Новости за 29.04.2024

Чирмешәннән Мария Гришанина һәм Милена Петрова Алабуга шәһәрендә «Алло, без талантлар эзлибез» республика бәйгесендә Гран-прига лаек булган. Бу хакта «Безнең Чирмешән» газетасы яза.

Апас «Җәмигъ» мәчетендә уку елына йомгак ясалды һәм дини белем нигезләрен алучы балалар өчен бәйрәм оештырылды. Бу турыда «Апас-информ» сайты яза.

20 апрельдә Әлки районының Базарлы Матак урта мәктәбе базасында «Аҗаган 2.0» хәрби-патриотик уенның муниципаль этабы үтте. Бу хакта «Әлки хәбәрләре» газетсы яза.

Әлмәтлеләр Нефтьчеләр мәйданына икенчел чимал: макулатура, пластик, шешә капкачлары, батареялар алып килделәр. «Агачны бергә коткарыйк» акциясе Әлмәт экология һәм төзекләндерү департаменты тарафыннан оештырылган. Бу хакта «Әлмәт таңнары» газетасы яза.

«АлабугаУкупрПласт» предприятиесе клубында күрү сәләте буенча инвалидлар арасында «Җиңү салюты» республика фестиваленең икенче этабы узды. Бу хакта «Албуга нуры» газетасы яза.

Татарстан Рәисе Рөстәм Миңнеханов бүген Россия Суперкубогында җиңү яулаган «Стрела-Ак Барс» регби клубы белән видеоны телеграм-каналына куйды.

Менделеевск районының Иске Гришкино мәктәбенең мәктәпкәчә төркемендә махсус операция катнашучылары белән очрашу узган. Солдатлар үзләренә җибәргән үлән чәйләре һәм 23 февральгә төшергән видео өчен балаларга рәхмәт әйтергә дип кергән. Алар хәрби хәрәкәтләр зонасыннан туган авылга кыска вакытлы ялга кайткан.

Казахстан Хөкүмәте каршындагы Законсыз активларны кайтару буенча комиссия олигархларның законсыз юл белән сатып алган активларын дәүләт хисабын кайтарган. Алар 40 миллиард тенгедән артык (якынча 90 миллион Америка доллары, яки 8,3 миллиард сум) тәшкил итә. Бу хакта кабинетның Telegram-каналында хәбәр ителә.

Казанның «Стрела-Ак Барс» клубы регби буенча Россия Суперкубогы җиңүчесе булды. Илнең гамәлдәге чемпионы – Пензаның «Локомотив»ына каршы финал матчы Саранск шәһәрендә узды. Татарстан Хөкүмәте матбугат хезмәте хәбәр иткәнчә, матчта республика Премьер-министры Алексей Песошин да булды.

Танылган актер һәм юморист Гарик Харламов Казанда булып киткән һәм үзенең Telegram-каналында Татарстан башкаласына сәфәреннән алган тәэсирләре белән уртаклашкан.

РФ вице-премьеры Дмитрий Чернышенко сүзләренчә, Казанда узачак БРИКС Уеннары бу җәйнең иң көчле ярышлары булачак. Гомумән алганда, июньнән августка кадәр Россиядә ким дигәндә 2 мең спорт чарасы уздырылачак, дип спикер цитатасын китерә ТАСС.

Иртәгә, 30 апрельдә, төнлә һәм иртән Татарстанда урыны белән туфракка кырау төшүе көтелә. Бу хакта ТР Гидрометеорология үзәге хәбәр итә.

28 апрельдә, Анталиядә, Урта диңгез яры буенда Габдулла Тукайның 138 еллыгына багышлап Төркия татарлары туган тел көнен билгеләп үткән. Татарстан байраклары белән бизәлгән бәйрәмдә 80 ләп кеше катнашкан. Бу хакта җыенны оештыручы – татар милли хәрәкәте лидерларының берсе, журналист һәм җәмәгать эшлеклесе Наил Нәбиуллин хәбәр итте.

