Татарстанда Сабантуй ярышларында катнашкан ике кешенең кулбашы һәм тубык сөяге сынган
Узган ял көннәрендә район Сабантуйларында ярышларда катнашкан вакытта сөяге сынган ике кешене Татарстанның Республика клиник хастаханәсенә китергәннәр. Бу хакта «Татар-информ»га хастаханәнең матбугат хезмәтендә хәбәр иттеләр.
Казанда яшәүче 33 яшьлек ир-ат Татарстанның Әтнә районына Сабантуйга кайткан. Көрәшкән вакытта ул аягының тубык сөяген сындырган.
Чаллыда яшәүче 31 яшьлек хатын-кыз сабан бәйрәмен Балык Бистәсендә уздырган. Кул көрәшендә аның кулбаш сөяге сынган.
«Ике пациент та безгә китерелде, икесенә дә 1нче травматология бүлеге хирурглары операция ясады. Бүген алар хастаханәдә, аларның хәле канәгатьләнерлек», – дип сөйләделәр агентлыкка хастаханәнең матбугат хезмәтендә.