Новости за 03.10.2023

Бүген Түбән Кама районы Ширәмәт авылында китап укучылар өчен беренче модель китапханә үз ишекләрен ачты. Ул республикада иң борынгыларның берсе булган авыл китапханәсе базасында төзелде. Бу хакта Түбән Кама муниципаль районы рәсми сайтында хәбәр ителә.

Мәскәүнең Көнчыгышны өйрәнү институтында иң популяр татар халкының милли ризыгына багышланган «Чәкчәк Фест» бәйрәме узды. Укытучылар көне алдыннан башкала татар җәмәгатьчелеге вәкилләре педагогларны һөнәри бәйрәмнәре белән котларга һәм шул ук вакытта традицион тәмле ризыклар белән сыйларга җыелды.

Бүген Казанның «Ак Барс» хоккейчылары Череповец шәһәренең «Северсталь» командасына 1:4 исәбенә җиңелде. Матч Казанда «Татнефть Арена» боз сараенда узды.

«Ак чәчәкләр» бульварындагы иҗат остаханәсе эшен дәвам итә. Анда теләгән һәркем әлеге телдә сөйләшүче Елена Джиханнан төрек теле буенча дәресләр ала алачак.

Тула мөселманнары Диния нәзарәтенең гыйбадәт кылу бинасында Мәүлид бәйрәме уңаеннан Мөхәммәт пәйгамбәрне с.г.в. хөрмәтләүгә багышланган балалар бәйрәме узды. Бу хакта Россия мөселманнары Диния нәзарәте матбугат хезмәте хәбәр итә.

Тарихчы-этнолог, галим Лев Гумилевның 111 еллыгы алдыннан Татарстанның Санкт-Петербургтагы һәм Ленинград өлкәсендәге Даими вәкиллегендә татар милли мәдәнияте музеенда аның тормышы һәм иҗаты турында басмалар һәм хезмәтләре нигезендә китап күргәзмәсе оештырылган. Бу хакта Даими вәкиллек матбугат хезмәте хәбәр итә.

Татарстан «Студентлар стартабы» конкурсында җиңүчеләр буенча лидер төбәкләр рәтенә керде. Гомумән алганда, төрле төбәкләрдән 1,5 мең инициатива сайлап алынган, аларның авторлары гамәлгә ашыруга 2023 елда 1 млн сум алачак. Бу хакта Россия вице-премьеры Дмитрий Чернышенко сөйләде.

1 октябрьдә Санкт-Петербургта гарәп теле дәресләре башланды. Бу хакта Санкт-Петербург һәм Ленинград өлкәсе Татарлар порталы хәбәр итә.

Чүпрәле районы мәктәбендә укучылар видео куйганнан соң, полиция хезмәткәрләре тикшерү башлады. Бу хакта Россия Эчке эшләр министрлыгының Татарстан буенча матбугат хезмәте хәбәр итә.

Авыл яшьләре проблемаларына игътибар артты. Бу проблемалар турында фикер алышуны алга таба да алып барырга кирәк. Бу фикерне Татарстан Дәүләт Советы Рәисе Фәрит Мөхәммәтшин бүген Кировта Россия Идел буе федераль округы субъектларының дәүләт хакимияте закон чыгару органнары каршындагы Яшьләр парламентлары ассоциациясе утырышында әйтте.

2020 елдан Татарстан иминият пенсияләренең уртача күләме буенча Идел буе федераль округында алдынгылыкны саклый. Бу хакта бүген Татарстан буенча пенсия һәм социаль иминиятләштерү фонды бүлеге идарәчесе Эдуард Вафин белдерде.

Татарстан Рәисе Рөстәм Миңнеханов Төркиянең «Шишеджам» компанияләре төркеменең Директорлар советы рәисе һәм әгъзасы Әхмәт Кырман белән очрашты. Бу хакта республика җитәкчесенең матбугат хезмәте хәбәр итә.

Узган төндә Алабугада янгында ир-ат үлгән. Бу хакта «Татар-информ»га Россия Гадәттән тыш хәлләр министрлыгының Татарстан буенча Баш идарәсе матбугат хезмәтендә хәбәр иттеләр. Яшьләр урамындагы биш катлы йортның икенче катында ике бүлмәле фатирда янгын чыккан.

