سرچینه: د کابل دشت برچي وروستى بريد زده کوونکي کړى و
یوې باخبرې سرچینې ازادي راډیو ته د موضوع د حساسیت له امله د نوم نه ښودلو او غږ نه خپرېدو په شرط دا معلومات شریک کړي دي.
سرچینه وايي، په متاز ښوونیز کورس کې برید کوونکی د دغه کورس یو شاګرد و چې د ده په خبره، لس ورځې مخکې یې په کې نوم لیکنه کړې وه.
سرچینه دا هم وايي، چې یاد کس لومړۍ د کانکور ازموینې تولګي لپاره نوملیکنه کړې وه خو ورسته یې ټولګی بدل کړی او د فزیک په برخه کې یې زده کړې کولې .
سرچینه وايي، نوموړی شاګرد په خپل ټولګي کې چاودېدونکي توکي چولي او بیا له کورس وتلی دی، چې دی ګومان کوي د عبدالرحیم شهید د ښوونځي مخې ته چې وروسته کومې چاودنې شوي دا هم د یاد شخص کار وي.
سرچینه زیاتوي، د یاد کس عمر له شلو کم و، د کابل اوسېدونکی و خو نور یې په اړه جزييات نه شریکوي.
د سه شنبې په ورځ په کابل کې د اتلسمې امنیتي حوزې اړوند سیمه کې په دریو بیلابیلو بمي چاودنو کې د عبدالرحیم شهید ښوونځي ګڼو زده کوونکو ته مرګ ژوبله واوښته، خو د ممتاز ښوونیز شاګردان یوازې ټپیان شوي دي.
د رسمي شمېرو له مخې په دغو چاودنو کې شپږ کسان وژل شوي او ۲۰ نور ټپیان دي.
سرچینې ازادي راډیو ته ویلي، چې د ممتاز کورس په ټپیانو کې، د اسما، شریفې، حسن رضا، رمضان، محمد په نوم کسان او د محمد خور شامله ده، چې په خبره یې محمد ډېر ټپي دی.
تر اوسه د دغه برید په اړه نه د طالبانو کشفي او امنیتي بنسټونو له رسنیو سره څه شریک کړي او نه هم کوم شخص یا ډلې یې مسولیت منلی دی.
بلې کومې خپلواکې سرچینې هم تر اوسه ازادي راډیو ته رسېدلي معلومات نه دي تاييد کړي.
خو د طالبانو د کورنیو چارو وزارت وايي، چې د سه شنبې د ورځې د پرلپسې بمي چاودنو د مسئولینو د موندلو په لټه کې دي.
د دغه وزارت ویاند عبدالنافع ټکور په دې اړه ازادي راډیو ته وویل: "موږ پوره هڅه کوو چې د پېښې عاملین ونیسو، د قانون منګلو ته یې وسپارو او دوی خپله سزا ورکړو، د افغانستان دښمنان دې پر دې پوه شي دلته چې هر څوک اوسېږې او افغانان دي د یوې کورنۍ غړي دي، په دې اړه څېړنې روانې دي چې کله څېړنې بشپړې شوې پایلې به یې له رسنیو سره شریکې کړو."
د یادونې ده، چې دا معلومات په داسې حال کې له ازادي راډیو سره شریک شوي، چې د چهارشنبه په ورځ د ممتاز ښوونیز مرکز یو استاد ازادي راډیو ته وویل، چې د طالبانو د استخباراتو کسانو د دغه کورس مسئولین او ځینې استادان د پېښې په تړاو د پلټنو لپاره له ځان سره بیولي وه او تحقیقات ورنه کړي چې وروسته د خلکو او څو کورسونو د مسئولینو په ضمانت بېرته ازاد شوي _ هغه څه چې په اړه یې زموږ پوښتنو ته د طالبانو د استخباراتو ریاست، کورنیو چارو وزارت او کابل امنیه قوماندانۍ ویاندویانو تر اوسه هم ځواب نه دی ورکړى.