Новости за 02.05.2024

Тумыштан ДЦП белән интегүче Чаллы рәссаме Ренат Мусин ярдәм итәрлек дуслар эзли. Бу хакта ул социаль челтәрләрдә мөрәҗәгать белән чыкты. Бу хакта «Шәһри Чаллы» яза.

Россия Президенты Владимир Путин «Крокус Сити Холл»дагы теракт вакытында концерт залыннан кешеләрне чыгарган өч яшүсмерне «Һәлак булучыларны коткарган өчен» медале белән бүләкләде. Документ хокукый мәгълүмат интернет-порталында урнаштырылган.

«Саумы, Казан!» конкурсында катнашу өчен гаризалар кабул итү башланды. Декоратив-гамәли сәнгать осталары борынгы Казан риваятьләренә һәм мифларына багышланган эшләрен тәкъдим итә ала. Алар дүрт юнәлештә башкарылган булырга тиеш: тирене сәнгатьле эшкәртү, киез басу, чигү, керамика. Бу хакта Казан мэриясе матбугат хезмәте хәбәр итә.

Татарстан Министрлар Кабинеты Аппараты җитәкчесе урынбасары – эшләр идарәчесе Сергей Коростелев «Россия – ислам дөньясы: KazanForum» халыкара икътисади форумын үткәргән өчен Россия Президентының Мактау грамотасы белән бүләкләнде. РФ Президенты Владимир Путин имзалаган указ хокукый мәгълүмат порталында урнаштырылган.

Казан дәүләт медицина университеты ректоры Алексей Созиновка «Россиянең атказанган сәламәтлек саклау хезмәткәре» дигән мактаулы исем бирелде. РФ Президенты Владимир Путин шул хактагы указны имзалады.

Татарстанда экстремаль җылыга алмашка аномаль салкыннар килде. Республикада бу һәм алдагы төннәр май аенда барлык метеокүзәтүләр тарихында иң салкыны булырга мөмкин, дип белдерде КФУның Экология һәм табигатьтән файдалану институтының метеорология, климатология һәм атмосфера экологиясе кафедрасы доценты Тимур Әүһәдиев.

ТР урман хуҗалыгы министры Равил Кузюров «Минем герой – минем гаилә» патриотик флешмобына кушылды. Ул «Татар-информ» агентлыгына Орел өлкәсендә сугышкан һәм озак еллар хәбәрсез югалган дип саналган бабасы хакында сөйләде.

Татарстан Рәисе Рөстәм Миңнеханов Казан метросы машинисты Руслан Маминга багышланган видео урнаштырды. Ролик ТР җитәкчесенең телеграм-каналында чыкты.

Татарстанда 2024 елның 1 июленнән «Бюджет өлкәсендә эшләүченең хезмәтенә түләү буенча бердәм тариф челтәре»нә кермәгән бюджет тармагы хезмәткәрләренең айлык вазифаи окладлары арта. ТР Премьер-министры Алексей Песошин шул хактагы карарны имзалады.

Иртәгә, 3 майда, Татарстанда һава шартлары җитди начараер дип фаразлана. Бу хакта ТР Гидрометеорология һәм әйләнә-тирә мохитне күзәтү идарәсе хәбәр итә.

Татарстан Республикасы икътисад министры Мидхәт Шаһиәхмәтов сүзләренчә, «Россия – Ислам дөньясы: KazanForum» Халыкара икътисади форумы кысаларында ислам финансларына багышланган электрон мәйданчыклар тәкъдим ителәчәк. Бу хакта ул ТР Министрлар Кабинетында брифингта сөйләде.

Казанның Яңа Татар бистәсе зиратында мөселман зыялылары каберләре чардуганнарына QR-кодлар урнаштырганнар. Башлангыч инициаторы – Казанның Ислам динен кабул итүгә 1000 ел исемендәге мәдрәсәсе. Бу хакта әлеге зиратта дин әһелләрен искә алу чарасында хәбәр иттеләр.

