Новости за 14.06.2022

Арча район балалар китапханәсе Татарстан Республикасы инвалидлар җәмгыятенең Арча район оешмасы белән берлектә грант отты. Бу турыда район басмасы хәбәр итте.

Буа Сабантуенда яшьләр арасында баш батыр булып Ислам Сәетморатов калды. Буа мәдрәсәсенең икенче курс шәкерте бу уңышка инде икенче тапкыр иреште. Бу турыда Татарстан Диния нәзарәте хәбәр итте.

Кариев театры Идел буе Болгар дәүләтендә Ислам дине кабул ителүнең 1100 еллыгы уңаеннан «Йосыф» спектаклен чыгарды.

Иртәгә, 15 июньдә, Татарстанда җылы, әмма тотрыксыз һава торышы көтелә. Бу хакта Татарстанның Гидрометеорология үзәге хәбәр итә.

Россия Хөкүмәте авыл җирендә торак төзү яки сатып алу өчен бирелә торган ташламалы 3 процентлы ипотека ставкаларын субсидияләүгә өстәмә рәвештә 7 миллиард сум бүлеп бирде. Бу хакта РФ Премьер-министры Михаил Мишустин әйткән.  Министрлар Кабинетының Telegram-каналында шул хакта хәбәр ителә.

2 июльдә Баулы районына удмурт халкының «Гырон Быдтон» дип аталган милли бәйрәменә «Бурановские бабушки» ансамбле киләчәк.

Татарстан Республикасының халык артисты Миләүшә Таминдарова җитәкчелегендәге Татарстан Республикасы Дәүләт камера хоры «Хорлар көрәше» Бөтенроссия конкурсында 1 урынны яулады.

23 июнь көнне Мәҗит Гафури исемендәге Башкорт академия драма театрында Фәтхи Борнаш пьесасы буенча куелган «Яшь йөрәкләр» спектакленең премьерасы була. «Башинформ» шул турыда яза.

Иркутск өлкәсе мөфтие Фәрит хәзрәт Мингалиев Иркутск шәһәре имамы Фазыл хәзрәт белән очрашты. Россия мөселманнары Дини җыенының Үзәкләштерелгән дини оешмасы шул турыда хәбәр итә.

Исерек хәлдә машина йөрткән өчен җаваплылык турында закон проектын Дәүләт Думасы беренче укылышта кабул итте. Анда транспортны конфискацияләү җаваплылыкның бер чарасы буларак карала. РИА Новости шул турыда яза.

Кичке алтылар тирәсендә янгын сүндерүчеләр Казанның Гладилов урамындагы «Созвездие-Йолдызлык» арт-резиденциясендә чыккан зур янгынны сүндерде.

Чирмешән районында тугыз яшьлек малай балык тоткан вакытта Күтәмә елгасында коенып чыгарга уйлаган һәм батып үлгән. Тикшерү комитеты «Саксызлык аркасында үлемгә китерү» маддәсе буенча җинаять эше кузгатты.

Ханты-Манси автономияле округының Мегион шәһәрендә Сабантуй бәйрәме узды. Мәйданга халык гаиләләре белән килде. Бәйрәмдә катнашучыларны һәм кунакларны шәһәр башлыгы Олег Дейнек сәламләде, дип хәбәр итә Бөтендөнья татар конгрессы.

16 июльдә керәшеннәрнең милли бәйрәме «Питрау» Мамадыш районы Җөри авылында егерме дүртенче мәртәбә уздырыла.

Театрлар Сабантуенда быел машинаны уеннарда катнашып иң күп балл җыйган коллектив алачак.

Кичке бишенче яртыда янгын сүндерүчеләр «Созвездие-Йолдызлык» арт-резиденциясендә 500 квадрат метр мәйдандагы янгынны җәелүдән туктатты.

Татарстан мөфтиятенең Казыйлар һәм Голамәләр шуралары тарафыннан 2022 елда Корбан бәйрәмен һәм гает намазын үткәрү тәртипләре расланды. Бу турыда Диния нәзарәте хәбәр итте.

Узган ял көннәрендә район Сабантуйларында ярышларда катнашкан вакытта сөяге сынган ике кешене Татарстанның Республика клиник хастаханәсенә китергәннәр. Бу хакта «Татар-информ»га хастаханәнең матбугат хезмәтендә хәбәр иттеләр.

РФ Үзәк банкы тупланган кешбэкны һәм рубльгә бонус балларын алмаштыру буенча мошенниклыкның яңа схемасын ачыклаган. Бу хакта регулятор сайтында хәбәр ителә.

Махсус операция барышында Россия армиясенә өстәмә чакыру кирәкми, дип саный Федерация Советының Оборона комитеты башлыгы Виктор Бондарев. Бу хакта РИА Новости хәбәр итә.

Яшь әниләрнең декрет ялын үзләре сайлый алу хокукы турындагы тәкъдим – дөрес фикер, дип саный Федерация Советының социаль комитеты әгъзасы Владимир Круглый.

Сабантуйлар 35 чит илдә һәм Россиянең 58 төбәгендә үткәрелә.

«Созвездие-Йолдызлык» арт-резиденциясендә янгын чормада башланган, шуннан соң түбә яна башлаган. Бу хакта «Татар-информ» агентлыгына Татарстан Республикасы Яшьләр эшләре министрлыгы матбугат хезмәтендә хәбәр иттеләр.

Татарстан Президенты Рөстәм Миңнеханов биш татарстанлыны «Фидакарь хезмәт өчен» республика медале белән бүләкләде. Тиешле карар хокукый мәгълүмат порталында басылып чыкты.

Казан шәһәре мәдәният идарәсе башлыгы Азат Абзалов батырларны билгеләү жирәбә буенча башкарылмаячагын, көрәшчеләр абсолют батыр калганчы көрәшәчәген белдерде.