Новости за 15.09.2018

Гуьржийчуьра бахархой Тбилисехь пикете буьйлу масийтта де а ду. КIентий байина дай а бу цу гуламехь лаьтташ.

Ийначу кепехь латархо, ММА-н спортхо Емельяненко Александр деша дIахIоьттина Соьлжа-ГIаларчу Миллионщиковн цIарахчу мехкдаьттан университетан 1-чу курсе. "Мехкадаьттан, газан гIуллакх" цIе йолу корматталла караерзо Iалашо хилла  Емельяненкон. ТАСС агенталле бина и хаам университетан проректоро Гайрбеков ИбрахIима. "Тхан университете деша веана Емельяненко. Цхьа экзамен яра цу факультетехь, иза а кхиамца дIаелира цо", - аьлла Гайрбековс. Маршо Радионо байначу баттахь яздира, Емельяненко Нохчийчохь деша лаам болуш хиларх. Читать дальше...

Дагестанан Карабудахкентан а, Буйнакскан а кIошташкахь дIаяьхьначу контртерроран операцехь (КТО) ФСБ-н спецназо кхо тIемало вийна аьлла хаамбина Къоман антитерроран комитето (НАК). КIиран Iуьйранна пхи сахьт даьллачул тIаьхьа йолийнера операци. "Теракташ дан кечамаш бу беш" аьлла, кхерамзалла ларъечу хьукматашка хаам кхаьчначул тIаьхьа йолийнера КТО. "Лаьмнийн хьаннашкарчу меттигашкахь лехамаш дIахьочу хенахь кхаа стагах лаьтта тоба хааеллера. Герз охьа а диллий, карадуьйла аьлча, автоматаш йиттинера цара дуьхьал"... Читать дальше...

Оьрсийчоьнан къайлахчу сервисийн хаамашца, Белгино дIавелла дуьненаюкъарчу лехамашкахь хилла Гехаев Iела. "Радикалан исламан агIонча хилла 30 шо долу Гехаев Евробертан пачхьалкхийн дозан тIехь ваьхна гуттар а. Цо ахчанца гIо латтош хилла Шемарчу "Исламан пачхьалкх" шех олучу тобанхошна", - аьлла, яздина ду ФСБ-н пресс-релизехь. Стохка Стигалкъекъа-баттахь дуьйнна лаьцна латтош вара Гехаев, Оьрсийчоьно дIавехарца. Еаридийнахь Оьрсийчу экстрадици йина цунна аьлла ю къайлахчу сервисийн информаци.

Шен юьртахошна уьрсаца тIелатар дина Беной-Веданара вахархо чохь вуьтуш, сацамбина кхело. 36 шо долчу вахархочо байначу беттан 8-чохь шен лулахочуьнца дов даьллачул тIаьхьа, цуьнан жимчу кIантана а, шина юьртахочунна а урс диттинера. Лулахочун кIант веллера чевнех. ХIеттахь дIалаьцна иза психиатрин экспертизех чекхваьккхинера. Прокуратуран хаамца, зуламхо лаьцна латтош ву хIинццалц схьа. "Кавказан узел" агенталлан хаамашца, чIир кхайкхийна оцу стагна дийначу беран гергарчара.

Талламан изоляторе кхача тарло фотомодел Ситюрева Ольга, цуьнан декъахочо Дудаев ИбрехIима ден тоьшаллаш бахьана долуш. Керлачу Арбатерчу "Мариотт" отелехь сейф йиллина, бизнесхочун Краюшкин Александран 22 миллион сом ахча арадоккхуш гIо дина цо. Цхьаболчу хаамийн гIирсашкахь моделан везар ву аьлла, цIе яьккхинчу Дудаевс чIагIо йо, шен цIийнден сейф еллахьара аьлла, шега гIо дехнера Ольгас аьлла. Иза кхечу пачхьалкхе дIавахна, шеца зIене волуш вац, ткъа шена хьаштхилла цу чуьра ахча а, кехаташ а аьлла хилла Синтюревас. Читать дальше...

Тоьллачу яздархочунна Deutscher Buchpreis престиже преми луш церемони хир ю Германехь. Немцойн маттахь тоьлла роман язйинчунна кхочур ду и совгIат. Ялх романан яздархо ву кху шарахь и преми къовсуш. Ю царлахь "Цициг а, Инарла а" ("Кошка и Генерал") романан автор – гуьржи, Германехь еха Харатишвили Нино. Харатишвилин роман Советан зама йохарх, Нохчийчохь хиллачу тIамах, адамех тIеман хенахь хуьлучух а язйина ю. Тбилисехь дуьненчу яьлла Харатишвили. Шен 12 шо кхаьчначул тIаьхьа ненаца Германи дIаяхана иза... Читать дальше...

Пятигорске йоьдучу новкъахь деа бераца яйна ГIалгIайчуьра зуда лоьхуш бу полисхой. Малгобекан кIоштарчу Юккъерчу Ачалукерчу вахархочо 36 шо долу шен йоI ярах хаамбина полици. Цо бахарехь, "Пятигорске садаIа яхана йоI, карарчу хенахь цхьа а кост доцуш яйна" аьлла, яздина ду ГIалгIайчоьнан чоьхьарчу гIуллакхийн министраллан сайт тIехь. Яйначу зудчун берийн 15, 13, 8, 5 шераш ду. Ставрополан кIоштан чоьхьарчу гIуллакхийн министраллан сайтехь хаам бац, ГIалгIайчоьнан яхархо а, цуьнан бераш а дарах.

Сунженскан кIоштахь пIераскан суьйранна вовшахкхетта 27 шо долчу Лахарчу Ачалукерчу вахархочун  "Лада Приора" а, 38 шо долчу Нохчийчуьрчу вахархочун “Хендай Солярис” а машенаш. ToDay News Ufa хьостано хаамбарца, суьйранна 8 сахьт даьллачу заманчохь хилла и некъан бохам федералан "Кавказ" трассан аэропорте воьдучу агIор. Машенийн шофераш белла, цу чуьра виъ пассажир а цхьана. 23 шо долу йоI а, 2 шой, 1 шой долу бераш а кIелхьарадаха аьтто хилла. Дарбан цIийнехь бу уьш. Машенаш духь-дуьхьал кхетаран бахьанаш къаьстина дац цкъачунна.