Татарстан Рәисе Рөстәм Миңнеханов дәүләт хезмәте ветераннары белән очрашты. Очрашу Казан Ратушасында узды һәм 1 октябрьдә билгеләп үтелә торган Халыкара өлкәннәр көненә багышланды. Бу хакта республика җитәкчесенең матбугат хезмәте хәбәр итә.

Яңа сезонда Кариев исемендәге Казан Татар дәүләт яшь тамашачы театры «театр дәресе» форматында спектакльләр циклын булдыра башлаячак. Аларда мәктәп курсында өйрәнелә, тик театр фикеренчә, җитәрлек дәрәҗәдә тулы өйрәнелми торган танылган шәхесләр турында сөйләячәкләр.

Әлмәттә мошенниклар алдаган пенсионерлардан акча алган 15 яшьлек курьерны тоткарлаганнар. Бу хакта Россия Эчке эшләр министрлыгының Татарстан буенча идарәсе матбугат хезмәтендә хәбәр иттеләр.

Татарстанда хезмәт ветераннарына төрле социаль ярдәм чаралары күрсәтелә, шул ук вакытта аларның керемнәре исәпкә алына, ул 20 мең сумнан артмаска тиеш. Татарстанның хезмәт, халыкны эш белән тәэмин итү һәм социаль яклау министры Эльмира Зарипова бу исемне ничек алырга икәнлеген сөйләде. Ул бу хакта бүген Татарстан Министрлар Кабинетында узган брифингта җиткерде.

Мәскәүдә сыйныф җитәкчеләренең өченче форумы бара. Анда Татарстаннан 70 педагог катнаша. 3 октябрьдән 7 октябрьгә кадәр узачак чарада Россиянең 89 төбәгеннән өч мең сыйныф җитәкчесе һәм урта һөнәри белем төркемнәре кураторлары катнаша. 60 меңнән артык кеше катнашырга теләк белдереп гариза тапшырган.

2024 елда пенсиянең уртача күләме аена 23 мең сумнан артыграк тәшкил итәчәк. Бу хакта Федерация советында чыгыш ясаганда Россия Финанс министрлыгы башлыгы Антон Силуанов сөйләде.

Атна ахырына Татарстанга салкыннар киләчәк, беренче кар төшәргә мөмкин. Бу хакта «Метео» прогноз үзәге җитәкчесе Александр Шуваловка сылтама белән Татарстан башкаласы мэриясе хәбәр итә.

Россия Гадәттән тыш хәлләр министрлыгының Татарстан буенча баш идарәсе башлыгы, эчке хезмәт генерал-лейтенанты Рәфис Хәбибуллинга «Татарстан Республикасының атказанган коткаручысы» дигән мактаулы исем бирелде. Әлеге карарны Татарстан Рәисе Рөстәм Миңнеханов имзалады.

Татарстан Рәисе Рөстәм Миңнеханов ике хезмәт ветеранын бүләкләү турында караларны имзалады. Документлар Татарстан җитәкчесенең рәсми сайтында дөнья күрде.

Татарстан Республикасы Дәүләт киңәшчесе Минтимер Шәймиев мәгариф системасында проблемалар булуын әйтте. Ул бу хакта профессор, ТР Фәннәр академиясенең беренче президенты Мансур Хәсәновка мемориаль такта ачу чарасында сөйләде.

Татарстанның күренекле дәүләт эшлеклесе, ТР Фәннәр академиясенең беренче президенты, Татар энциклопедиясе институтының беренче директоры Мансур Хәсәнов истәлегенә Фәннәр академиясе бинасында мемориаль такта ачылды. Тантаналы чарада Татарстан Рәисе Рөстәм Миңнеханов, Татарстан Республикасы Дәүләт киңәшчесе Минтимер Шәймиев, ТР Фәннәр академиясе президенты Рифкат Миңнеханов, галимнәр, язучылар катнашты.

Россия Хөкүмәте социаль әһәмияткә ия онлайн-ресурсларга бушлай керү вакытын 24 сәгатьтән 7 көнгә кадәр арттырды. Абонент исәбендә балансның күпме булуына карамастан, хәзер россиялеләр расланган исемлеккә кертелгән хезмәтләрдән файдалана алачак. Исемлекне Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт раслаган. Бу хакта Министрлар Кабинетының матбугат хезмәте хәбәр итә.