Азнакайда юл һәлакәте корбаннарын искә алдылар
(Азнакай, 22 ноябрь, «Татар-информ», « Азнакай », Тансылу Саниева). Татарстан мәйданында Бөтендөнья юл фаҗигаләрендә һәлак булганнарны искә алу көне уңаеннан хәтер акциясе оештырылды.
Анда укучылар да, яшьләр дә актив катнашты.
Район буенча ЮХИДИ идарәсе начальнигы Александр Лаврентьев үзенең чыгышында һәркемне юл фаҗигаләрен булдырмый калуда үз өлешләрен кертергә, юл хәрәкәте кагыйдәләрен катгый үтәргә чакырды.
«Юкка гына тизлек иртәме-соңмы һәлакәткә китерә дип әйтмиләр. Аварияләрнең күбесе тизлекне арттыру сәбәпле килеп чыга. Билгеле шоферлардан гына түгел, җәяүлеләрдән дә саклык сорала. Бигрәк тә кичке якта урамга, юлга чыкканда игътибарлы булырга кирәк. Барыгызны да яктылык кайтаргыч элементлар тагып йөрергә чакырабыз», — ди хокук сакчысы.
Чара азагында юл корбаннарын бер минут тынлык белән искә алдылар.