Սարի թաղի բախման արդյունքում վիրավոր ոստիկանները երեկ բուժօգնություն են ստացել ու տուն գնացել
Երեկ երեկոյան Սարի թաղի փակված ճանապարհի պատճառով սարիթաղցիների հետ բախումների արդյունքում վիրավոր 5 ոստիկան տեղափոխվել է «Էրեբունի» ԲԿ: Այս մասին Tert.am-ին փոխանցեցին ՀՀ առողջապահության նախարարությունից:
Ըստ առողջապահության նախարարի խոսնակի՝ ոստիկանության պարեկապահակային ծառայության գնդի մոտակայքում հուլիսի 19-ին տեղի ունեցած միջադեպի արդյունքում տարբեր վնասվածքներով 5 տուժած ոստիկան տեղափոխվել է «Էրեբունի» բժշկական կենտրոն, որտեղ անհրաժեշտ բժշկական օգնություն ստանալուց հետո բոլորը տուն են գնացել։
Ամբուլատոր պայմաններում 2 ոստիկան էլ անհրաժեշտ բուժօգնություն է ստացել «Սուրբ Գրիգոր Լուսավորիչ» ԲԿ-ում, ևս մեկը՝ Կենտրոնական զինվորական հոսպիտալում։
«Էրեբունի» ԲԿ-ից Tert.am-ը տեղեկացավ, որ 5 վիրավոր ոստիկան հիվանդանոց էր տեղափոխվել ոչ հրազենային վնասվածքով:
Նշենք, որ Սարի թաղում ոստիկանության ծառայողների նկատմամբ բռնություն կիրառելու դեպքի առթիվ քրեական գործ է հարուցվել։