Новости за 05.04.2023

Иртәгә Россия ислам институтында 11 яшьтән 19 яшькә кадәрге мәктәп укучылары һәм урта махсус уку йортлары студентлары өчен «Журналист буласым килә – 2023» IV Төбәк (Идел буе) иҗат бәйгесендә җиңүчеләрне бүләкләү тантанасы узачак.

Камал театрында тамашачы легендар артист Равил Шәрәфиевны аягүрә басып каршылады һәм озак алкышлады. 

Үз теләге белән хәрби хезмәттә булган «Алга» батальоны вәкиле Урал Мәхмүдовның күп балалы гаиләсенә «Юл хәрәкәте иминлеге» дәүләт бюджет учреждениесе һәм ЮХИДИ вәкилләре «Бала – баш пассажир» акциясе кысаларында автолюлька тапшырды. Хәрби хезмәткәргә юлда имин йөртү җайланмасын Россия Эчке эшләр министрлыгының Менделеевск районы буенча бүлегенең ЮХИДИ идарәсе җитәкчесе вазифаларын вакытлыча башкаручы, полиция капитаны Алмаз Сафин тапшырды.

Дәүләт Советы Рәисе Фәрит Мөхәммәтшин Түбән Новгород өлкәсе делегациясе белән очрашты. Делегация Закон чыгару Җыелышы рәисе урынбасары Денис Бакиев җитәкчелегендә килде. Яклар ике төбәк арасындагы элемтәләрне үстерү турында фикер алышты.

Бүген «Ак Барс» - «Авангард» плей-офф сериясенең өченче уенында Казан командасы җиңде. Матч исәбе – 2:3.

Казанда хатын-кызга чүкеч белән һөҗүм итеп, аны үтергән 54 яшьлек ир-атка карата ачылган җинаять эше судка җибәрелгән. Татарстан Республикасы прокурорының өлкән ярдәмчесе Руслан Галиев шул турыда хәбәр итте.

Иртәгә, 6 апрельдә, Татарстан территориясендә күк йөзе алмашынучан болытлы булачак, явым-төшем яву ихтималы аз. Төнлә һәм иртән республикада томан төшәчәк. Татарстанның Гидрометеорология үзәге шул турыда хәбәр итә.

2 апрельдә билбау көрәше буенча Төмән өлкәсе чемпионаты һәм Беренчелеге узды. Анда Төмән өлкәсеннән, Төмән шәһәреннән, Тобольск һәм Ялуторовск шәһәрләреннән 250дән артык көрәшче катнашты. Бөтендөнья татар конгрессы шул турыда яза.

Дәүләт Думасы депутатлары табигый яки техноген характердагы гадәттән тыш хәл (ЧС) аркасында зыян күргән гражданнарга ипотека каникулы алу хокукы бирү турында закон кабул итте. Канун соңгы - өченче укылышта кабул ителде. ТАСС шул турыда хәбәр итә.

Бөтендөнья татар конгрессы башкарма комитеты җитәкчесе Данис Шакиров мәгърифәтче Бубиларның эшен дәвам итеп, бүгенге көн шәхесләрен тәрбияләргә кирәклеген әйтте.

Музейда кырпы балыгы, зубр, ак барс, ябалак һ.б. сирәк очрый торган җәнлекләрдән торган күргәзмә ачылды.

Татарстанда 2030 елга кадәр республиканы фәнни-техник яктан үстерү буенча дәүләт программасы расланды. Аны гамәлгә ашыруга 7,6 миллиард сум, шул исәптән республика бюджетыннан 7 миллиард сумнан артык акча юнәлдерү планлаштырыла. Татарстан Республикасы премьер-министры Алексей Песошин имзалаган карар шул турыда.

Татарстанда Идел елгасында транспорт хәрәкәте 22 апрельдә, Камада 25 апрельдә башлана. Бу хакта «Татар-информ»да узган матбугат конференциясендә Татарстан Республикасының кече үлчәмле суднолар буенча баш дәүләт инспекторы Юрий Венедиктов хәбәр итте.

Бүген Роберт Миңнуллинның «Мәхәббәтле көзләрем» дип исемләнгән яңа китабын тәкъдим итү кичәсе булды. Чара «Китап club» ресторанында узды.

