшырылачак. Ул бу хакта ТР Дәүләт Советының Мәгариф, мәдәният, фән һәм милли мәсьәләләр комитеты каршындагы Эксперт советының мәгариф, мәдәният, фән һәм милли мәсьәләләр буенча уртак утырышында әйтте. 

Уфада «Китап-бәйрәм» дигән халыкара китап ярминкәсе кысаларында китап нәшриятлары бәйгесе уза. Башкортстан Республикасының матбугат һәм массакүләм матбугат чаралары агентлыгы БР Мәдәният министрлыгы белән берлектә «Урал-батыр җирендә Ел китабы» төбәкара конкурсы турында нигезләмә әзерләде. Җиңүчеләр 26 майда «Китап-бәйрәм» дигән халыкара китап ярминкәсендә игълан ителәчәк.

8 апрельдә Пенза өлкәсе Татар милли-мәдәни автономиясе инициативасы белән Пенза өлкәсенең Белинский районы Кутеевка авылы төп гомуми белем бирү мәктәбенә – татар телен өйрәнү өчен китаплар, ә Кутеевка авыл советы Китапханә-ял итү үзәгенә хәзерге заман татар язучыларының әсәрләрен тапшырдылар. Бу хакта Бөтендөнья татар конгрессының матбугат хезмәте хәбәр итә.

Республика мәктәпләренә берничә фән укытучылары җитми. Бу хакта ТР Дәүләт Советының мәгариф, мәдәният, фән һәм милли мәсьәләләр комитеты каршындагы Эксперт советының мәгариф, мәдәният, фән һәм милли мәсьәләләр буенча уртак утырышында ТР мәгариф һәм фән министры Илсур Һадиуллин әйтте.

Бүген Татарстан һәм Беларусь Республикасы хезмәттәшлек турында берничә килешү төзеде. Документлар Татарстан Республикасы делегациясенең Минск шәһәренә эш сәфәре кысаларында имзаланды, дип хәбәр итә республиканың Сәнәгать һәм сәүдә министрлыгы матбугат хезмәте.

Мордовия Республикасы мөселманнары Диния нәзарәте мөфтие Раил хәзрәт Асаинов Саранскидагы 2нче шәһәр бала табу йортының 1нче хатын-кызлар консультациясендә булды һәм «Исәнме, әни» проекты кысаларында акушер-гинеколог бүлмәләрен ремонтлау һәм җиһазландыру эшләренең барышы белән танышты. Бу хакта Россия Мөфтиләр шурасының матбугат хезмәте хәбәр итә.

Бүген Татарстан Республикасы Рәисе Рөстәм Миңнеханов Казанда П.И.Чайковский исемендәге 1 нче номерлы балалар музыка мәктәбендә булды. Татарстан Республикасы башкаласы мэры Илсур Метшин белән бергә ул концерт залын һәм кече залны карады, шулай ук уку йортының музеенда булды. Татарстан Республикасы җитәкчесенең матбугат хезмәте шул турыда хәбәр итә.

Татарстанның халык, Россиянең атказанган артисты Салават Фәтхетдинов җырчы Әлфия Авзалова белән Илһам Шакировның рейтингы бүген иң түбән дәрәҗәдә тора, дип саный. Бу фикерен ул Әлфия Авзалова исемендәге III Халыкара фестиваль-конкурска багышланган матбугат конференциясендә әйтте.

Казахстан Президенты Касым-Жомарт Токаев фәнни җәмәгатьчелеккә казах теле алфавитын латин графикасына күчерү мәсьәләсен төрле яклап өйрәнергә кушты. «РИА Новости» шулай дип яза.

Узган тәүлектә Татарстанда коронавирус инфекциясенең 49 яңа очрагы теркәлгән. 13 пациент хастаханәгә озатылган. Бу хакта стопкоронавирус.рф порталы хәбәр итә.

Омск шәһәре үзәгендә — Иртыш елгасы буенда 8 апрель көнне «Боз озату» бәйрәме уздырганнар. Татар халкының боз озату йоласын бәйрәм буларак үткәрү тәкъдиме белән Омск өлкәсенең «АЮ» татар яшьләре берлеге» иҗтимагый оешмасы чыккан.

Минскиның 407нче гражданнар авиациясе заводы Ту-214 самолеты өчен комплектлау җиһазлары җитештерә башларга ниятли. Белоруссия предприятиесе «юл картасын» Горбунов исемендәге Казан авиация заводында имзалаячак. Бу хакта Белоруссиянең Казандагы илчелеге бүлек җитәкчесе Виктор Щетькога сылтама белән «БелТА» агентлыгы хәбәр итә.

17 апрельдән 10 майга кадәр Татарстан территориясендә чүп-чар, корыган үлән яндыру, ачык утта, аерым алганда, учакта һәм мангалда ризык әзерләү тыела. Бу вакытта республикада янгынга каршы махсус режим үз көченә керә.