Новости за 12.02.2024

Россиядә Гаилә елы уңаеннан, Баулы районы ЗАГС бүлегендә исем кушу тантанасы булды. Бәйрәмгә күптән түгел генә балалары туган гаиләләр чакырылды. Аларга сабыйларның беренче документлары тапшырылды. Бу хакта «Баулы-информ» хәбәр итә.

Тарих институтында Рөстәм Әминов әзерләгән «И.И.Захаровның 1723-1724 елларда Җаек казаклары җанисәп китабы» тәкъдим ителде.

Бу атнада көчле булмаган бураннардан соң Татарстанга тагын -33 градуслы салкыннар киләчәк. Бу ТР Гидрометүзәге тараткан фараздан килә.

Иртәгә, 13 февральдә, Татарстанның Бөгелмә районында яшәүчеләр Татарстанда уза торган автобус марафонында катнашачак. Панель дискуссиясе Бөгелмә техника йортында уза.

Татарстан башкаласында «Киләчәк уеннары» халыкара мультиспортив турниры югары дәрәҗәдә узарга тиеш. Ул 21 февральдән 3 мартка кадәр була. Бу хакта Россия Премьер-министры Михаил Мишустин вице-премьерлар белән иртәнге киңәшмәдә белдергән. Россия Хөкүмәте матбугат хезмәте шул хакта хәбәр итә.

Дәүләт Думасына махсус хәрби операция ветераннарының һәм аларның гаилә әгъзаларының түләүле парковка зоналарында бушлай парковкага хокукы турындагы закон проект тәкъдим ителгән. Документ Дума базасында чыкты. Бу хакта РИА Новости яза.

Узган елның 21 декабрендә Мәскәүдән Казанга юл ачылганнан соң, М12 «Көнчыгыш» югары тизлекле юлдан автомобильләр якынча 3,1 миллион тапкыр узган. Бу хакта «Автодор» дәүләт компаниясе матбугат хезмәте хәбәр итә.

Россия сыйфат системасы (Роскачество), Татарстан мөселманнары Диния нәзарәте һәм ТР мөселманнары Диния нәзарәтенең «Хәләл» стандарты буенча комитеты Россиядә хәләл индустрияне үстерү буенча бергә эшләү турында килеште. Төбәк территориясендә Роскачество каршындагы Хәләл компетенцияләр федераль үзәгенең территориаль вәкиллеге ачылачак. Бу хакта оешманың матбугат хезмәте хәбәр итә.

Татарстан предприятиеләре эшче куллар җитмәү сәбәпле, хезмәт хакын арттыра һәм яшь белгечләр өчен социаль гарантияләр пакетын киңәйтә. Бу хакта бүген «Татар-информ»га «Татарстан һөнәри компетенцияләрне үстерү үзәге» коммерцияле булмаган автономияле оешма генераль директоры Эмиль Гобәйдуллин хәбәр итте.

15 февральдә Татарстан Үзәк сайлау комиссиясе җирәбә сала, аның нәтиҗәләре буенча Россиия Президентын сайлау алдыннан төбәк каналларында эфир вакыты билгеләнә. Бу чара «Московский» мәдәни үзәгендә (Казан, Академик Королев ур., 47) 10.00 сәгатьтә була.

Саратов шәһәрендә Идел буе идарә институтында мәктәп укучыларының «Идел буе халыклары: тарих, мәгариф, мәдәният» VIII төбәкара фәнни-гамәли конференциясен ачу һәм пленар утырышы булды. Бу хакта Бөтендөнья татар конгрессы матбугат хезмәте хәбәр итә.

Казанның 187нче күппрофильле лицеенда бүген Россия һәм Татарстан сайлау системасы нигезләрен аңлатуга багышланган «Киләчәкне сайлыйбыз» парламент дәресе узды. Анда ТР Дәүләт Советы Рәисе Фәрит Мөхәммәтшин катнашты.

Бүген ТР Сәнәгать һәм сәүдә министрлыгы коллегиясенең йомгаклау утырышында Татарстан һәм Марий Эл республикалары арасында хезмәттәшлек турында килешү имзаланды.