Әлмәтнең көньяк-көнбатышында, Объездная урамы буйлап, АСПЭК-Домстрой компаниясе 28 гектар мәйдандагы территорияне комплекслы үстерү буенча масштаблы проектны гамәлгә ашыра башлый, ул үз эченә торак һәм коммерцияле күчемсез милекне, социаль объектларны һәм иҗтимагый киңлекне алачак.

Нәзарәтнең «Хозур» нәшрият йорты «Ислам дине нигезләре» китабын рус телендә нәшер итте. «Ислам дине нигезләре» динне өйрәнүдәге төп бүлекләрне үз эченә алган. Алар гакыйдә, фикһ, сира, татарларда Ислам дине тарихы фәннәрен колачлый.

Татарстаннан мобилизацияләнгән хәрби хезмәткәрләр якташларына видео мөрәҗәгать яздырган. Берничә хәрби алгы сызыкта аларның көнкүреше ничек оештырылганлыгын күрсәтә.

Казанда татар телен өйрәнүгә һәм татар мәдәниятен үстерүгә багышланган «Үз телем» бәйгесе башланып китте. Бәйгенең оештыручысы Казан шәһәре Башкарма комитеты катнашучыларга телне өйрәнүнең ияләнгән формаларыннан читләшеп, үзенчәлекле яңа форматлар тәкъдим итәргә өнди. Конкурсантлардан телне өйрәнүнең нәтиҗәле, стандарт булмаган, кызыклы, шул ук вакытта яшьләр өстенлек бирә алырлык проектлар көтеп калалар. Бу хакта Бөтендөнья татар конгрессы матбугат хезмәте хәбәр итә.

Парламентның түбән палатасы депутатлары Дәүләт Думасына май аенда озын яллар турында закон проекты кертте. Россиядә яшәүчеләр ел саен 1-9 май көннәрендә ял итәчәк. Шул ук вакытта Яңа ел бәйрәме атнасын 4 көнгә кыскартырга тәкъдим ителә, дип сөйләде Дәүләт Думасы вице-спикеры Владислав Даванков.

Узган ел Татарстанда тулаем төбәк продуктының энергия сыйдырышлылыгы 1,6 процентка кимегән, дип хәбәр итте республиканың сәнәгать һәм сәүдә министры Олег Коробченко. Республикадагы энергия нәтиҗәлелеге программаларын гамәлгә ашыруның барышына багышланган ТР Хөкүмәте утырышында ул шундый мәгълүматлар китерде.

Инде икенче көн рәттән Казан яңа температура рекордлары куя. Бу юлы 2020 елгы максималь рекорд куелды – ул көнне 5 апрельдә температура +16 градуска җиткән. Бу хакта ТР Гидрометеорология һәм әйләнә-тирә мохитне күзәтү идарәсенең матбугат хезмәте хәбәр итә.

Бүген Россия Президенты Владимир Путин илнең тышкы сәясәтенә багышланган күләмле чыгыш белән мөрәҗәгать итәргә ниятли. Путин чит ил илчеләренә ышаныч грамоталары тапшыру тантанасы кысаларында чыгыш ясаячак, ул бүген Кремльдә уза. Россия лидерының матбугат секретаре Дмитрий Песков шулай дип белдерде. Бу хакта ТАСС агентлыгы хәбәр итә.

Әфганстан сәнәгать һәм сәүдә министры Нуриддин Азизи һәм эшкуарлар консорциумында катнашучылар видеоконференциясендә Әфганстандагы инфраструктура проектлары хакында фикер алыштылар. Чарада Пакистан, Иран һәм Россиянең бизнес-бергәлекләре һәм профиль министрлыклары вәкилләре катнашты. Россияне Татарстанның «КЭР-холдинг» энергетика компаниясе һәм Россия мөселманнары Хәйрия патриотик фондының Казан бүлеге тәкъдим итте.

Туфан Имаметдинов Кәрим Тинчуринның «Җилкәнсезләр» комедиясен чыгарачак. Премьера май азагына планлаштырыла.

Татарстан Рәисе Рөстәм Миңнеханов (ул бүген эш сәфәре белән Ашхабадка килде) Төрекмәнстанның Халк Мәсләхәте рәисе Гурбангулы Бердымөхәммәдов белән очрашты. Яклар нефть эзләү, газ транспортлау, химия продукциясе һәм энергетика өлкәсендә хезмәттәшлекне киңәйтү өчен республика ясарга тиешле адымнар хакында фикер алышты. Бу хакта ТР Рәисенең матбугат хезмәте җитәкчесе Лилия Галимова хәбәр итте.