Новости за 04.10.2023

1-4 октябрьдә Азәрбайҗан Республикасының Баку шәһәрендә ир-атлар һәм хатын-кызлар арасында билбаулы көрәш буенче Европа чемпионаты узды. Анда Азнакай егете Илфат Миңнегалиев Россия җыелма командасы составында чыгыш ясады һәм 57 килограмм авырлыкта чемпион калды. Бу хакта «Азнакай» сайтында хәбәр ителә.

Буада өч хәрби хезмәткәрне махсус хәрби операция зонасына озаттылар. Алар Саклану министрлыгы белән контракт төзегән. Буа районы башлыгы Ранис Камартдинов социаль челтәрләрдә фотолар белән уртаклашкан.

Соңгы елларда Үзбәкстанның Татарстан белән мөнәсәбәтләре, Россия Федерациясенең башка субъектлары кебек үк, хезмәттәшлекнең югары динамикасы белән характерлана. Үзбәкстан Президенты Шәүкәт Мирзияев үзара эшчәнлекне шулай бәяләде.

Россиядә пенсионерлар саны быел — 1,1 млн кешегә, киләсе елда 569 меңгә артачак. Үсеш, нигездә, яңа төбәкләр хисабына булачак. Бу хакта Дәүләт Думасы сайтында урнаштырылган Россия Социаль фонды бюджеты проектына сылтама белән «Российская газета» яза.

Казанда уза торган Россия һәм Үзбәкстан арасында III Төбәкара хезмәттәшлек форумы катнашучылары һәм оештыручыларына Россия Президенты Владимир Путин сәламләү телеграммасы җибәргән. Текст Кремль сайтында урнаштырылган.

Иртәгә, 5 октябрьдә, Укытучылар көне уңаеннан Казан телеманарасында бәйрәм уты кабызылачак.

Татарстан Үзбәкстанның Бохара һәм Нәваи өлкәләрендә сәнәгать мәйданчыклары булдыру юнәлешендә эш алып бара. Бу хакта Татарстан Республикасы Рәисе Рөстәм Миңнеханов Россия һәм Үзбәкстан арасында III Төбәкара хезмәттәшлек форумы утырышында белдерде.

Үзбәкстан Президенты Шәүкәт Мирзияевның Татарстанга килүе ике республика хезмәттәшлеген үстерүдә яңа этап ача. Бу хакта Татарстан Республикасы Рәисе Рөстәм Миңнеханов Россия һәм Үзбәкстан арасында III Төбәкара хезмәттәшлек форумының пленар утырышында белдерде.

110 еллык тарихы булган сәүдәгәр Әсәдуллаев йорты илнең төрле төбәкләреннән татарларны җәлеп итү үзәге булып кала. Аларның барысын да үзенчәлекле рух берләштерә, аны сындыру мөмкин түгел. Бу хакта Мәскәү татарлары автономиясе җитәкчесе Фәрит Фарисов башкаланың Татар мәдәни үзәгендә яңа иҗат сезоны ачылышында белдерде.

Бөтен ил буенча мөселман туристлык дестинацияләрен (җәлеп итү урыннарын) булдыру проекты Россия мөселманнары Диния нәзарәте рәисе Равил хәзрәт Гайнетдин тарафыннан хупланган. Проект Россия территориясенә яңа туристлар агымын җәлеп итүгә юнәлдерелгән.

Гаяз Исхакыйның тууына 145 ел тулу, Садри Максудиның 145 еллыгы, Төркиянең 100 еллыгы уңаеннан Төркиядә татар активисты марафон башлады. Ул 1 октябрьдә Анталиядә Ататөрек һәйкәле янында башланып китте. Марафонның инициаторы һәм бердәнбер катнашучысы – танылган җәмәгать эшлеклесе, журналист Наил Нәбиуллин.

Идел буе закон чыгаручылары ассоциациясе утырышында Идел буе федераль округы төбәкләрендә яшьләр сәясәтен гамәлгә ашыру мәсьәләләре тикшерелде. Утырышта Дәүләт Советы Рәисе Фәрит Мөхәммәтшин катнашты. Бу хакта ТР Дәүләт Советы матбугат хезмәте хәбәр итә.