1 сентябрьдән мәктәпләргә хезмәт дәресе кайтарылачак. Бу яңалык турында һәм ни өчен югары сыйныф укучылары югары уку йортларын түгел, ә техникумнарны сайлаулары турында бүген «Татар-информ»дагы матбугат конференциясендә Татарстан мәгариф һәм фән министрының беренче урынбасары Андрей Поминов сөйләде.

11 февральдә Каюм Насыйри институтның фәнни-белем бирү үзәгендә татар теле дәресләре башланды. Татарстанның Свердловскидагы Даими вәкиле Хәйдәр Гыйльфанов укучыларны сәламләде һәм татар теленә кызыксыну белдерүләре өчен рәхмәт әйтте. Бу хакта Татарстанның Свердловскидагы Даими вәкиллеге матбугат хезмәте хәбәр итә.

Татарстан сәнәгате казанышлары күргәзмәсендә ТР Рәисе Рөстәм Миңнехановка республика энергетикалары куллана торган VR-күзлекне күрсәттеләр. Ул бу хакта Телеграм-каналында сөйләде.

Татарстан Үзәк сайлау комиссиясендә журналистларга март аенда узачак Россия Президентын сайлауда өйдән өйгә йөрүчеләрнең экипировкасын күрсәттеләр. Алар республика сайлаучыларына 17 февральдән мәгълүмат бирә башлаячак. Комиссия хезмәткәренең үзе белән нәрсәләр булырга тиешлеге турында Татарстан Үзәк сайлау комиссиясе рәисе Андрей Кондратьев сөйләде.

2023 ел нәтиҗәләре буенча Россиянең тулаем эчке продукты, соңгы мәгълүматларга караганда, 3,6 процентка арткан, бу уртача дөнья темпларыннан югарырак булып чыга. Бу хакта Президент Владимир Путин икътисади мәсьәләләр буенча киңәшмәдә әйтте.

Бүген республика Рәисе Рөстәм Миңнеханов ТР Сәнәгать һәм сәүдә министрлыгының йомгаклау коллегиясе алдыннан Татарстан сәнәгате казанышлары тәкъдим ителгән күргәзмә белән танышты. Күргәзмәдә 50гә якын предприятие һәм югары уку йорты үз продукциясен һәм яңалыкларын тәкъдим иткән иде.

ТР экология һәм табигый ресурслар министры Александр Шадриков бүген иртән мошенниклар аның сәхифәсенә үтеп керүе хакында хәбәр итте.

Татарстан Рәисе Рөстәм Миңнеханов органик химия өлкәсенә зур өлеш керткән өчен В.В.Марковников исемендәге Халыкара премия тапшыру комитетын киңәйтте. Шул хактагы указ хокукый мәгълүмат порталында урнаштырылган.

13 февральдә 14.00 сәгатьтә «Татмедма» акционерлык җәмгыятендә «Язылган өчен шифаханәгә юллама, телевизор һәм башка бүләкләр» акциясе нәтиҗәләре буенча бүләкләр тапшыру тантанасы була. Бу хакта «Татмедиа» акционерлык җәмгыятенең матбугат хезмәте хәбәр итә.

Казанда бураннар дәвам итә һәм февральнең беренче 11 көнендә генә дә шәһәрдә айлык явым-төшем нормасына якын күләмдә кар яуды. Башкарма комитет җитәкчесе урынбасары Игорь Куляжев эшлекле дүшәмбе киңәшмәсендә шулай дип белдерде.

Казанда Татарстан мәдрәсәләре һәм ислам югары уку йортлары шәкертләре арасында татар теле, әдәбияты һәм татар халкы тарихы буенча VI Республикакүләм олимпиада оештырылачак.

ТР буенча эчке эшләр министры вазифасын биләгән Артем Хохоринны һәм республиканың элеккеге хәрби комиссары Сергей Погодинны Татарстанның чакырылыш комиссиясе составыннан чыгардылар. ТР Рәисе Рөстәм Миңнехановның шул хактагы указы республиканың хокукый мәгълүмат интернет-порталында урнаштырылган.