Кичә Сочида V Көньяк Сабан туе башланды. Адлер мәдәният һәм ял паркына Россиянең 21 төбәгеннән кунаклар һәм делегация килде. Бәйрәмне Яшел Үзән районы оештырды, дип хәбәр иттеләр «Татар-информ»га муниципаль берәмлекнең матбугат хезмәтендә.

Казан аэропортына пассажирларның азык-төлек өчен пленкага төрелгән багажын кабул итүне тыю турында бернинди боерыклар дә килмәгән. Бу хакта «Татар-информ»га Казан аэропортында хәбәр иттеләр.

Россия Президенты Владимир Путинның Төркиягә сәфәре якын арада булырга тиеш, әмма аның төгәл көне әлегә килештерелмәгән. Бу хакта РИА Новости Анкарадагы дипломатик чыганакка сылтама белән хәбәр итә.

Шимбә, 4 майда, Татарстанда «Хәтер бакчасы» халыкара акциясе узачак. Бу чарада катнашучылар үзләренең герое – Бөек Ватан сугышында катнашучы хөрмәтенә агач утырта алачак. Акция Җиңүнең 79 еллыгы кысаларында була, дип хәбәр итә оештыручыларның матбугат хезмәте.

26 апрельдә, Габдулла Тукайның 138 еллыгы көнендә, Төркиядәге Татар җәмәгатьчелеге вәкилләре Анталия мэры Мөхетдин Бөҗәккә мөрәҗәгать тапшырды. Наил Нәбиуллин имзалаган бу мөрәҗәгатьтә, Анталиядә Татар шагыйре Габдулла Тукай исемен бер урамга, паркка бирелүен сорады. Шулай ук Анталиядә Тукай һәйкәлен булдыруны да үтенде. Бу турыда оештыручылар хәбәр итә.

26 апрельдә Свердловск өлкәсе халык иҗаты сараенда «Яшьлек» татар җыры коллективының хисап концерты узган. Бу хакта Татарстан Республикасының Свердловск өлкәсендәге Даими вәкиллеге хәбәр итә.

Менделеевскида демобилизацияләнгән хәрби хәрәкәтләр ветераны Дмитрий Токарев II дәрәҗә «Хәрби батырлык өчен» медале алды. Әлеге бүләк аңа саклану министры боерыгы нигезендә хәрби бурычын үтәгәндә күрсәткән батырлыгы һәм фидакарьлеге өчен тапшырылды. Бүләкне районның хәрби комиссары Сергей Залуженко тапшырды.

28 апрельдә Чаллыда хәйрия концерты узган. Аннан кергән акчалар «Җәмигъ» мәчете төзелешенә юнәлдереләчәк. Бу хакта «Челниниские известия» хәбәр итә.

27 апрельдә Пензада гаилә елына багышланган «Яңа Йолдыз-2024» II төбәк балалар иҗат һәм талант конкурсы финалы узган. Бу хакта Пенза өлкәсе милли-мәдәни мохтариятенең «ВКонтакте» социаль челтәрләрендәге төркемендә хәбәр итәләр.

Габдулла Тукай туган көнендә Казан Кирмәненең гавәми урыннарында Татарстан Рәисе Рөстәм Миңнеханов татар җәмәгатьчелеге белән очрашты. ТР Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе рәисе Марат Әхмәтов анда үз тәкъдим-фикерләрен яңгыратты.

Самараның «Яктылык» мәктәбе муниципаль бюджет гомуми белем бирү учреждениесе укучылары Каюм Насыйри исемендәге төбәкара фәнни-тикшеренү укулары призерлары булган. Бу хакта «Самара татарлары» сайтында хәбәр итәләр.

Агымдагы атнада Россия Президенты Владимир Путин инаугурациясе узачак. Бу хакта журналист Павел Зарубин телеграм-каналында хәбәр ителә.