Бүген Татарстанның Алексеевск районы Лебяжье авылында яңа бадминтон үзәге ачылды. Үзәкне ачу тантанасында әлеге спорт дисциплинасының танылган вәкилләре һәм ТР Премьер-министры Алексей Песошин катнашты.

Россиядә йомшак һәм каты бодайга дәүләт сыйфат мониторингы үткәреләчәк. Татарстанда 2,2 миллион тоннадан артык ашлыкны тикшерергә ниятлиләр, бу бөртекле һәм бөртекле-кузаклы культураларның тулай җыемының 50 процентка якыны дигән сүз. Бу хакта Татарстанда Ашлыкның сыйфатын бәяләү үзәге матбугат хезмәте хәбәр итә.

Кыргызстанда йөртүчесе булмаган йөк машинасы Сузак районында оештырылган бәйрәм вакытында 29 баланы бәрдергән, дип хәбәр итә РИА Новости агентлыгы.

Самара өлкәсеннән Солтан Канюкаев шашка-64 («рус шашкасы» спорт дисциплинасының бер төре) буенча Европа чемпионатында икенче урынны яулаган. Бу хакта Бөтендөнья татар конгрессы сайтында хәбәр итәләр.

Уфаның «Нур» татар театры актрисасы, Башкортстанның халык артисты Резидә Зариповага Театр эшлеклеләре берлеге рәисе Әхтәм Абушахманов Станиславский медален тапшырган. Бу хакта «Башинформ» агентлыгы яза.

27 апрельдә Истанбул татарлары шагыйрь Габдулла Тукайны искә алган. Шәһәрнең Әюп районындагы Тукай паркында шагыйрь һәйкәленә чәчәкләр салганнар, «Топкапы төрки дөнья» комплексындагы «Татарстан музей-өе» янында балалар һәм студентлар катнашында концерт, милли остаханәләр, уеннар үткәргәннәр.

23 апрельгә Казанда узачак БРИКС Уеннары ярышларына 10 мең билет сатылган. Бу хакта турнирны оештыручылар хәбәр итә.

Санкт-Петербургта Пискарев зираты янындагы Хәтер скверында һәлак булган геройлар хөрмәтенә исемле агачлар утырту акциясе узган. Агачлар локаль сугышларда һәм кораллы конфликтларда, шулай ук махсус хәрби операция үткәргәндә һәлак булган Россия диңгез пехотачылары һәм десантчылары истәлегенә утыртылган. Бу хакта Татарстан Республикасының Санкт-Петербург шәһәре һәм Ленинград өлкәсендәге Даими вәкиллеге хәбәр итә.

Татарстан авыл хуҗалыгы һәм азык-төлек министры Марат Җәббаров «Россия – ислам дөньясы: KazanForum» халыкара икътисади форумы кысаларында узачак «Kazan Halal Market» күргәзмәсенә әзерлек эшләре баруын әйтте. Бу хакта ул ТР Министрлар Кабинетында брифингта сөйләде.

КАМАЗ хезмәткәрләрен корпоратив отпуск ялына май бәйрәмнәре арасындагы чорда, 2-8 майда җибәрергә планлаштырган.

ТР Югары суды Тукай районы башлыгы Фаил Камаевның чикләү чарасын үзгәртү турындагы үтенечен кире какты һәм аны сак астында калдырды. Бу хакта «Татар-информ»га судның матбугат хезмәтендә хәбәр иттеләр.

Башкортстан опера җырчысы Айгөл Әхмәтшина Forbesның «30га кадәр 30» рейтингына кергән. Бу хакта Башкортстанның атказанган артисты үзе социаль челтәрләрдә хәбәр иткән һәм казанышларын тану һәм хуплау өчен рәхмәт белдергән, дип яза «Башинформ» агентлыгы.

Бүген Казанның Яңа Татар бистәсе зиратында мөселман зыялыларын искә алу мәрасиме булды. Биредә билгеле әдипләр, дин әһелләре һәм Казанның Ислам динен кабул итүгә 1000 ел исемендәге мәдрәсәсе шәкертләре катнашты.