Бүген Мәскәүдә Арбат-Покровская метро линиясенә «Укытучы — дөньядагы төп һөнәр» поезды җибәрелде. Ул Педагог һәм остаз елына багышланган. Татарстаннан килгән педагоглар династиясе вәкилләре — Битколовлар, Гайнановлар, Закировлар һәм Зәкиевлар аның тәүге пассажирларының беренчеләреннән булды.

Татарстан башкаласында ягып җылыту сезоны иртәгә, 5 октябрьдә башлана, әмма торак йортларга җылылык киләсе атнага гына киләчәк. Бу хакта мэриянең матбугат хезмәте Казан Башкарма комитетының торак коммуналь хуҗалыгы комитетына сылтама белән хәбәр итә.

Казан ноябрьгә иң популяр туристик юнәлешләр арасында бишенче урынны алды. ТР башкаласына броньларның гомуми санының 4,4 проценты туры килде.

Россия Сәнәгать һәм сәүдә министрлыгы башлыгы Денис Мантуров Татарстан Рәисе Рөстәм Миңнеханов белән очрашты. Министр Казанга Россия һәм Үзбәкстан арасында III Төбәкара хезмәттәшлек форумында катнашу өчен килде. Бу хакта Татарстан Рәисе җитәкчесе матбугат хезмәте хәбәр итә.

Үзбәкстан Президенты Шәүкәт Мирзияев 5 октябрьдән 7 октябрьгә кадәр рәсми сәфәр белән Россиягә килә. Бу хакта аның рәсми сайтында хәбәр ителә.

ТАССРНың атказанган сәнгать эшлеклесе, Татарстанның халык артисты Рафаэль Ильясов туган авылы Түбән Чәкедәге мәдәният йортына аның исемен бирергә телиләр.

«Көзге Иртыш моңнары» конкурс-фестивале ел саен һәм халыкара дәрәҗәдә үткәрелә. Быел бәйге 27-29 октябрь көннәрендә Казахстан Республикасының Семей шәһәрендә узачак. Гаризалар 15 октябрьгә кадәр кабул ителә. Бу хакта Бөтендөнья татар конгрессы матбугат хезмәте яза.

Татарстан Рәисе Рөстәм Миңнеханов Үзбәкстан вице-премьеры Жамшид Ходжаев белән очрашты. Премьер-министр урынбасары Россия һәм Үзбәкстан арасында III Төбәкара хезмәттәшлек форумында катнашу өчен зур делегация белән бергә Казанга килде. Бу хакта ТР җитәкчесенең матбугат хезмәте хәбәр итә.

Россия югары уку йортларында югары белем бирүнең яңа илкүләм системасы аның макеты тулысынча формалаштырылгач – 2025 елның 1 сентябреннән гамәлгә кертеләчәк. РФ фән һәм югары белем министры урынбасары Дмитрий Афанасьев шулай дип белдерде. Бу хакта РИА Новости агентлыгы хәбәр итә.

Бүген Марий Эл Республикасының яңа прокуроры Илдус Нәфыйков коллективка тәкъдим ителде. Бу хакта «Татар-информ» агентлыгына республика прокуратурасының матбугат хезмәтендә хәбәр иттеләр.

Җомга көнне, 6 октябрьдә, Самараның Тарихи мәчетендә Наил хәзрәт Биктаев «Исламда гаилә коруның әһәмияте һәм үзенчәлекләре» дигән темага семинар үткәрә. Бу хакта «Самара татарлары» сайты хәбәр итә.

Казанда җырчы һәм театр актрисасы, ТАССРның атказанган артисткасы Зифа Басыйрова истәлегенә мемориаль такта ачылды. Мемориаль такта җырчы яшәгән йорт диварына – Казан шәһәре, Татарстан урамы, 16/78 йорт адресы буенча урнаштырылды. Чараны Габдулла Тукай исемендәге Татар дәүләт филармониясе Татарстан Мәдәният министрлыгы белән берлектә оештырды.

Татарстанда ике депутатны керемнәр турында белешмәләрен яшергән өчен вакытыннан алда вәкаләтләреннән мәхрүм иттеләр. ТР Рәисенең Коррупциягә каршы сәясәт мәсьәләләре идарәсе башлыгы урынбасары Рөстәм Гаязов «Татар-информ» агентлыгында узган матбугат конференциясендә шулай дип белдерде.